ဧရာဝတီတိုင်းတွင် တရားမဝင် တင်သွင်းလာသည့် ပုဇွန် နှစ်ကောင် တံဆိပ် စားသုံးဆီရောင်းချပါက အရေးယူမည်ဟုဆိုကာ လိုက်လံစစ်ဆေးနေ
EPN
ပုသိမ် ၊ သြဂုတ်၊ ၁၉
ဧရာဝတီတိုင်းဒေသကြီးတွင် တရားမဝင် တင်သွင်းလာသည့် ပုဇွန်နှစ်ကောင်တံဆိပ်ပါ စားသုံးဆီများရောင်းချ ပါက အရေးယူမည်ဟုဆိုကာ သြဂုတ် ၁၉ ရက်မနက် ပိုင်းကစတင်ပြီး လိုက်လံစစ်ဆေး သတိပေးခြင်းများ လုပ်ဆောင်နေကြောင်း ဧရာဝတီတိုင်းရှိစားသောက်ကုန် ပစ္စည်းရောင်းချသည့် ဆိုင်များထံမှ သိရသည်။
ဧရာဝတီတိုင်းဒေသကြီးအတွင်း ကျောင်းကုန်း၊ ပုသိမ်၊ ဟင်္သာတ ၊ဖျာပုံ၊ ရေကြည် ၊ ငပုတော ၊ အိမ်မဲ ၊ ကျုံပျော် ၊စသည့်မြို့နယ်များရှိ စားသောက်ကုန်ပစ္စည်းများ ရောင်းချသည့်ဆိုင်များကို ပုဇွန်နှစ်ကောင်တံဆိပ်ပါသည့် စားသုံးဆီ များရောင်းချခြင်းရှိ၊ မရှိနှင့်ရောင်းချပါကအရေးယူမည်ဟုဆိုကာ ပူးပေါင်းစစ်ဆေးရေး အဖွဲ့က သတိပေးစစ်ဆေးနေခြင်းဖြစ်သည်။
”ရဲတွေ နဲ့ စစ်သားတွေ ပါတဲ့အဖွဲ့က လာစစ်ဆေးတာ ၊ ပုဇွန်နှစ်ကောင် တံဆိပ်ပါတဲ့ စားသုံးဆီကိုမရောင်းချဖို့ လာစစ်တာ ၊ တရားမဝင် တင်သွင်းတဲ့ဆီဖြစ်တဲ့အတွက် မရောင်းဖို့ပြောသွား တယ် ၊ ရောင်းတာတွေ့ရင်လည်း ဖမ်းဆီး အရေးယူမယ် တဲ့ ၊ စားသောက်ကုန်ရောင်းချတဲ့ဆိုင်တွေကိုဘဲ သီးသန့်စစ်ဆေးတာပါ စားဆီတွေကို ဈေးတက်ရောင်းတာမလုပ်ဖို့လည်းပြောသွားတယ်။”ဟု ငပုတောမြို့ရှိ စားသောက်ကုန်ပစ္စည်းရောင်းဝယ်ရေး လုပ်ငန်းရှင်တစ်ဦးကပြောသည်။
ဒေသအလိုက်ပူးပေါင်း စစ်ဆေးသတိပေးသည့် အဖွဲ့များတွင် မြို့နယ်စီမံအုပ်ချုပ်ရေးအဖွဲ့၊ မြို့နယ်ရဲတပ်ဖွဲ့၊ စည်ပင်သာယာရေးအဖွဲ့ ၊ မီးသတ်တပ်ဖွဲ့ ၊ စစ်တပ်၊ လူဝင်မှုကြီးကြပ်ရေးဌာန၊စားသုံးသူရေးရာဌာန၊ သစ်တောဦးစီးဌာနနှင့် မြို့နယ်အဆင့်တာဝန်ရှိသည့်အဖွဲ့အစည်းများပါသည့် စစ်ဆေးရေးအဖွဲ့ကစစ်ဆေးခဲ့ခြင်းဖြစ်ကြောင်း သိရသည်။
”တရားမဝင် ကုန်စည်ဖြစ်လို့မရောင်းဖို့ စစ်ဆေး သတိပေးတာပါ ၊ ဆီဆိုင်တချို့မှာတော့ ရောင်းနေတာ တွေ့ရတယ် ပထမဆုံး စစ်ဆေးတာမို့ သတိပေးခဲ့တယ်နောက်တစ်ကြိမ် သင့်လျော်သလိုကွင်းဆင်းစစ် ဆေးတဲ့အခါ တွေ့ရရင် အရေးယူမှာဖြစ်တယ်။”ဟု ပူးပေါင်းစစ်ဆေးရေး အဖွဲ့မှတာဝန်ရှိသူ တစ်ဦးကပြော သည်။
ဧရာဝတီတိုင်းတွင် ပြီးခဲ့သည့် တစ်ပတ်ကလည်း စက်သုံးဆီရောင်းချတဲ့ဆိုင်များအား ဆီဆိုင်မပိတ်ရန်နှင့် ဈေးတင်ရောင်းချခြင်းများ မပြုလုပ်ရန် အကန့်အသတ်ဖြင့် ရောင်းချခြင်းမျာ းမပြုလုပ်ရန် ပူးပေါင်းအဖွဲ့များက လိုက်လံစစ်ဆေး သတိပေးခြင်းများ လုပ်ဆောင်ခဲ့သေးကြောင်း သိရသည်။
သူရ