မိုးေကာင္းၿမိဳ႕နယ္ကို ငွက္ဖ်ားကူးစက္မႈပေပ်ာက္ေရးအတြက္ စီမံခ်က္ ခ်မွတ္ေဆာင္ရြက္ေနဟု ေဆးရုံအုပ္ႀကီး ေျပာၾကား

EPN
မိုးကောင်း၊ မေ ၁၇

မိုးကောင်းမြို့နယ်အတွင်း ပြည်သူများ ငှက်ဖျားကူးစက်မှုပပျောက်ရေးအတွက် စီမံချက် ချမှတ်ပြီး ဆောင်ရွက် နေကြောင်း မိုးကောင်းမြို့နယ် ပြည်သူဆေးရုံအုပ်ကြီး၊ မြို့နယ်ပြည်သူ့ကျန်းမာရေးဦးစီးဌာန ဒေါက်တာ ကောင်းမြတ်စံက ပြောကြားသည်။

မိုးကောင်းမြို့နယ်တွင် ၂၀၁၄ ခုနှစ်မှ ၂၀၁၈ ခုနှစ်အတွင်း ငှက်ဖျားရောဂါဖြစ်ပွားသူ ၁၉၂၉ ဦးရှိ၍ ငှက်ဖျားရောဂါဖြစ်ပွားမှုနှုန်းမှာ တစ်နှစ်ထက်တစ်နှစ်ပိုမို ကျဆင်းလျက်ရှိနေပြီး ထို့အပြင် ပြီးခဲ့သည့် ၂၀၁၈ခုနှစ်တွင် ရောဂါဖြစ်ပွားသူ ၇၃ဦးရှိ၍ အဆိုပါ (၅)နှစ်အတွင်း ငှက်ဖျားရောဂါကြောင့် သေဆုံးသူမရှိကြောင်း ၎င်းက ဆက် လေက်ပြောကြားသည်။

“ကျနော်တို့ အရင်က ငှက်ဖျားရောဂါနှိမ်နင်းဖို့ခြင်တွေကို ပစ်မှတ်ထားခဲ့တယ်။ ခြင်တွေက ရေရှိရာနေရာတွေဖြစ်တဲ့ စိမ့်စမ်းချောင်း၊ရေဝပ်ပြီး ရေတင်ကျန်တဲ့ နေရာတွေ(ရေကန်၊ရေအိုင်)၊ ဥယျာဉ်ခြံအတွင်းကရေတွင်းတွေ၊ လက်ယက်တွင်းတွေ၊ ဆည်၊ တမံ၊ မြောင်းနဲ့မြောင်းလက်တံတွေ၊ပုဇွန်ကန်၊ ရေချို၊ ရေငံစပ်တဲ့နေရာအစရှိသဖြင့် နေရာတိုင်းမှာပေါက်ဖွားနေတော့ နေရာတိုင်းကိုလိုက်နှိမ်နင်း လို့ မဖြစ်နိုင်ဘူး။ ဒါကြောင့် အခုက ခြင်ကိုပစ်မှတ်မထားတော့ဘဲ လူကိုပစ်မှတ်ထားပြီး နှိမ်နင်းမယ်။

ရောဂါဖြစ်ပွားတယ်လို့ သံသယရှိသူကိုတွေ့တာနဲ့ စတင်ဖြစ်ပွားပြီး (၂၄) နာရီအတွင်း သွေးဖောက်စစ်ဆေး မယ် ငှက်ဖျားဒေသက ပြန်လာသူတွေကို ငှက်ဖျား သွေးဖောက်စစ်ဆေးစေမယ်။ငှက်ဖျား တွေ့ရှိလူနာကို စုံစမ်းမေးမြန်းပြီး ခရီးသွားဖော်မိသားစု အိမ်နီးချင်းတွေကို သွေးဖောက်စစ်ဆေးနိုင်ရေး အကူအညီပေးမယ် ငှက်ဖျားကူးစက်မှုရှိနိုင်တဲ့ဧရိယာသတ်မှတ်ပြီး ကူးစက်မဲ့အခြေအနေ၊ ဆက်လက်ကူးစက်နိုင်မဲ့ အခြေအနေနဲ့ သင့်လျော်တဲ့ထိန်းချုပ်ရေးနည်းလမ်းတွေကိုဆောင်ရွက်မယ် နောက်စဉ်ဆက်မပြတ်ကွင်းဆင်း စုံစမ်းစစ် ဆေးမယ်။လူထုအတွင်းကို ငှက်ဖျားရောဂါကာကွယ်ရေး အသိပညာတိုးပွားရေး ကျန်းမာရေးပညာပေး လုပ်ငန်းတွေကို လုပ်ဆောင်မယ်” ဟုဆေးရုံအုပ်ကြီး ဒေါက်တာ ကောင်းမြတ်စံက ပြောသည်။

ကချင်ပြည်နယ်ရှိ မိုးကောင်းမြို့နယ် နှင့်မြစ်ကြီးနားမြို့နယ်များတွင် ဒေသတွင်း ငှက်ဖျားကူးစက်မှု ပပျောက် ရေးစီမံချက်များကို ပြည်ပအဖွဲ့အစည်းများဖြစ်သည့် PSI၊MCC စသည့် INGO၊ NGO အဖွဲ့အစည်းများနှင့် ပူးပေါင်း ဆောင်ရွက်လျှက်ရှိရာ ဒေသ၏ ငှက်ဖျားကူးစက်နိုင်မှု အခြေအနေ(Receptivity) နှင့် ငှက်ဖျားပိုး သယ်ဆောင်ထားသော လူများ ဝင်ထွက်သွားလာမှုအခြေအနေ(Vulnerability) တို့အပေါ် မူတည်၍ ဆီလျော်သောနည်းလမ်းများဖြင့် ဒေသတွင်း ငှက်ဖျားရောဂါ ကူးစက်မှုကို ပြတ်တောက်သွားအောင် ဆောင်ရွက် သွားမည်ဟုလည်း သိရသည်။

“မိုးကောင်းမြို့နယ်အတွင်းကငှက်ဖျားရောဂါ ဖြစ်ပွားမှုရှိခဲ့တဲ့ နေရာမှတ်တမ်းတွေအရ နယ်မြေ (၄၇) နေရာသတ်မှတ်ပြီး လူ နှစ်ဦးကို ဆေးခြင်ထောင်တစ်လုံးနှုန်းနဲ့ လူဦးရေ (၇၇၇၀၀)ဦးအတွက် ခြင်ထောင် (၃၉၀၅၃)လုံးကို ယခုလအတွင်းမှာဘဲလိုက်လံဝေငှပေးခဲ့ပြီး ဖြစ်ပါတယ်” မြို့ နယ်ကျန်းမာရေးမှူး အဆင့်(၁)ဦးလကြုံဘရန်က ပြောသည်။

ကချင်ပြည်နယ် တစ်ပြည်နယ်လုံးတွင် ၂၀၁၂ ခုနှစ် မှ ၁၈ ခုနှစ်အထိ ငှက်ဖျားရောဂါ ဖြစ်ပွားသူ(၁၆၆၄၆၂)ဦး ရှိပြီး သေဆုံးသူ (၈၇)ဦးရှိကာ ယင်းထဲမှ ဝိုင်းမော်မြို့နယ်သည် ငှက်ဖျားရောဂါ ဖြစ်ပွားသူအများဆုံးဖြစ်ကြောင်း သိရသည်။

ချိုမောင်