မြစ်ကြီးနားမြို့ရှိ တည်းခိုရိပ်သာတစ်ခုတွင် အမျိုးသားတစ်ဦး မှုးယစ်ဆေးဝါးအလွန်အကျွန်သုံးစွဲ၍ သေဆုံး
EPN
မြစ်ကြီးနား၊ သြဂုတ် ၁
ကချင်ပြည်နယ်၊ မြစ်ကြီးနားမြို့ရှိ တည်းခိုရိပ်သာတစ်ခုတွင် ယမန်နေ့ ဇူလိုင်လ (၃၁)ရက်နေ့ နံနက် (၇)နာရီခန့်က အမျိုးသားတစ်ဦး မှုးယစ်ဆေးဝါးအလွန်အကျွန်သုံးစွဲကာ သေဆုံးသွားခဲ့ကြောင်း သိရသည်။
အဆိုပါအမျိုးသားသည် ဆင်ဘိုဘက်မှ အလုပ်လုပ်ပြီး နေအိမ်ရှိရာ မိုးကောင်မြို့သို့ ပြန်ရန်အတွက် မြစ်ကြီးနားမြို့၊ အောင်နန်းရပ်ကွက်၊ စူပါဝမ်းတည်းခိုရိပ်သာတွင် ခေတ္တ တည်းခိုနေစဉ် ၎င်း၏ အိပ်ဆောင် (အခန်း)အတွင်း မှုးယစ်ဆေးဝါးအလွန်အကျွန်သုံးစွဲကာ သေဆုံးခဲ့ခြင်းဖြစ်ကြောင်း လူမှုကူညီရေးအသင်းတစ်ခုမှ တာဝန်ရှိသူတစ်ဦးကပြောသည်။
” အဲ့ဒီလူက ဆင်ဘိုဘက်ကနေ အလုပ်ပြီးလို့ သူ့အိမ်ပြန်လာတာပြောတယ်၊ မြစ်ကြီးနားမြို့မှ ညအိပ်ပြီးနားတာ၊ ညက အရက်တွေလဲသောက်ထားတယ်ထင်တယ် အရက်ပုလင်းလဲတွေ့တယ်၊ နောက်ပြီး မှုးယစ်ဆေးဝါးသုံးထားတဲ့ ဆေးထိုးအပ်တွေလဲတွေ့တယ်၊ အခုတော့ အလောင်းကိုတော့ ဆေးရုံကြီးပို့ထားလိုက်ပြီ ၊ ” ဟု ၎င်းကပြောသည်။
သေဆုံးသူမှာ မိုးကောင်မြို့နေ ၊ အသက် (၃၀) ဝန်းကျင် ကိုထိန်လင်း ဆိုသူဖြစ်ပြီး သေဆုံးသူ၏ ရုပ်အလောင်းအား ၎င်း၏ မိသားစုဝင်များက ယနေ့နံနက်ပိုင်းတွင် လာရောက် သယ်ယူသွားခဲ့ပြီဖြစ်ကြောင်း တာဝန်ရှိသူများထံမှ သိရသည်။
မြစ်ကြီးနားမြို့တွင် ယခုရက်ပိုင်းအတွင်း အလားတူဖြစ်စဉ်များများပြားလာပြီး ဇူလိုင်လ (၂၇)ရက်နေ့ကလည်း စီတာပူရပ်ကွက်အတွင်းရှိ ငွေပျော်လမ်း အနီးတွင် အမျိုသားတစ်ဦး မှုးယစ်ဆေးဝါးအလွန်အကျွန်သုံးစွဲကာ သေဆုံးခဲ့သည့် ဖြစ်စဉ်တစ်ခုဖြစ်ပွားခဲ့ကြောင်း သိရသည်။
ဗညားနွဲ့