မြေပြင်ကွင်းဆင်းဆောင်ရွက်ချက် အားနည်းမှုကြောင့် တောင်သူများ၏ မြေယာသိမ်းဆည်းခံရမှုများ ပိုမို ဖြစ်ပွား
EPN
မြစ်ကြီးနား၊ စက်တင်ဘာ ၂၁
သက်ဆိုင်ရာဌာနများမှ မြေပြင်ကွင်းဆင်းဆောင်ရွက်မှု အားနည်းသည့်အတွက် တောင်သူများ လုပ်ကိုင်စား သောက်လျက်ရှိသည့် မြေယာသိမ်းဆည်းခံရမှုဖြစ်စဉ်များ ပိုမိုဖြစ်ပွားနေကြောင်း စက်တင်ဘာလ ၂၁ နေ့တွင် ကျင်းပသည့် မြေယာဆိုင်ရာနှီးနှောဖလှယ်ပွဲတွင် ပဒေသာမိုး လူမှုအဖွဲ့အစည်းမှ မြေယာနှင့် ဥပဒေ ပေါင်းစပ်ညှိနှိုင်းရေးမှူး ဦးကျော်ဇေယျ က ပြောဆိုသည်။
ကချင်ပြည်နယ်အတွင်းရှိ မြေယာသိမ်းဆည်းခံရမှုဖြစ်စဉ်အများစုမှာ တောင်သူလယ်သမားများ လုပ်ကိုင်စားသောက်နေသည့် မြေယာသိမ်းဆည်းခံရမှုမှာ အများဆုံးဖြစ်ကြောင်း ၎င်းက ရှင်းပြသည်။
“မြေယာ လုပ်ပိုင်ခွင့်လာလျှောက်ပြီဆိုတာနဲ့ အဲ့ဒီ မြေဟာ တကယ်ရော မြေလွတ် မြေလပ် မြေရိုင်း ဟုတ်ရဲ့လားဆိုတာ စီမံခန့်ခွဲမှု ကော်မတီတို့ လုပ်ငန်းအဖွဲ့တို့က ကွင်းဆင်းဆောင်ရွက်ရမှာ အခုက မြေပြင်ကွင်းဆင်းဆောင်ရွက်မှုတွေ အားနည်းတဲ့အခါကျတော့ မြေပုံထဲကနေကြည့်ပြီးတော့ ဧက ၂၀၀၀ -၃၀၀၀ ပေးလိုက်တဲ့အခါကျတော့ မှုလထဲက လုပ်ကိုင်နေတဲ့ တောင်သူတွေရဲ့မြေတွေ ပါသွားတဲ့ဖြစ်စဉ်တွေ များတယ်” ဟု ၎င်းက ပြောသည်။
ယင်းအပြင် ဒေသခံများ၏မြေယာသိမ်းဆည်းခံရမှုဖြစ်စဉ်များနှင့် ပတ်သက်၍ ညှိနှိုင်းဆောင်ရွက်မှုများနှင့် ဥပဒေကျင့်သုံးဆောင်ရွက်မှုများ အားနည်း လျက်ရှိကြောင်း ၎င်းမှ ဆက်ပြောသည်။
“မှုလထဲက လုပ်ကိုင်စားသောက်နေတဲ့ တောင်သူတွေရှိတယ်ဆိုရင် ဥပဒေအရ တောင်သူတွေရော နှစ်ဦးနှစ်ဖက် နစ်နာမှု မရှိအောင်ညှိနှိုင်းဆောင်ရွက်ပေးပြီးမှ လုပ်ပိုင်ခွင့်ချပေးတာတို့ ဒါမှမဟုတ် ငြင်းပယ်တာတို့လုပ်ရမှာ အခုက မြေမြင်ကွင်းဆင်းဆောင်ရွက်မှုအားနည်းတာအပြင် ဥပဒေကျင့်သုံး ဆောင်ရွက်မှု အားနည်းတာတွေလည်းရှိတယ်” ဟု ဆက်လက်ပြောဆိုခဲ့သည်။
ယခုကဲ့သို့ မြေယာသိမ်းဆည်းခံရမှုများကြောင့် တောင်သူများအနေဖြင့် မိသားစုစားဝတ်နေရေး အခက်အခဲများနှင့် ရင်ဆိုင်ရသည့်အတွက် တာဝန်ရှိသူများအနေဖြင့် မြန်မြန်ဆန်ဆန် နှင့် မှန်မှန်ကန်ကန် ဆောင်ရွက်ပေးစေလို ကြောင်း မြေယာသိမ်းဆည်းခံခဲ့ရသည့် တောင်သူ ဦးဆီဆာရဲ့ က ပြောသည်။
“အဘိုးအဘွား အဖေအမေ လက်ထက်ကတည်းကနေလက်ဆင့်ကမ်းလုပ်စားလာခဲ့တဲ့လယ်မြေ အစိုးရက ထုတ်ပေးထားတဲ့ပြေစာတွေလည်းရှိတယ် အစိုးရကိုလည်း နှစ်စဉ်တစ်ဧကကိုလေးတင်းနဲ့ အခွန်ပေးဆောင် နေပါတယ် အဲ့တာကို သီရိဘက်စုံစိုက်ပျိုးရေးကုမ္ပဏီက ၂၀၀၆ ခုနှစ်မှာ သိမ်းသွားခဲ့တယ် လယ်ယာမြေသိမ်း ဆည်းခံခဲ့ရတဲ့အတွက် နေ့စားအလုပ်လေးတွေလုပ်ပြီး စားဝတ်နေရေးအတွက် ရုန်းကန်နေရတယ် ရွားသား တွေအားလုံး စားဝတ်နေရေးအဆင်ပြေအောင် တာဝန်ရှိပုဂ္ဂိုလ်တွေ မြန်မြန်ဆန်ဆန်နဲ့ မှန်မှန်ကန်ကန် ဆောင်ရွက်ပေးစေချင်တယ်” ဟု ၎င်းမှပြောပြသည်။
ကချင်ပြည်နယ်အတွင်း မြေယာမှုခင်းများနှင့် ပတ်သက်၍ ၂၀၁၆ ခုနှစ်မှ ၂၀၁၉ ခုနှစ်အထိလွှတ်တော်သို့ တိုင်ကြားသည့် အမှုပေါင်း ၁၈၀ခန့်ရှိပြီး လွှတ်တော်ကိုယ်စားလှယ်များအနေဖြင့် ဖြေရှင်းနိုင်သည့် အတိုင်းအတာ ကို လွှတ်တော်ရေးရာအဖွဲ့များမှဖြေရှင်းပေးလျက်ရှိသလို လယ်ယာမြေနှင့် အခြားမြေများ သိမ်းဆည်းခံရမှုများ ပြန်လည်စီစစ်ရေးကော်မတီများမှလည်း စိစစ်ဆောင်ရွက်လျက်ရှိကြောင်း ကချင်ပြည်နယ် လွှတ်တော်မှ သိရသည်။
သွယ်သွယ်