မှော်ပုံကျေးရွာရှိ PDFများ နေထိုင်ရာ နေအိမ်တစ်လုံး ဝင်ရောက်စီးနင်းခံရ
EPN
မြစ်ကြီးနား၊ စက်တင်ဘာလ ၁၄
ကချင်ပြည်နယ်၊ ဖားကန့်မြို့နယ်၊ လုံးခင်းကျေးရွာအုပ်စု၊ မှော်ပုံကျေးရွာရှိ PDF များနေထိုင်ရာ နေအိမ်တစ်လုံးကို စစ်တပ်မှ ဝင်ရောက်စီးနင်းတိုက်ခိုက်ခဲ့ပြီး အပြန်အလှန် ပစ်ခတ်မှုများ ဖြစ်ပွားခဲ့ကြောင်း ဒေသခံများထံမှ သိရသည်။
ယနေ့ စက်တင်ဘာလ ၁၄ ရက်နေ့ နံနက်ပိုင်း ၅ နာရီခွဲခန့်မှ စတင်ကာ မှော်ပုံကျေးရွာ အတွင်း သေနတ်များဖြင့် အပြန်အလှန် ပစ်ခတ်သံများ ကြားနေရပြီး ၈ နာရီခန့်တွင် သေနတ်သံများ ရပ်သွားခဲ့ကာ နေအိမ်တစ်လုံး မီးရှို့ ဖျက်ဆီးခံခဲ့ရကြောင်း မှော်ပုံရပ်ကွက် နေဒေသခံ တစ်ဦးကပြောသည်။
” မှော်ပုံမှာက PDF တွေ ရှိတယ်ဆိုပြီး ဝင်လာကြတာ ၊ အင်အားများတယ် ၁၀၀ လောက်ရှိမယ် ၊ ကျေးရွာထဲက နေအိမ်တစ်လုံးကို ဦးတည်ပြီးလာကြတာ ၊ ၅ နာရီ ခွဲက စပြီး ပစ်ခတ်နေကြတာ၊ ရပ်လိုက်ပစ်လိုက်နဲ့ ၈နာရီလောက်မှာ မှ ရပ်သွားတယ် ၊ အားလုံးငြိမ်တဲ့ ထိ အိမ်ထဲမှာပဲ နေပြီး စောင့်နေတာ ၁၀ နာရီလောက်အပြင်ထွက်ကြည့်တော့ ၊ မီးခိုးတွေ ထွက်လာတာတွေ့တယ် ၊ ကား တစ်စီး၊ နေအိမ်တစ်လုံးမီးလောင်နေတာကို တွေ့ရတယ်၊ ” ဟု ၎င်းကပြောသည်။
အဆိုပါ တိုက်ပွဲကြောင့် PDF နှစ်ဦး ထိခိုက်သေဆုံးခဲ့ပြီး နှစ်ဦးကို ဖမ်းဆီးရမိခဲ့ကာ ကားတစ်စီးနှင့် နေအိမ်တစ်လုံး မီးလောင်ပျက်စီး ဆုံးရှုံးခဲ့ရကြောင်းသိရသည်။
ယင်းတိုက်ပွဲများကြောင့် မှော်ပုံဒေသခံပြည်သူများမှာ ဆယ်ဇင်းကျေးရွာဒေသခံများကဲ့ သို့ တိုက်ပွဲတိမ်းရှောင်ရမှာကို စိုးရိမ်ကြောက်လန့်နေရကြောင်း ဒေသခံတစ်ဦးကပြောသည်။
” နိုင်ငံရေးမတည်ငြိမ်မှုကြောင့် တိုက်ပွဲတွေကြားမှာ ပြည်သူတွေ ဒုက္ခရောက်နေကြရတယ်၊ ဆယ်ဇင်းမှာဆိုလဲ တိုက်ပွဲတွေကြောင့် ဘေးလွတ်ရာပြောင်းရွှေခဲ့ရပြီး ပြည်သူတွေမှာ စားဝတ်နေရေးကအစ နေရာထိုင်ခင်းတွေပါ အဆင်မပြေကြတာတွေ့ရတယ်၊ အဲ့လိုမျိုး မှော်ပုံမှာဖြစ်မှာကိုလဲစိုးရိမ်နေရတယ်” ဟု၎င်းကပြောသည်။
အဆိုပါ တိုက်ပွဲဖြစ်ပွားခဲ့သည့် မှော်ပုံကျေးရွာ တွင် အိမ်ခြေပေါင်း ၅၀၀ ခန့်ရှိကာ လူဦးရေ ၁၅၀၀ ကျော် နေထိုင်နေကြကြောင်းသိရသည်။
ပန်ပန်