ကခ်င္ျပည္နယ္အတြင္း ႏိုင္ငံသားစိစစ္ေရးကတ္ျပားႏွင့္ အိမ္ေထာင္စုမရိွေသးသူမ်ားကို ေရြးေကာက္ပြဲ မတိုင္မီ အၿပီးသတ္ ျပဳလုပ္ေပးမည္

ကချင်ပြည်နယ်အတွင်းတွင် နိုင်ငံသားစိစစ်ရေးကဒ်ပြားနှင့် အိမ်ထောင်စုမရှိသေးသည့် ပြည်သူများကို လာမည့် ၂၀၂၀ရွေးကောက်ပွဲ မတိုင်မီ တပြည်နယ်လုံးလွှမ်းခြုံကာ အပြီးသတ်ဆောင်ရွက်ပေးသွားမည် ဖြစ်ကြောင်း ကချင်ပြည်နယ် လူဝင်မှုကြီးကြပ်ရေးနှင့် လူ့အရင်းအမြစ်ဝန်ကြီးဌာနမှ သိရသည်။

အဆိုပါ စီမံချက်တွင် ကချင်ပြည်နယ်လူဝင်မှုကြီးကြပ်ရေးနှင့် လူ့အရင်းအမြစ်ဝန်ကြီးဌာန၊ ပြည်နယ်အထွေထွေအုပ်ချုပ်ရေး ဦးစီးဌာနနှင့် ရွေးကောက်ပွဲကော်မရှင်တို့ ပူးပေါင်းကာ ယခုနှစ် အောက်တိုဘာလမှ စတင်၍ ဒီဇင်ဘာလအထိ သုံးလတိတိ ပြုလုပ်ပေးသွားမည်ဖြစ်ကြောင်း ကချင်ပြည်နယ် လူဝင်မှုကြီး ကြပ်ရေးနှင့် လူ့အရင်းအမြစ်ဝန်ကြီးဌာန ဝန်ကြီး ဦးဇော်ဝင်းထံမှ သိရသည်။

“ရွေးကောက်ပွဲမှာ မဲပေးချင်တယ်ဆိုရင် အနည်းဆုံး မှတ်ပုံတင်တော့ရှိရမယ်။ အဲ့ဒါကြောင့် အဓိကတော့ နိုင်ငံသားစိစစ်ရေးကဒ်ပြား မရှိသေးတဲ့သူတွေလည်း အဆင်ပြေအောင်၊ ပြီးတော့ အိမ်ထောင်စု မရှိသေးတဲ့သူတွေအတွက်လည်း အဆင်ပြေအောင်ပေါ့။” ဦးဇော်ဝင်းက ပြောသည်။

၂၀၁၀၊ ၂၀၁၅ ခုနှစ်တွင် ကျင်းပပြုလုပ်ခဲ့သည့် ရွေးကောက်ပွဲ္ပ၌ နိုင်ငံသားစီစစ်ရေးကဒ်ပြားနှင့် အိမ်ထောင် စုမရှိသည့် ပြည်သူများအနေဖြင့် မဲပေးနိုင်မည့် အခွင့်အရေးများကို ဆုံးရှူံးခဲ့ရပြီး ယင်းကဲ့သို့ မဖြစ်ရအောင် လာမည့်ရွေးကောက်ပွဲမတိုင်မီ အပြီးသတ်ပြုလုပ်ပေးသွားရန် စီမံချက်ချထားကြောင်း ၎င်းက ထည့်သွင်းပြော ဆိုခဲ့သည်။

ဤသို့ပြုလုပ်ရာတွင် ဝေးလံခေါင်ဖျားသည့် ဒေသများကို ပိုမိုဦးစားပေး ဆောင်ရွက်ပေးသွားမည်ပြီး NRC နှင့် အခြားအရပ်ဘက်အဖွဲ့အစည်းများမှလည်း ပူးပေါင်းဆောင်ရွက်ပေးဖို့ ရှိကြောင်း သိရသည်။
လက်ရှိကချင်ပြည်နယ်တွင်း ပြည်နယ်လူဝင်မှုကြီးကြပ်ရေးနှင့်ပြည်သူ့အင်အားဦးစီးဌာနနှင့် သက်ဆိုင်ရာ မိတ်ဖက်ဌာနဆိုင်ရာ ဦးစီးဌာနများ ပူးပေါင်းကာ “သစ္စာစီမံချက်” အနေဖြင့် အခြေခံပညာ စာသင်ကျောင်းများ၊ ကိုယ်ပိုင်ပညာရေးစာသင်ကျောင်းများ၊ စစ်ရှောင်စခန်းများ၊ မိဘမဲ့ဂေဟာများ၊ ပရဟိတအသင်းအဖွဲ့ကျောင်းများတွင် အများဆုံးပြုလုပ်ပေးလျှက်ရှိသည်။

လွမ်းအောင်