PDF အဖွဲ့ဝင်များက “အောင်ကျော်မိုး” အဝေးပြေးခရီးသည်တင်ကားကို မိုင်းဖြင့်ဖောက်ခွဲ တိုက်ခိုက်ပြီးနောက် သေနတ်များဖြင့်ပစ်ခတ်
EPN
ဘီးလင်း၊ ဧပြီ ၅ (၂၀၂၄)
မွန်ပြည်နယ်၊ ဘီးလင်းမြို့နယ်တွင် PDF အဖွဲ့ဝင်များမှ ယမန်နေ့ (ဧပြီ ၄ ရက်)၊ ညပိုင်းက “အောင်ကျော်မိုး” အဝေးပြေးခရီးသည်တင်ကားကို မိုင်းဖြင့်ဖောက်ခွဲတိုက်ခိုက်ပြီးနောက် သေနတ်များဖြင့်ပစ်ခတ်ခဲ့ကြကြောင်း လုံခြုံရေးအဖွဲ့နှင့် နီးစပ်သူများထံမှ သိရသည်။
ယမန်နေ့၊ ည ၉ နာရီခန့်က PDF အဖွဲ့ဝင်များသည် ရန်ကုန်-မော်လမြိုင်သွား ကားလမ်းအတိုင်း သထုံမြို့ဘက်မှ ဘီးလင်းမြို့ဘက်သို့ ခရီးသည်များ တင်ဆောင်မောင်းနှင်လာသည့် “အောင်ကျော်မိုး” အဝေးပြေးခရီးသည်တင်ကားအား ဘီးလင်းမြို့နယ်၊ ရွှေရောင်ပြကျေးရွာအနီးရှိ မိုင်တိုင်အမှတ် ၁၃၁/၁ နှင့် ၁၃၁/၂ ကြားအရောက် မိုင်းဖြင့်ဖောက်ခွဲတိုက်ခိုက်ပြီးနောက် သေနတ်များဖြင့်ပစ်ခတ်ခဲ့ကြကြောင်း သိရသည်။
ဖြစ်စဥ်ကြောင့် ကားပေါ်တွင် လိုက်ပါလာသူများအနက် အမျိုးသားတစ်ဦးမှာ ထိခိုက်ဒဏ်ရာများရရှိ၍ အခင်းဖြစ်နေရာ၌ သေဆုံးသွားခဲ့ပြီး၊ အမျိုးသား (၂)ဦးနှင့် အသက် (၁၇)နှစ်အရွယ်ရှိ အ မျိုးသမီး တစ်ဦးတို့တွင် ထိခိုက်ဒဏ်ရာများ (စိုးရိမ်ရနှင့်မစိုးရိမ်ရ)များ ရရှိခဲ့ကြောင်း သိရသည်။
အဆိုပါ သေဆုံးသူ၏ ရုပ်အလောင်းနှင့် ထိခိုက်ဒဏ်ရာ ရသူများအား နောင်ဘိုလူမှုကူညီရေးအသင်းမှ သိမ်ဆိပ်တိုက်နယ် ပြည်သူ့ဆေးရုံသို့ ပို့ဆောင်ပေးခဲ့ကြကြောင်း သိရသည်။
ဖြစ်စဥ်ကြောင့် “အောင်ကျော်မိုး” အဝေးပြေးခရီးသည်တင်ကား၏ ဘေးပတ်လည်မှန်များနှင့် ကိုယ်ထည်များ မိုင်းစထိမှန်ခြင်းနှင့် ကျည်ထိမှန်မှုများ ဖြစ်ပေါ်ခဲ့ကာ လုံခြုံရေးအဖွဲ့ဝင်များမှလည်း စုံစမ်းစစ်ဆေးမှုများ ပြုလုပ်လျက်ရှိကြောင်း သိရသည်။
ကျော်စိုးသူ