စစ်ကိုင်းတိုင်း မဲဇာတောင်တက်လမ်းတွင် တပ်မတော်နှင့် KIA၊ PDF ပူးပေါင်းအဖွဲ့ကြား တိုက်ပွဲဖြစ်နေ၍ ခရီးသွားပြည်သူများ ဒုက္ခတွေ့
EPN
မြစ်ကြီးနား၊ ဧပြီ ၄ (၂၀၂၄)
ပြီးခဲ့သည့် ရက်ပိုင်းက စစ်ကိုင်းတိုင်း မဲဇာတောင်တက်လမ်းကျောတွင် တပ်မတော်နှင့် KIA၊ PDFပူးပေါင်းအဖွဲ့ကြား တိုက်ပွဲများ ဖြစ်ပွားနေ၍ ခရီးသွားပြည်သူများ လမ်းခရီးတွင် ကြန့်ကြာကာ ဒုက္ခရောက်နေကြောင်း ခရီးသွားပြည်သူများထံမှ သိရသည်။
စစ်ကိုင်းတိုင်း မဲဇာတောင်တက်လမ်းနှင့် ဆင်းဝဲကျေးရွာတို့တွင် ဧပြီလ ၁ ရက်နေ့ကစပြီး တိုက်ပွဲများ ဖြစ်ပွားခဲ့၍ ခရီးသွားပြည်သူများ တိုက်ပွဲကြားပိတ်မိနေကာ လမ်းခရီးတွင် ခက်ခက်ခဲ နေထိုင်စားသောက်ခဲ့ရကြောင်း ခရီးသွားပြည်သူများက ဆိုသည်။
” လေယာဉ် လက်မှတ်ခ မတတ်နိုင်လို့ ကားနဲ့ပြန်တာ လမ်းမှာ တိုက်ပွဲဖြစ်လို့ နှစ်ရက်ပိတ်မိခဲ့တယ်။ လမ်းဘေးအိပ် လမ်းဘေးစားပေါ့။ စားရိတ်ထောင်းတယ်။ အချိန်ကြန့်ကြာတယ်။ ကားလမ်းခရီးက မလွယ်ပါဘူး။ ကလေးတွေနဲ့ သွားလို့ အစဉ်မပြေဘူး။ အရမ်းဒုက္ခရောက်တယ် ” ဟု ၎င်းကရှင်းပြသည်။
စစ်ကိုင်းတိုင်း မဲဇာနှင့် ဆင်းဝဲဘက်တွင် နှစ်ဖက်တိုက်ပွဲများ ဖြစ်ပွားခဲ့၍ ခရီးသည်ယာဉ်များ အဝင်အထွက် မရှိခဲ့ကြောင်း ပုဂ္ဂလိကမော်တော်ယာဉ်များကြီးကြပ်ရေးအသင်း တာဝန်ရှိသူ တစ်ဦးထံမှ သိရသည်။
” လမ်းကျောမှာ တိုက်ပွဲဖြစ်နေလို့ အခုလောလောဆယ် ခရီးသည်ယာဉ်နဲ့ ကုန်စည်ယာဉ်တွေ အဝင်အထွက် မရှိသေးဘူး။ ယာဉ်အဝင်အထွက် မရှိတာ လေးရက်လောက်ရှိနေပြီ။ လမ်းပိုင်း ပိတ်တာရယ်လို့တော့ မရှိဘူး။ လမ်းမှာ တိုက်ပွဲဖြစ်ရင် ရပ်ထား၊ ပြီးရင် ဆက်ထွက်ပေါ့ ” ဟု ၎င်းကရှင်းပြသည်။
အဆိုပါ လမ်းကြောတွင် မကြာခဏ တိုက်ပွဲများ ဖြစ်ပွားနေ၍ ခရီးသွားပြည်သူများ ကုန်စည်ကားများ၊ ဆီဘောက်ဆာကားများ လမ်းခရီးတွင် မကြာခဏ ပိတ်မိခြင်းများ ဖြစ်ပွားလျက် ရှိကြောင်း သိရသည်။
ပွင့်လင်းရာသီ ဘုရားဖူးကားလများ ဖြစ်သော်လည်း လမ်းခရီးတွင် တိုက်ပွဲများဖြစ်ပွားခြင်း၊ လူသစ်စုဆောင်ခြင်းများ ရှိနေ၍ ခရီးသွားပြည်သူများ သိသိသာသာ
သွားလာမှု နည်းပါးနေကြောင်း သိရသည်။
မြတ်မင်း