ကချင်အထူးဒေသ (၁) မြစ်ကြီးနားဆက်ဆံရေးရုံး မိသားစုမှ သီရီပျံချီ ဝဏ္ဏကျော်ထင် ဦးဇခုန်တိန့်ယိန်းအား အမှူးထား၍ ကျွန်းပင်သာ ပရဟိတကျောင်း တိုက်တွင် နေ့ဆွမ်းနှင့် ဝတ္ထုငွေများ ဆက်ကပ်လှူဒါန်း
EPN
မြစ်ကြီးနား၊ ဖေဖော်ဝါရီ ၂၄ (၂၀၂၄)
ကချင်ပြည်နယ်၊ မြစ်ကြီးနားမြို့၊ ကျွန်းပင်သာရပ်ကွက်ရှိ ကျွန်းပင်သာပရဟိတကျောင်းတိုက်တွင် ကချင်အထူးဒေသ (၁)၊ ထာဝရငြိမ်းချမ်းရေးအဖွဲ့ချုပ် ဥက္ကဌကြီး သီရီပျံချီ၊ ဝဏ္ဏကျော်ထင် ဦးဇခုန်တိန့်ယိန်းအား အမှူးထားကာ မြစ်ကြီးနားဆက်ဆံရေးရုံး မိသားစုများက (တပို့တွဲလပြည့်နေ့) ဖေဖော်ဝါရီလ ၂၄ ရက်နေ့၊ နံနက် ၁၀ နာရီ အချိန်ခန့်တွင် နေ့ဆွမ်းနှင့် ဝတ္ထုငွေများကို ဆက်ကပ်လှူဒါန်းခဲ့ကြောင်း သိရသည်။
ရှေးဦးစွာ အခမ်းအနားတွင် ဆက်ဆံရေးရုံးမိသားစုများဖြစ်ကြသည့် ဦးခင်မောင်ကျော်၊ ဦးယော်ယိန်း၊ ဦးတွမ်ပီချင်း၊ ဦးကျန်းလော့ခွင်းနှင့် ကြွရောက်လာကြသူများက ဩကာသကန်တော့ချိုးဖြင့် ရှိခိုးကန်တော့ခဲ့ကြပြီး၊ ဆရာတော်များထံမှ ၈ပါးသီလနှင့် ပရိတ်တရားတော်များကို နာယူခဲ့ကြသည်။
ယင်းနောက် ကျွန်းပင်သာ ပရဟိတကျောင်းတိုက် ဆရာတော်ထံမှ အနုမောဒနာ တရားတော်များကို ခံယူဆောက်တည်ခဲ့ကြကာ ဆရာတော်များအား နေ့ဆွမ်းနှင့် ဝတ္တုငွေများကို ကပ်လှူပူဇော်ခဲ့ကြသည်။
ဆက်လက်ပြီး လှူဖွယ်အစုစုတို့အတွက် ရေစက်သွန်းချ အမျှပေးဝေခဲ့ကြကာ ကျွန်းပင်သာ ပရဟိတကျောင်းရှိ ဘုရားကြီးအတွက် မတည်ငွေ (၅၀၀၀၀)ကျပ်ကို လှူဒါန်းပေးခဲ့ပြီး၊ အဆိုပါ ဘုရားကြီးအတွက် လပြည့်၊ လကွယ် နေ့များတွင် လစဥ်ဆက်လက် လှူဒါန်းပေးသွားမည်ဖြစ်ကြောင်း သိရသည်။
ယင်းနောက် အလှူရှင်များမှ ဂေါပဃအဖွဲ့များ၊ ဝေယျာဝိစ္စအဖွဲ့များနှင့် ဥပုသ်ဆောက်တည်ကြသည့် အဖွဲ့များကို အလှူငွေများ ပေးအပ်ခဲ့ကြပြီး၊ ကြွရောက်လာကြသည့် ဧည့်သည်တော်များနှင့် ကျွန်းပင်သာ ပရဟိတကျောင်းမှ မိဘမဲ့ ကလေးငယ်များကို နေ့လယ်စာဖြင့် ကျွေးမွေးဧည့်ခံခဲ့ကြောင်း သိရသည်။
ကချင်ပြည်နယ်အထူးဒေသ (၁)၊ ထာဝရငြိမ်းချမ်းရေးအဖွဲ့ချုပ် ဥက္ကဋ္ဌကြီး သီရိပျံချီ၊ ဝဏ္ဏကျော်ထင် ဦးဇခုန်တိန့်ယိန်းအား အမှူးထားပြီး ကချင်အထူးဒေသ (၁) မြစ်ကြီးနား ဆက်ဆံရေးရုံး မိသားစုများမှ တန်ဆောင်မုန်းလကွယ်နေ့မှ စတင်ပြီး နယုန်လကွယ်နေ့အထိ လပြည့်၊ လကွယ်နေ့များတွင် ကျွန်းပင်သာပရဟိတ ဘုန်းတော်ကြီး ကျောင်းတွင် သီတင်းသုံးနေထိုင်တော် မူကြသည့် ဆရာတော်၊ သံဃာတော်များကို နေ့ဆွမ်း ဆက်ကပ်လှူဒါန်းခြင်းနှင့် ပရဟိတကျောင်းတွင်ရှိသည့် ဝေယျာဝိစ္စအဖွဲ့များနှင့် မိဘမဲ့ကျောင်းသားလေးများအား အဟာရဒါန ကျွေးမွေးလှူဒါန်းမှုများကို လုပ်ဆောင်သွားမည်ဖြစ်ကြောင်း သိရသည်။
သံလွင်
