မိုးညှင်းမြို့တွင် အမျိုးသားနှစ်ဦးထံမှ ငွေကျပ်သိန်း ၁၆၀၀ ကျော် တန်ဖိုးရှိ ဘိန်းဖြူများ ဖမ်းဆီးရမိ
EPN
မြစ်ကြီးနား၊ ဇူလိုင် ၁
ကချင်ပြည်နယ်၊ မိုးညှင်းမြို့နယ်၊ နန့်စီးအောင်ပူးပေါင်းစစ်ဆေးရေးဂိတ်တွင် အမျိုးသားနှစ်ဦးထံမှ ငွေကျပ်သိန်း ၁၆၀၀ ကျော်တန်ဖိုးရှိ ဘိန်းဖြူများကို ဇွန် ၂၃ ရက်နေ့က ဖမ်းဆီးရမိခဲ့ကြောင်း မိုးညှင်းမြို့မရဲစခန်းမှ သိရသည်။
ဖြစ်စဉ်မှာ ဇွန်လ ၂၃ ရက်နေ့၊ ညနေ ၆ နာရီအချိန် မိုးညှင်းမြို့နယ်၊ နန့်စီးအောင်ပူးပေါင်းစစ်ဆေးရေးဂိတ်တွင် မန္တလေးမှ ဟိုပင်မြို့ဘက်သို့ အေးမင်းအောင်၊ မောင်းနှင်ပြီး ဦးကြည်လိုက်ပါလာသည့် CANTER ၆ ဘီး မော်တော်ယာဉ်အား မူးယစ်သတင်းအရ ရှာဖွေရာ ယာဉ်ပေါ်မှ ဒေသကာလတန်ဖိုးငွေ ကျပ်သိန်း ၁၆၀၀ ကျော်တန်ဖိုးရှိ ဘိန်းဖြူ ၆ ဒဿမ ၆ ကီလို၊ ဘိန်းစိမ်း ၂ ကီလို သိမ်းဆည်းရမိခဲ့ခြင်းဖြစ်သည်။
အဆိုပါ မူးယစ်ဆေးဝါးများကို စစ်ဆေးဖော်ထုတ်ချက်အရ သိမ်းဆည်းရမိ မူးယစ်ဆေးဝါးများအား ရှမ်းပြည်နယ်မှ ကချင်ပြည်နယ်သို့ သယ်ဆောင်ခြင်းဖြစ်ကြောင်း သိရသည်။
ယင်းကဲ့သို့ မူးယစ်ဆေးဝါးများနှင့် ပက်သက်ပြီး အေးမင်းအောင် (ခ) မင်းမင်းနှင့် ဦးကြည်အား မိုးညှင်းမြို့မရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲ စေသော ဆေးဝါးများဆိုင်ရာဥပဒေအရ အမှုဖွင့် အရေးယူထားရှိကြောင်း သိရသည်။
သံလွင်