ဖားကန့်တွင် မိုးရွာသွန်းမှုကြောင့် မြေစာပြိုကျပြီး နေအိမ်တစ်လုံး ပျက်စီး
EPN
မြစ်ကြီးနား ၊ဇွန် ၆
ကချင်ပြည်နယ်၊ ဖားကန့်မြို့၊ မြို့မရပ်ကွက် ကာလီဂျောင်အပိုင်း ယမန်နေ့ မနက်၈ နာရီခန့်က မိုးများရွာသွန်းမှုကြောင့် မြေစာပြိုကျပြီး လူနေအိမ်တစ်လုံးပျက်စီးဆုံးရှုံးခဲ့ကြောင်း ဒေသခံတစ်ဦးထံမှ သိရသည်။
ဖားကန့်ဒေသတစ်လျှောက်တွင် လက်တလော မိုးများစွာရွာသွန်းလျှက်ရှိပြီး ယမန်နေ့ကလည်း မြေစာများပြိုကျကာ နေအိမ်တစ်လုံးအတွင်းသို့ မြေစာများလျောကျခဲ့ပြီး နေအိမ်ပိုင်ရှင်များမှာ အသိမိတ်ဆွေများအိမ်ထံသို့ရွေ့ပြောင်းမှီခိုနေထိုင်ရကြောင်း သိရသည်။
“မိုးကအခုတလော အရမ်းရွာနေတယ်ဒီမှာ၊မနေ့ကလည်း မိုးရွာတော့မြေစာပြိုကျပြီး အိမ်တစ်လုံးအတွင်းမှာ မြေစာတွေဝင်သွားတာ လူတွေနေလို့တောင်မရဘူး၊ ဆိုးတာက မီးဖိုချောင်ပိုဆိုးတာပေါ့မြေစာတွေကြီးပဲ၊အ ဲ့တာတွေကိုဖယ်ရှားဖို့ကလည်းများပြီးတော့ မိုးကလည်း ခုထိဆက်တိုက်ရွာနေသေးတာကြောင့် လောလောဆယ်တော့ မဖယ်ရှားနိုင်သေးဘူး၊ နေအိမ်ပိုင်ရှင်တွေရော အမျိုးတွေအိမ်မှာသွားနေရတယ်အခုထိ”ဟု မြေပြိုမှုအနီးရှိ ဒေသခံတစ်ဦးကပြောဆိုသည်။
မြေစာပုံပြိုကျမှုကြောင့် ပျက်စီးခဲသည့်နေအိမ်မှာ ဦးလဂျိုရော်၏ နေအိမ်ဖြစ်ပြီး လက်ရှိအချိန်အထိ မိုးများဆက်လက်ရွာသွန်းနေသေးသည့်အတွက် ၎င်းမြေစာများဖယ်ရှာပြီး နေအိမ်ပြန်လည်ပြုပြင်ရန် အဆင်မပြေသေးကြောင်း သိရသည်။
လင်းယုန်