မော်လိုက်မြို့နယ်မှာ ကျောင်းထိုင်ဆရာတော် ၁ ပါး သေနတ်နဲ့ ပစ်သတ်ခံရ
EPN
မော်လိုက် ၊ မေ ၆
စစ်ကိုင်းတိုင်း ၊ မော်လိုက်မြို့နယ် ၊ တပ်ကုန်းကျေးရွာ ၊ ရွာဦးကျောင်းဆရာတော်ဟာ မနေ့က မနက် ပိုင်း ၇ နာရီက သေနတ်နဲ့ ပစ်ခတ်ခံရတဲ့အတွက် ပျံလွန်တော်မူးသွားတယ်လို့ ရွာခံတွေဆီက သိရပါတယ်။
” မနေ့က မနက်ပိုင်းမှာ ဘုန်းကြီးကျောင်းကို ဆိုင်ကယ် ၅ စီးနဲ့ လူ ၁၀ ယောက်ဝန်းကျင် သေနတ်တွေနဲ့ ရောက်လာတယ် ၊ ကျောင်းထိုင်ဆရာတော်ကို ဒလန်လို့ ပြောဆိုစွပ်စဲွဲပြီး ဖမ်းဆီးခေါ်ဆောင်သွားတယ် ၊ ကျောင်းရှေ့ရောက်တော့ ဆရာတော်ကိုယ် သေနတ်နဲ့ ဝိုင်းပစ်သတ်သွားတာ ” လို့ တပ်ကုန်းရွာခံ တစ်ယောက်က ပြောပါတယ်။
အဲ့ဒါကြောင့် သက်တော် ၅၇ နှစ် ၊ ဝါတော် ၃၀ ရှိ ကျောင်းထိုင်ဆရာတော် ဥူးဓမ္မပီယ ဟာ ကျောင်းရှေ့မှာတင် ပျံတော်မူသွားခဲ့တာဖြစ်ပါတယ်။
ဒါ့အပြင် ဘုန်းကြီးမှာ သီတင်းသုံး နေထိုင်နေတဲ့ ကျန်သံဃာတွေလည်း ကျောင်းကိုစွန့်ပစ်ထားခဲ့ရပြီး ဘေးလွတ်ရာကို အသက်လုပြီး ထွက်ပြေနေရတယ်လို့ ဒေသခံတွေဆီက သိရပါတယ်။
တပ်ကုန်းရွာဦးကျောင်း ဆရာတော် ပျံလွန်တော်မူခဲ့ရတဲ့ ကိစ္စနဲ့ ပတ်သက်ပြီး မော်လိုက် မြို့နယ်ရဲတပ်ဖွဲ့က အမှုဖွင့် စစ်ဆေးနေတယ်လို့ သိရပါတယ်။
သွန်းသွန်း