ကချင်ပြည်နယ် အမျိုးသားဒီမိုကရေစီအဖွဲ့ချုပ် (NLD) ဥက္ကဌဦးမြသိန်း ပြန်လည်လွတ်မြောက်လာ
မြစ်ကြီးနား၊ မေလ ၃
ကချင်ပြည်နယ် မြစ်ကြီးနားအကျဉ်ထောင်မှာ ပြစ်ဒဏ်(၁)နှစ်နှင့် (၃)လ ကျခံခဲ့ရသည့် ကချင်ပြည်နယ် အမျိုးသားဒီမိုကရေစီအဖွဲ့ချုပ် (NLD) ဥက္ကဌဦးမြသိန်းကို မေလ (၂)က နံနက် (၉)နာရီခန့်က အကျဉ်းထောင်လျော့ရက်စည်းမျဉ်းများအရ ပြန်လည်လွတ်မြောက်လာခဲ့ပြီဖြစ်ကြောင်းသိရသည်။
အဆိုပါ ပြည်နယ် (NLD)ဥက္ကဌကိုမြစ်ကြီးနားမြို့နယ် တရားရုံးတွင် (၂၀၂၁)ခုနှစ် ဒီဇင်ဘာလ (၁၄)ရက်နေ့က သဘာဝဘေးအန္တရာယ်ဆိုင်ရာစီမံခန့်ခွဲမှုဥပဒေပုဒ်မ -၂၅ ဖြင့် ပြစ်ဒဏ် (၁)နှစ် နှင့် (၂၀၂၁)ခုနှစ် ဒီဇင်ဘာလ(၃၀)ရက်နေ့က ပို့ကုန်သွင်းကုန်ဥပဒေပုဒ်မ – ၈ ဖြင့် ပြစ်ဒဏ်(၃)လ ချမှတ်ခံခဲ့ရကြောင်း သိရသည်။
“ မေလ(၂)ရက်နေ့ကပဲ အကျဉ်းထောင်ရဲ့ လျော့ရက်စည်းကမ်းချက်တွေအရ ကချင်ပြည်နယ် အမျိုးသားဒီမိုကရေစီအဖွဲ့ချုပ် (NLD) ဥက္ကဌဦးမြသိန်း ပြန်လွတ်လာပြီလို့သိရတယ်၊ သူက စုစုပေါင်း ထောင်ဒဏ် (၁)နှစ်နဲ့ (၃)လ ချမှတ်ခံခဲ့ရတာဖြစ်တယ်၊ လွတ်လွတ်ချင်းတော့ သူကို တပ်ကုန်းရပ်ကွက်မှာရှိတဲ့ တည်းခိုရိပ်သာတစ်ခုမှာထားတယ်၊ ပြီးမှ (၃)ရက်နေ့လောက်မှ ရွှေကူမြို့ကို ပြန်သွားတယ်၊ “ ဟု ဦးမြသိန်း နှင့် နီးစပ်သူတစ်ဦးကပြောသည်။
ထို့အပြင် ဧပြီလ ၂၂ ရက်နေ့က ကချင်ပြည်နယ် ဝန်ကြီးချုပ်ဒေါက်တာခက်အောင်နှင့် ဝန်ကြီး ခြောက်ဦးကိုလည်း သဘာဝ ဘေးအန္တရာယ်ဆိုင်ရာ စီမံခန့်ခွဲရေး ဥပဒေပုဒ်မ (၂၅) ၊အဂတိလိုက်စားမှု ဥပဒေ ပုဒ်မ (၅၅) နှင့် မတရားအသင်း ဆက်သွယ်မှုဆိုင်ရာ အက်ဥပဒေပုဒ်မ ၁၇(၁) တို့ဖြင့် အသီးသီး အမိန့်ချမှတ်ခဲ့ကြောင်းသိရသည်။