မြန်မာနဲ့ ရုရှားတို့ ၂၀၂၄ ခုနှစ်အတွင်း ပူးတွဲစစ်ရေးလှုပ်ရှားမှု ၅၀ ကျော်ပြုလုပ်ရန် စီစဉ်
EPN
နိုင်ငံတကာ၊ မတ် ၂၈
မြန်မာနဲ့ ရုရှားတို့ဟာ ယခုနှစ်အတွင်း ပူးတွဲစစ်ရေးလှုပ်ရှားမှုပေါင်း ၅၀ ကျော်ပြုလုပ်ဖို့ စီစဉ်ထားတယ်လို့ ရုရှားနိုင်ငံပိုင်သတင်းဌာန RIA Novosti က ရုရှားကာကွယ်ရေးဝန်ကြီးဌာနကို ကိုးကားပြီး ဒီနေ့ ဖော်ပြခဲ့ပါတယ်။
အဆိုပါ ပူးပေါင်းဆောင်ရွက်မှုအတွင်း လက်နက်ကိုင်တပ်ဖွဲ့တွေရဲ့ စစ်ရေးလေ့ကျင့်မှုတွေနဲ့ တိုက်ခိုက်ရေးသင်တန်းတွေ ပါဝင်မယ်လို့ သိရပါတယ်။
ရုရှား-မြန်မာ နှစ်နိုင်ငံဟာ စစ်ရေးပူးပေါင်းဆောင်ရွက်မှုကို မြှင့်တင်လျက်ရှိပြီး ပြီးခဲ့တဲ့နှစ် စက်တင်ဘာလအတွင်းမှာ ရုရှားနိုင်ငံထုတ် Su-30 တိုက်လေယာဉ်နှစ်စင်းကို မြန်မာနိုင်ငံကို ပထမဆုံးအကြိမ်တင်ပို့ခဲ့တယ်လို့ သိရပါတယ်။
Su-30 တိုက်လေယာဉ်ခြောက်စင်းကို မြန်မာနိုင်ငံကို ပေးပို့ဖို့အတွက် ၂၀၂၂ ခုနှစ် စက်တင်ဘာလအတွင်းမှာ စာချုပ်ချုပ်ဆိုခဲ့ကြတယ်လို့ RIA က ပြောပါတယ်။
မြန်မာနိုင်ငံပေါ် ရုရှားရဲ့ ထောက်ခံမှုဟာ လက်ခံနိုင်ဖွယ်မရှိသလို မတည်မငြိမ်ဖြစ်နေချိန်မှာ စစ်လက်နက်ပစ္စည်းတွေ ထောက်ပံ့နေတာဟာ ပဋိပက္ခကို မီးထိုးပေးနေတာဖြစ်တယ်လို့ အမေရိကန်က စွပ်စွဲထားပါတယ်။
ref; Bangkokpost