ရှင်ဗွေယန်သွားလမ်းတွင် ဟန်းဂေါပိုက်လုံးတန်းများကို တူးဖော်ခိုးယူမှုကြောင့် လမ်းများပျက်စီးနေ
EPN
မြစ်ကြီးနား၊ ဇွန် ၂၈
ကချင်ပြည်နယ်၊ တနိုင်းခရိုင်၊ ရှင်ဗွေယန်မြို့သွားလမ်းတွင် ဟန်းဂေါပိုက်လုံးတန်းများကို တူးဖော်ခိုးယူမှုကြောင့် လမ်းများပျက်စီးနေကြောင်း ဒေသခံများထံမှ သိရသည်။
ရင်ဗွေယန်မြို့သွား လမ်းမကြီးဖြစ်သော ခလုံးကျေးရွာနှင့် တခက်ကျေးရွာကြား ခတန်တံတားအကျော်နားရှိ ဟန်းဂေါပိုက်လုံးတန်းများကို တူးဖော်ခိုးယူမှုကြောင့် လမ်းများပျက်စီးနေကြောင်းဒေသခံတစ်ဦးက ပြောသည်။
“ ဘယ်သူတွေက လုပ်သွားလဲဆိုတာတော့ မသိရပေမယ့် သေချာတာကတော့ ဖိုးသမားတွေ၊ ဆေးသမားတွေပဲ ဖြစ်မှာ။ လူစိတ်ရှိတဲ့သူတွေက အများသုံးနေတဲ့လမ်းကို ဖျက်ဆီးမှာမဟုတ်ဘူး။ အခုကသူတို့ ရစရာခိုးစရာ မရှိတော့လို့ ဒီလိုတွေလုပ်ပြီး ရောင်းစားကြတာ ဖြစ်နိုင်တယ်။ တစ်ချို့မသမာသူတွေလည်းလုပ်နိုင်တာပဲ။ အခုအဲ့လို တူးသွားကြတော့ မိုးကရွာတာနဲ့ လမ်းတွေကတိုက်စားပြီး တဖြည်းဖြည်းပြိုလာပြီ။ ပြန်မပြင်ရင်တော့ အကုန်ပြိုသွားနိုင်တယ် ” ဟု ၎င်းကဆိုသည်။
လက်ရှိတွင် အဆိုပါ ပိုက်လုံးများကို တူးဖော်ခိုးယူသွားသည့်အတွက် လမ်းတစ်ခြမ်းဖြင့်သာ ယာဉ်များသွားလာနေရပြီး တန်ချိန်များသည့် ယာဉ်ကြီးများသွားလာရန် စိုးရိမ်ရကြောင်း သိရသည်။
ရှင်ဗွေယန်မြို့နယ်ရှိ ဒေသခံပြည်သူများမှာ လယ်ယာစိုက်ပျိုးခြင်းလုပ်ငန်းကိုအဓိကလုပ်ကိုင်နေကြသည့် မြို့နယ်တစ်ခုဖြစ်ပြီး ၂၀၁၄ သန်းခေါင်စာရင်းအရ လူဦးရေ (၁၁၄၅၃) ဦး နေထိုင်ကြောင်း သိရသည်။
သံလွင်