ဖားကန့်တွင် ဘိလပ်မြေဈေး ကျဆင်းလာသည့်အတွက် ဝယ်လိုအားကောင်း
EPN
မြစ်ကြီးနား၊ ဇွန် ၂၉
ကချင်ပြည်နယ်၊ ဖားကန့်မြို့တွင် ဘိလပ်မြေဈေး ကျဆင်းလာသည့်အတွက် ဝယ်လိုအားကောင်းနေကြောင်း ဘိလပ်မြေရောင်းဝယ်သူများထံမှ သိရသည်။
ယခုရက်ပိုင်း အောက်ပိုင်းမှ ဝယ်ယူရသည့် ဘိလပ်မြေဈေးမှာ အနည်းငယ်ကျဆင်းလာသည့်အတွက် ဖားကန့်မြို့တွင်လည်း ဈေးနှုန်းချပြီး ရောင်းချပေးနေကြောင်း ဘိလပ်မြေ ရောင်းဝယ်သူတစ်ဦးက ပြောသည်။
” အခုတလော အောက်ပိုင်းကနေဝယ်တဲ့ဈေးက ပုံမှန်ထက်ဈေးကျလာလို့ ဒီမှာလည်း ဈေးလျှော့ပြီး ရောင်းရတာပေါ့။ အများကြီးကျသွားတာတော့ မဟုတ်ဘူး။ ဘိလပ်မြေစျေးက တစ်အိတ်ကို နှစ်ထောင်ဝန်းကျင်လောက် စျေးကျသွားတယ်။ ဒီလောက်လေးကျရင်လည်း အများကြီးဝယ်တဲ့ခါ ဈေးအများကြီးသက်သာ တော့ အရင်ကထက် ပိုဝယ်ကြတာပေါ့ ” ဟု ၎င်းကဆိုသည်။
လက်ရှိတွင် ( Alpha ) ဘိလပ်မြေတစ်အိတ်လျင် (၁၅၀၀၀) ကျပ်မှ (၁၄၀၀၀) ကျပ်သို့ဈေးနှုန်းကျဆင်းပြီး၊ (Crown) ဘိလပ်မြေ တစ်အိတ်လျင် (၁၇၀၀၀) ကျပ်မှ (၁၅၀၀၀) ကျပ်သို့ ဈေးကျသွားကြောင်း သိရပြီး အဆိုပါ ဘိလပ်မြေများကို ဆိုင်းတောင်၊ ဖားကန့်၊ လုံးခင်း တစ်လျှောက်မှ လာရောက်ဝယ်ယူကြကြောင်း သိရသည်။
သံလွင်