ဆယ်လ်ဖီရိုက်ရင်း ပြုတ်ကျခဲ့သည့် ဖုန်းကို ပြန်ယူရန် ရေလှောင်ကန် ရေနှုတ်ဖို့ အမိန့်ပေးခဲ့သည့် အိန္ဒိယအရာရှိ ရာထူးမှ ရပ်ဆိုင်းခံရ

EPN

နိုင်ငံတကာ၊ မေ ၂၉

အိန္ဒိယတွင် ဆယ်လ်ဖီရိုက်နေစဉ် ပြုတ်ကျခဲ့သော ၎င်း၏ စမတ်ဖုန်းကို ပြန်လည်ရယူရန်အတွက် ရေလှောင်ကန်ကို ရေနှုတ်ရန် အမိန့်ပေးခဲ့သည့် အိန္ဒိယရှိ အစိုးရအရာရှိတစ်ဦး အလုပ်မှ ရပ်ဆိုင်းခံလိုက်ရသည်။

အိန္ဒိယအလယ်ပိုင်း ချာတ်စ်ဂါ ပြည်နယ်ရှိ ခေခါတာ ရေကာတာတွင် အစားအသောက်စစ်ဆေးရေးမှူး ရာဂျီဗစ်ရှ်တာက ၎င်း၏ Samsung စမတ်ဖုန်းကို ပြီးခဲ့သည့်အပတ်က ပြုတ်ကျခဲ့ကြောင်း The Times of India သတင်းစာက ဖော်ပြခဲ့သည်။

ရာဂျီဗစ်ရှ်တာ သည် စက်ပစ္စည်းတွင် အရေးကြီးသော အစိုးရဒေတာများပါရှိသည်ဟု ဆိုကာ ဒေသခံရေငုပ်များအား ပထမဆုံး တောင်းဆိုခဲ့သော်လည်း မအောင်မြင်ခဲ့သည့်အတွက် ဒီဇယ်ပန့်များကို အသုံးပြုကာ ရေလှောင်ကန်ကို ရှင်းထုတ်ရန် တောင်းဆိုခဲ့သည်။

အိန္ဒိယနိုင်ငံ၏ ပူပြင်းသောနွေရာသီတွင် အနည်းဆုံး ဧက ၁,၅၀၀ ကို ရေသွင်းရန် လုံလောက်သည့် ရေလှောင်ကန်မှ ရေ လီတာ ၂ သန်းကျော်ကို သုံးရက်အတွင်း စုပ်ထုတ်ခဲ့ကြောင်း ဒေသဆိုင်ရာ မီဒီယာများက ဖော်ပြခဲ့သည်။

၎င်း၏ စမတ်ဖုန်းကို နောက်ဆုံးတွင် ပြန်လည်ရယူခဲ့သော်လည်း ရေနစ်သွားသောကြောင့် ပြန်လည် အသုံးပြုနိုင်ခြင်းမရှိသလို ရေအရင်းအမြစ်များကို ဖြုန်းတီးခြင်းအတွက် ကျယ်ကျယ်ပြန့်ပြန့် ဝေဖန်ခံရပြီးနောက်တွင် အာဏာပိုင်များက ရာဂျီဗစ်ရှ်တာ ကို ရပ်ဆိုင်းခဲ့သည်။

အိန္ဒိယနိုင်ငံသည် ရေကို အလေးအနက်ထားဆုံးနိုင်ငံများထဲမှ တစ်နိုင်ငံဖြစ်ပြီး အပူချိန်လွန်ကဲမှုကြောင့် ရေရှားပါးမှုဖြစ်ပေါ်ကာ သီးနှံဆုံးရှုံးမှုများ၊ တောမီးလောင်ကျွမ်းမှုနှင့် လျှပ်စစ်မီးပြတ်တောက်မှုများ ဖြစ်ပေါ်လေ့ရှိသည်။

ref ; AP