ဧရာဝတီတိုင်းနှင့်ရခိုင်ဆက်သွယ်ထားသည့် ဂွချောင်းတံတားတည်ဆောက်ပြီးစီး၍ယာယီဖြတ်သန်း
ခွင့်ပေး
EPN
ပုသိမ် ၊ ဇူလိုင် ၂
ဧရာဝတီတိုင်းဒေသကြီးနှင့်ရခိုင်ပြည်နယ်ကို ဆက်သွယ်ထားသည့်ဂွချောင်းတံတားတည်ဆောက်မှု လုပ်ငန်းများရာနှုန်းပြည့်တည်ဆောက်ပြီးဖြစ်သည့် အတွက်ဇူလိုင် ၁ ရက်မှစတင်၍ယာယီဖြတ်သန်း သွားလာခွင့်ပေးထားကြောင်းလမ်းတံတားဦးစီးဌာန၊တံတားအထူးအဖွဲ့(၈)မှသိရသည်။
အဆိုပါ ဂွချောင်းတံတားသည်ဧရာဝတီတိုင်း ငပုတောမြို့နယ်၊ငရုတ်ကောင်းမြို့မြောက်ဘက်နှင့် ရခိုင်ပြည်နယ်ဂွမြို့နယ်ကိုတိုက်ရိုက်ဆက်သွယ်ထားသောတံတားဖြစ်ပြီးလက်ရှိမိုးတွင်းကာလ ဖြစ်နေသဖြင့် တစ်ဖက်ကမ်းသို့ ကူတို့ဖြင့်သွားလာနေရသည့်အတွက် ယာယီအသုံးပြုခွင့်ပေးထားရခြင်းဖြစ်ပြီး လတ်တလော ၃ တန်အောက်ကားများနှင့်ဆိုင်ကယ်၊ စက်ဘီးများကိုသာခွင့်ပြုထားကြောင်းသိရသည်။
”လက်ရှိတံတားတစ်စင်းလုံးရဲ့တည်ဆောက်မှုလုပ်ငန်းများရာခိုင်နှုန်းပြည့်ဆောင်ရွက်ပြီးဖြစ်တယ်။ဂွချောင်းတံတားဟာဧရာဝတီတိုင်းဒေသကြီးနဲ့ ရခိုင်ပြည်နယ်ကိုဆက်သွယ်ပေးတဲ့တံတားဖြစ်တယ်။ လတ်တလောတံတားကိုယာယီပေးဖြတ်ခွင့်ပေးထားတာ။ ပြည်သူတွေအားလုံးအကျိုးဖြစ်စေဖိုရာ သက်ဆိုင်ရာအဆင့် ပြည်ထောင်စုဝန်ကြီးတွေကို တင်ပြပြီးတော့ယာယီအသုံးပြုခွင့်ပေးထားတာပါ။”ဟု ဆောက်လုပ်ရေးဝန်ကြီးဌာန၊လမ်းတံတားဦးစီးဌာန၊တံတားအထူးအဖွဲ့ (၈)မှတာရှိသူကပြောသည်။
အဆိုပါ ဂွချောင်းတံတားတည်ဆောက်ရေးလုပ်ငန်း စီမံကိန်းကို ၂၀၁၉ခုနှစ်နိုဝင်ဘာလ ၁၉ ရက်ကစတင် ဆောင်ရွက်ခြင်းဖြစ်ပြီးငွေကျပ်သန်း ၁၉၈၀အကုန်ကျခံပြီး တည်ဆောက်ခဲ့ခြင်းဖြစ်သလိုဂွချောင်းတံတားသည် စုစုပေါင်းအရှည် ၁၃၉၈ ပေ ကိုးလက်မ၊အကျယ် ၃၀ ပေ၊ယာဉ်သွားလမ်း ၂၃ ပေ၊လူသွားလမ်း တစ်ဖတ်လျှင် ၃ပေ၊ရေလမ်းကင်းလွတ်အမြင့် ၂၀ ပေ၊ရေလမ်းကင်းလွတ် အကျယ် ၈၅ ပေ၊ယာဉ်တစ်စီးချင်းခွင့်ပြုတန်ချိန် ၇၅ တန်သံကူကွန်ကရစ်တံတားအမျိုးအစားဖြစ်ကြောင်း သိရသည်
သူရ