ဆိုင်ကလုန်းမုန်တိုင်း “အမ်ဖန်” တိုက်ခတ်မှုကြောင့် အိန္ဒိယနှင့် ဘင်္ဂလားဒေ့ရှ်တွင် လူ ၂၄ ဉီးထက်မနည်း သေဆုံး

အိန္ဒိယနိုင်ငံအရှေ့ပိုင်း ကိုးလ်ကတ္တားမြို့မှာ အင်အားအလွန်ပြင်းထန်သော ဆိုင်ကလုံးမုန်တိုင်း “အမ်ဖန်” တိုက်ခတ်မှုကြောင့် ဖွတ်ဖွတ်ညစ်ကျေသွားခဲ့ကြောင်း သိရသည်။

ယမန်နေ့က အိန္ဒိယနိုင်ငံအရှေ့ပိုင်းနှင့် ဘင်္ဂလားဒေ့ရှ်နိုင်ငံတွင် ဆိုင်ကလုံးမုန်တိုင်း “အမ်ဖန်” တိုက်ခတ် ခဲ့ရာ လူ ၂၄ ဉီးထက်မနည်း သေဆုံးခဲ့ပြီး ကမ်းရိုးတန်းဒေသများတွင် မိုးသည်းထန်စွာ ရွာသွန်းမှုဖြစ်စေခဲ့သည်။
ကိုးလ်ကတ္တားမြို့တော်နေ ပြည်သူ ၁၄ သန်းမှာ လျှပ်စစ်မီးမရရှိဘဲ အနောက်ဘင်ဂေါပြည်နယ် ဝန်ကြီး ချုပ် မန်မာတာဘာနာဂျီးက ထိခိုက်ပျက်စီးမှုမှာ ကိုဗစ်-၁၉ ရောဂါထက် ပိုမိုများပြားကြောင်း ပြောကြားခဲ့သည်။
ကိုရိုနာဗိုင်းရပ်စ် ကူးစက်မှု ၃၁၀၀ ကျော်ဖြစ်ပွားရာ ကိုးလ်ကတ္တားမြို့မှာ အနောက်ဘင်ဂေါပြည်နယ်၏ မြို့တော်ဖြစ်သည်။ “စစ်ပွဲတစ်ပွဲလို အခြေအနေမျိုးကို ဒီနေ့ ကျွန်မ ကြုံတွေ့ခဲ့ရပါပြီ” ဟု ဘာနာဂျီးက ပြောသည်။

အနောက်ဘင်ဂေါပြည်နယ်တွင် ဆိုင်ကလုံးမုန်တိုင်း “အမ်ဖန်” တိုက်ခတ်မှုကြောင့် လူ ၁၂ ဉီး သေဆုံးခဲ့ ပြီး ခရိုင်သုံးခုမှာ အဆိုးရွားဆုံးခံခဲ့ရသည်။ မုန်တိုင်းဘေးသင့် ဒေသအချို့တွင် ဖုန်းလိုင်းမမိကြောင်း သိရသည်။
ဒေသန္တရ သတင်းကွန်ရက်များတွင် အမြစ်ပြုတ်နေသည့်သစ်ပင်များ၊ လဲကျနေသည့် မီးတိုင်များနှင့် မီး ပွိုင့်များကို ပြသနေသလို ရေလွှမ်းမိုးနေသည့်လမ်းမများ၊ လဲကျနေသော သစ်ပင်များအောက် ရောက်ရှိနေသည့် မော်တော်ကားများ၊ ကျိုးပျက်နေသည့် မြစ်ဆိပ်များကိုလည်း ဖော်ပြခဲ့ကြသည်။
ကိုရိုနာဗိုင်းရပ်စ် ကန့်သတ်ချက်များက အရေးပေါ်ကယ်ဆယ်ရေး လုပ်ငန်းများကို အနှောင့်အယှက်ဖြစ် စေသည်။ တစ်ဉီးနှင့်တစ်ဉီး ခပ်ခွာခွာနေရသည့် အစီအမံများကြောင့် အာဏာပိုင်များအတွက် ပြည်သူများကို ဘေးလွတ်ရာရွှေ့ပြောင်းရာတွင် အခက်အခဲဖြစ်စေပြီး မုန်တိုင်းရှောင်စခန်းများကိုလည်း အပြည့်အဝ အသုံးမပြု နိုင်ပေ။

“အမ်ဖန်” မှာ ၁၉၉၉ ခုနှစ်နောက်ပိုင်း ဘင်္ဂလားပင်လယ်အော်အတွင်း အင်အားအပြင်းထန်ဆုံး စူပါ ဆိုင် ကလုန်းမုန်တိုင်းဖြစ်သည်။ “အမ်ဖန်” မုန်တိုင်း တိုက်ခတ်မှုများ အရှိန်လျှော့ကျသွားပြီဖြစ်သော်လည်း အလွန် အင်အားပြင်းထန်သော ဆိုင်ကလုံးမုန်တိုင်းတစ်ခုအဖြစ် သတ်မှတ်ထားဆဲဖြစ်သည်။

–ကိုးကား–
ဘီဘီစီ
Ref; Amphan: Indian city of Kolkata devastated by cyclone