ဆူးလေ လူကူးကုန်းကျော်တံတားအောက် ပေါက်ကွဲမှုဖြစ်၊ ပလုံကောက်ကလေးငယ် (၅)ဦး ထိခိုက်ဒဏ်ရာရ
EPN
ရန်ကုန်၊ မတ် ၂၈ (၂၀၂၄)
ရန်ကုန်မြို့လယ်ရှိ ဆူးလေ လူကူးကုန်းကျော်တံတားအောက်တွင် ယမန်နေ့ (မတ် ၂၇ ရက်)၊ ညပိုင်းက ပေါက်ကွဲမှုဖြစ်စဥ်ဖြစ်ပွားခဲ့ရာ ပလုံကောက်ကလေးငယ် (၅)ဦး ထိခိုက်ဒဏ်ရာ ရရှိခဲ့ကြောင်း လုံခြုံရေးအဖွဲ့နှင့် နီးစပ်သူများ၊ လူမှုကူညီရေး အသင်းဝင်များထံမှ သိရသည်။
ယမန်နေ့၊ ည ၇ နာရီခွဲကျော်ခန့်က ရန်ကုန်မြို့လယ် ကျောက်တံတားမြို့နယ်ရှိ ဆူးလေ လူကူးကုန်းကျော်တံတားအောက်တွင် ပလုံကောက်ကလေးငယ်များသည် ကြွတ်ကြွတ်အိတ်အမည်းရောင်တစ်လုံးအား ဆွဲထုတ်စဥ် အထုတ်အတွင်းမှ ပေါက်ကွဲမှု ဖြစ်ပွားခဲ့ခြင်းဖြစ်ကြောင်း သိရသည်။
” ပလုံကောက်ကလေးတွေက ကြွတ်ကြွတ်အိတ် အမည်းတစ်လုံးကို ဆွဲထုတ်နေတုန်း အိတ်ထဲကနေ ပေါက်ကွဲသွားတာလို့ သိရတယ်။ ကလေး (၅) ယောက်ဒဏ်ရာရတယ်။ အကြီးဆုံးကလေးက (၁၇)နှစ်ပဲရှိသေးတယ်။ စိုးရိမ်ရတဲ့ အနေအထားတွေရှိတယ်။ လိုအပ်တဲ့ စစ်ဆေးတာတွေ လုပ်နေပါတယ် ” ဟု လုံခြုံရေးအဖွဲ့နှင့် နီးစပ်သူတစ်ဦးက ပြောသည်။
ပေါက်ကွဲမှုကြောင့် ဖြိုးထက်ပိုင် (၁၇)နှစ်၊ ဖိုးသောကြာ (၁၆)နှစ်၊ ကျော်ကျော် (၁၄)နှစ်၊ ဖိုးလပြည့် (၁၁)နှစ်နှင့် စန်ဂျေပါး (၁၁)နှစ်တို့တွင် ထိခိုက်ဒဏ်ရာများ (စိုးရိမ်ရနှင့်မစိုးရိမ်ရ)များ ရရှိခဲ့သဖြင့် လူမှုကူညီရေး အသင်းဝင်များက ရန်ကုန်ပြည်သူ့ဆေးရုံကြီးသို့ ပို့ဆောင်ပေးခဲ့ကြောင်း သိရသည်။
” ရန်ကုန်မှာဖြစ်တဲ့ ပေါက်ကွဲမှုဖြစ်စဥ်တိုင်းမှာ ထိခိုက်ဒဏ်ရာရတဲ့လူတွေက ပြည်သူတွေပဲ။ အခုဖြစ်စဥ်မှာဆိုရင် ပလုံကောက်တဲ့ကလေးတွေ ဒဏ်ရာရတယ်။ သူတို့လေးတွေက မိသားစုစားဝတ်နေရေးအတွက် ပလုံကောက်ပြီး ရှာဖွေနေကြတာ။ အခုလို ထိခိုက်သွားတော့ ပေါက်ကွဲမှုဖြစ်အောင်လုပ်တဲ့ လူတွေက တာဝန်ယူမှာလား။ လုံးဝတာဝန်မယူဘူး။ သူတို့ပြောနေတဲ့ စကားလုံးတွေနဲ့ လုပ်ရပ်တွေက တခြားစီပဲ။ အခုလို ဖြစ်စဥ်မျိုးတွေကြောင့် ဒုက္ခရောက်နေကြတဲ့ ပြည်သူတွေ အများကြီးပဲ။ မဖြစ်သင့်တဲ့လုပ်ဆောင်ချက်တွေပါ ” ဟု နိုင်ငံရေးလေ့လာ သုံးသပ်သူတစ်ဦးက ပြောသည်။
၎င်းအပြင် ပြစ်မှုကျူးလွန်သူများအား ဖမ်းဆီးရမိရေးနှင့် ဥပဒေအရ ထိရောက်စွာအရေးယူနိုင်ရေးတို့အတွက် လုံခြုံရေးအဖွဲ့ဝင်များက စုံစမ်းစစ်ဆေးမှုများ ပြုလုပ်လျက်ရှိကြောင်း သိရသည်။
ကျော်စိုးသူ