ပူတာအိုခရိုင်အတွင်းရှိ ပိုက်ချက်တင်ဒါများ လေလံတင်ရောင်းချ
EPN
ပူတာအို၊ မေ၂၇
“ကိုဗစ်-၁၉ကာလမှာ ကချင်ပြည်နယ်အစိုးရအဖွဲ့ရဲ့ညွှန်ကြားချက်အရ အင်းသူကြီးများကို အခွန်အခ (၁၀)ရာခိုင်နှုန်းတိုးပြီးတော့ လေလံများကိုရောင်းချပေးနေတဲ့ အခမ်းအနားဖြစ်ပါတယ်။ ဒီအခမ်းအနား တစ်ခု ထဲမဟုတ်ပဲနဲ့ ပြည်သူလူထုသိရှိအောင် ငါးမျိုးထိန်းသိမ်းတဲ့ရာသီမှာ တရားမဝင်ငါးဖမ်းခြင်း မပြုလုပ်ကြဖို့ဆိုတဲ့ Message (မေ့ဆေ့ပ်)တွေကိုပေးဖို့အတွက် ရည်ရွယ်ချက်နဲ့လုပ်ရတဲ့ အခမ်းအနား ဖြစ်ပါတယ်”ဟု ခရိုင်ငါး လုပ်ငန်းဦးစီးဌာန ခရိုင်ဦးစီးမှူး ဦးမြသိန်းကပြောကြားသည်။
၂၀၂၀-၂၀၂၁ခုနှစ် လုပ်ငန်းရာသီတွင် ပိုက်ချက်တင်ဒါများအား လေလံတင်ရောင်းချရန်အတွက် လုပ်ငန်း စီမံချက်များရေးဆွဲခဲ့သော်လည်း နိုင်ငံနှင့် အဝန်း ကိုဗစ်-၁၉ရောဂါကာကွယ်တားဆီးရေးဆောင်ရွက်နေသည့် ကာလဖြစ်သည်နှင့်အညီ ကချင်ပြည်နယ်အစိုးရအဖွဲ့၏လမ်းညွန်ချက်ဖြင့် လေလံပိုက်ချက်များကို ယခင်နှစ် များထက်(၁၀)ရာခိုင်နှုန်းထပ်ဆောင်းပေးသွင်းစေခဲ့ကြောင်း၊ အဆိုပါရရှိသည့် အခွန်အခများကို ဘဏ္ဍာငွေ အဖြစ် ပေးသွင်းသွားမည်ဖြစ်ကြောင်း၊ ပူတာအိုခရိုင်အတွင်းရှိ ပူတာအို၊မချမ်းဘော့မြို့နယ်များတွင် လေလံ ပိုက်ချက် လုပ်ကိုင်သူ(၁၀)ဦးရှိကြောင်းသိရသည်။
ထို့အပြင် ပိုက်ချက်လုပ်ကိုင်သူများမှတဆင့် ပြည်သူများသိရှိအောင် ငါးမျိုးထိန်းသိမ်းရေးရာသီ၊ တရား မဝင်ငါးဖမ်းဆီးခြင်းနှင့် ငါးမျိုးစိတ်အလိုက် ငါးအတက်အဆင်း မျိုးပွားရာဒေသများအကြောင်းကို သိရှိ စေရန် ခရိုင်ဦးစီးမှူးကပြောကြားခဲ့ကြောင်းသိရသည်။
ဖုန်ကန်(ပူတာအို)