ဧရာဝတီျမစ္ ပထမျမစ္က်ဥ္းက အထင္ကရ နမ္တီးလိႈင္ဂူ (နတ္ႀကီးဂူ)

EPN

ဗန်းမော်၊ မေလ ၁၆

နမ်တီးလှိုင်ဂူ (နတ်ကြီးဂူ) သည် ကချင်ပြည်နယ်၊ ဗန်းမော်ခရိုင်၊ ဗန်းမော်မြို့နယ်၊ မြစေတီကျေးရွာ အုပ်စု ဧရာဝတီမြစ်၏ ပထမမြစ်ကျဉ်း အတွင်း၌ တည်ရှိသည်။ မြောက်ဘက်တွင် ဆင်ဘိုမြို့၊ တောင်ဘက်တွင် ရှပ်ရှားဘုန်းတော်ကြီးကျောင်း၊ အနောက်ဘက်တွင် ဧရာဝတီမြစ်၊ အရှေဘက်တွင် ဒေါ့ဖုန်ယန်မြို့နယ်ခွဲရှိသည်။

နမ်တီးလှိုင်ဂူသည် ဧရာဝတီမြစ်ဆိပ်ကမ်းနှင့် ၃ ဖါလုံခန့်ဝေးပြီး ခြေလျင်ခရီးဖြင့် သွား၍ရသည်။ မြစ်ဆိပ်ကမ်းပေါ်တွင် “နမ်တီးဂူ” ဆိုင်းဘုတ်ရှိသည်။ နမ်တီးလှိုင်ဂူ ဒေသတွင် ယခင်က ကျေးရွာ ရှိခဲ့ဖူးသည်။ ယခုအခါ ရွာပျက်သွားပြီး အနီး၌ တောင်ယာလုပ်ကိုင်သော တဲအနည်းငယ်မျှသာ တော့ရှိ သည်။ နမ်တီးဂူ၌ ဘုန်းတော်ကြီးကျောင်းတစ်ကျောင်း ရှိသည်။ လူနေအိမ်များမရှိ၍ ဆွမ်းဟင်း ခက်ခဲ သည်။ အစားအသောက်ရှားပါးသည်။ မြစ်ဆိပ်ကမ်းနှင့်လည်းအနဲငယ် ဝေးကွာသည်။ ထိုကြောင့် ကျောင်းထိုင်ရှိသော်လည်း ရဟန်းသံဃာမမြဲပေ။ ကျောင်းနှင့် လှိုင်ဂူ ပတ်ဝန်းကျင်တွင်လည်း တော၊ တောင် ထူထပ်လျှက်ရှိသည်။

မြစ်ဆိပ်ကမ်း မှ လမ်းလျှောက်သွားလျှင်ဦးစွာ ဘုန်းတော်ကြီးကျောင်းတိုက်တွေ့ရပေမည်။ ကျောင်း အနီးတွင် တောင်မှမြောက်သို့ စီးဆင်းသည့် စမ်းချောင်းငယ်ရှိသည်။ ရေဆိပ်မှ သွားလျှင် စမ်းချောင်း ငယ်၏ ဝဲ၊ ယာတစ်ဖက်တစ်ချက်တွင် လှိုင်ဂူတစ်လုံးစီရှိသည်။ လက်ျာဖက်က လှိုင်ဂူသည် ကြီးသည်။ နက်သည်။ ကျောက်ခဲချလိုက်လျှင်တောင်ဘာအသံမှ မကြားရဘူးဟု လှိုင်ဂူသို့ရောက်ဖူးသူများက ဆို၏ ။

စမ်းချောင်းမှ လက်ဝဲဖက်ရှိ လှိုင်ဂူပေါ်သို့ တက်ကြရသည်။ အမြင့်ပေ ၄၀ ကျော် ပေ ၅၀ဝန်းကျင် ရှိသည်။ မတ်စောက်သည်။ လှိုင်ဂူဝသို့လွယ်ကူစွာ တက်ရောက်နိုင်ရန်အတွက် ကျောက်တုံး များဖြင့် အတက်အဆင်းလမ်းပြုပြင်ထားသည်။ လှိုင်ဂူဝ ရောက်ခါနီးတွင် ဝဲဖက်၌ ဘုရားရုပ်ပွားတော်တစ်ဆူ တည်ထားသည်။ ဆက်၍တက်လျှင် လှိုင်ဂူဝသို့ရောက်၏ ။ လှိုင်ဂူအဝ ရှေ့ကုန်းမြင့်ပေါ်တွင်စေတီ ငယ်တစ်ဆူ တည်ထားသည်။ လှိုင်ဂူများသည်ကျောက် လှိုင်ဂူကြီး ဖြစ်သည်။ လှိုင်ဂူအဝ ကျောက်နံရံတွင် “နတ်ကြီးဂူ”စာတန်းရေးထားသည်။ နတ်ကြီးဂူမှ ကာလရွေလျားလာသည့်အခါ “နမ်တီးဂူ” ဖြစ်လာသည်ဟု သိရှိရကြောင်း ညောင်ပင်သာကျောင်းတိုက် မှ ဦးဝိမလ က မိန့်ကြားခဲ့သည်။

လှိုင်ဂူအဝ ရောက်လျှင် ဂူအတွင်းသို့ဝင်နိုင်ရန်အပေါက် ၂ ပေါက် ရှိသည်။ ဂူအတွင်းမျက်နှာကျက်၌ ကျောက်ပန်းဆွဲ များရှိ၏၊ လက်ယာဖက်အပေါက်တွင် ဘုရားရုပ်ပွားတော်များရှိသည်။ ဘုရားဖူးလာသူများကဆီမီး။ ပန်း၊ ရေချမ်းကပ်ကြ၏။ လက်ဝဲဖက်အပေါက် တိုင်းဝင်သွားလျှင် ဘုန်းကြီးကျောင်း ၏အရှေ့ဘက် ကျောက်တောင်ကုန်းပေါ်တွင် ပြန်ထွက်လာသည်။ ဂူအထွက် လမ်းအတိုင်းဆင်းလာလျှင် ဘုန်ကြီးကျောင်းဖက်သို့ရောက်၏ “အဆင်းလမ်းသည် အဆင်ပြေသည်” ဟု ဂူအတွင်း ဝင်ရောက်ဖူးသုူ /ကိုကျော်မင်း(ဗန်းမော်)က ပြောသည်။

လှိုင်ဂူများအတွင်း၌ လင်းနို့များရှိ၏။ စိုက်ခင်းများသုံးရန်အတွက် ဆာလာအိတ်များဖြင့် လင်းနို့ချေးများ ယူ၍ ထည့်ထားကြောင်းသိရသည်။

အဆိုပါ လှိုင်ဂူများသည် တရားဘာဝနာအားထုတ်လိုသူများအတွက် တိတ်ဆိတ် တည်ငြိမ်အေးချမ်းသာယာသော နေရာ ဖြစ်၏ ။လင်းနို့ချေးများ အမြဲရရှိသဖြင့်လယ်ယာသုံးဓါတ်မြေ သြဇာ ဝယ်သုံးစရာမလို၍ တောင်ယာလုပ်ငန်းအတွက် အဆင်ပြေ၏။ ဒေသခံများအတွက် အကျိုးပြုသော လှိုင်ဂူများဖြစ်ကြောင်းသိရသည်။

ဗန်းမော်မြို့မှ နမ်တီးဂူသို့ စက်လှေအမြန်(ရှော်တယ်)ဖြင့် သွားလျှင် အဆန် ၃ နာရီခွဲခန့်။ ရေအစုန် ၂ နာရီကျော်ကြာသည်။ စက်လှေအနှေးအမြန်။ ရာသီဥတုအလိုက် ရေယာဉ်ဆိုက်ရောက်ချိန် အနည်းငယ် ကွာခြားနိုင်သည်။ မိုးရာသီကာလ၌ မြစ်ရေတိုးခြင်း၊ မြစ်အတွင်းရေပြည့်လျှံခြင်း၊ ရေစီးသန်ခြင်း၊ စုတ်ဝဲ၊ မှုတ်ဝဲများကြောင့် စက်လှေ ရောက်ချိန် နောက်ကျတတ်သည်။

နမ်တီးလှိုင်ဂူများသည် ကျောက်လှိုင်ဂူ ဖြစ့်ခြင်း၊ ဧရာဝတီမြစ် ၏ထူးဆန်းသော ပထမမြစ်ကျဉ်း၌ ရှိခြင်း၊ မြစ်ကျဉ်းအတွင်း ၌ ကျောက်ဆိုင် ကျောက်တုံးအလှအပများရှိခြင်း ခြင်းတို့ကြောင့် နမ်တီးလှိုင်ဂူ (နတ်ကြီးဂူ)သည် တနေ့တခြား လူသိများလာသည်၊ ထင်ပေါ်ကျော်ကြားလာသည်၊

မြန်မာနိုင်ငံ၏ အထင်ကရ ဖြစ်သော ဧရာဝတီမြစ်ပထမ မြစ်ကျဉ်း၏ သဘာဝအလှအပများ ကြည့်ရှူခံစားရင်း နမ်တီးလှိုင်ဂူသို့ သွားရောက်ကာ တရားအားထုတ်ခြင်း။ လှိုင်ဂူအတွင်း ဝင်ရောက်လေ့လာခြင်း။ ဘုရားစေတီများ ဖူးမျှော်ခြင်း။ အလှုဒါန ကုသိုလ်ကောင်းမှုများ ပြုလုပ်နိုင်ကြပါစေကြောင်း ရေးသား တင်ပြ လိုက်ရ ပေသည်။

ဗန်းမော်သုခမိန်