အေးမြသာယာရပ်ကွက်တွင် တစ်ညအတွင် နေအိမ်သုံးအိမ်မှ မီးကြိုးများ အခိုးခံရ
EPN
မြစ်ကြီးနား၊ ဖေဖော်ဝါရီ ၂၉ (၂၀၂၄)
မြစ်ကြီးနားမြို့၊ အေးမြသာယာရပ်ကွက်တွင် တစ်ညအတွင်း နေအိမ်သုံးအိမ်မှ မီးကြိုးများ အခိုးခံရမှု ဖေဖော်ဝါရီ ၂၉ ရက်နေ့၊ နံနက်ပိုင်းအချိန်က ဖြစ်ပွားခဲ့ ကြောင်း သိရသည်။
အေးမြသာယာရပ်ကွက်၊ လမ်းသွယ် (၁၂)ရှိ နေအိမ်တစ်အိမ်တွင် နံနက် ၂ နာရီအချိန်၌ မီးပြတ်သွားသည့်အတွက် မသင်္ကာ၍ အိမ်အပြင်ထွက်ကြည့်ရာမှ မီးကြိုးများခွေနေသည့် အမျိုးသားတစ်ဦးကို တွေ့ရှိ သော်လည်း မီးကြိုးများထားခဲ့ပြီး ထွက်ပြေးသွားကြောင်း ခိုးခံရသည့် အိမ်ရှင်ထံမှ သိရသည်။
” မနက်ပိုင်း ၂ နာရီလောက်မှာ မီးပြတ်သွားတော့ EPC က ပြတ်တာပဲထင်တာ။ ဒါပေမယ့် အရင်နေ့တွေမှာလည်း အဲ့လိုပြတ်ပြီး မီးကြိုးတွေခိုးခံရတာ သုံးကြိမ်တောင်ရှိပြီ။ ဒါကြောင့် မင်္သကာလို့ အပြင်သွားကြည့်လိုက်တာ ကောင်လေးတစ်ယာက်က ကြိုးခွေနေတာ။ အသံလည်းကြားရော တန်းပြေးသွားတယ်။ မီးကြိုးတွေတော့ ချန်ထားတယ် ” ဟု ၎င်းကဆိုသည်။
အဆိုပါ မီးကြိုးများ ခိုးယူမှုမှာ လေးကြိမ်မြောက်ရှိပြီဖြစ်ကြောင်း သိရကာ ၎င်းနေအိမ် အပါအဝင် ဘေးအိမ်နှစ်အိမ်တွင်လည်း မီးကြိုးများ ခိုးယူခံရမှု ကြုံခဲ့ရကြောင်း သိရသည်။
ယင်းကဲ့သို့ အေးမြသာယာရပ်ကွက်တွင် မီးကြိုးများ မကြာခဏ ခိုးယူခံနေရသည့်အတွက် ရပ်ကွက် တာဝန်ရှိသူများအနေဖြင့် ရပ်ကွက်အတွင်း ဝိုင်းဝန်းကူညီကြည့်ရှုပေးရန် ရပ်ကွက်နေပြည်သူများက လိုလားနေကြောင်း သိရသည်။
သံလွင်