အင္းေတာ္ႀကီးတြင္ အမ်ိဳးသမီးတစ္ဦး ဦးေခါင္းေၾကမြ ေသဆံုးေနသည္ကုိ ေတြ႔႐ွိ

EPN

အင်းတော်ကြီး၊ မေ ၂

ကချင်ပြည်နယ်၊ မိုးညှင်းမြို့နယ်၊ အင်းတော်ကြီးမြို့၊ မိုင်းပုတ်ကျေးရွာ ပါတီကွင်းအတွင်းရှိ လူမနေသော တဲအနီး မြေပြင်တွင် အမျိုးသမီးတစ်ဦး ဦးခေါင်းကြေမွ၍ သေဆုံးနေသည်ကို မေလ ၁ရက်နေ့ မွန်းလွဲ ၃ခွဲ အချိန်ခန့်က တွေ့ရှိခဲ့သည် ဟု လုံးတုံနယ်မြေရဲစခန်းမှ သိရသည်။

ဖြစ်စဉ်မှာ အင်းတော်ကြီးမြို့၊ နန့်ပုတ်ကျေးရွာအုပ်စု၊ မိုင်းပုတ်ကျေးရွာနေ ဦးသိန်းဦးသည် ပါတီကွင်းရှိ ၎င်းလယ်တောသို့ သွားရာ အစ်ကိုတော်စပ်သူ ဦးအံ့ကျော်၏ လယ်စောင့်တဲအနီးသို့ အရောက် လယ်တောထဲတွင် အမျိုးသမီးတစ်ဦး သေဆုံးနေသည်ကို တွေ့ရှိသည်ဟု သိရသည်။

ထို့နောက် မိုင်းပုတ်ကျေးရွာတာဝန်ခံ ဦးအဲလေး (ခ)ဦးဆန်းသွင်အား အသိပေးအကြောင်းကြားခဲ့ပြီး ဦးအဲလေးမှ တဆင့် လုံးတုံနယ်မြေရဲစခန်းသို့ သတင်းပေးပို့ခဲ့သဖြင့် လုံးတုံ ရဲစခန်းမှ စခန်းမှူးရဲအုပ် နေဇာဦးနှင့်ရဲတပ်ဖွဲ့များမှ နန့်ပုတ်ကျေးရွာအုပ်စု၊ မိုင်းပုတ်ကျေးရွာနေ ရပ်မိရပ်ဖဖြစ်သော ဦးရုံးရွှေ၊ ဦးဝင်းဌေးတို့နှင့်အတူ အခင်းဖြစ်နေရာသို့ သွားရောက်စစ်ဆေးခဲ့ကြကြောင်း သိရသည်။

စစ်ဆေးတွေ့ရှိချက်အရ သေဆုံးသူသည် နန့်ပုတ်ကျေးရွာအုပ်စု၊ မိုင်းပုတ်ကျေးရွာနေ မနီနီဝင်း အသက်(၂၆)နှစ် ဆိုသူဖြစ်ပြီး လူမနေသောလယ်တဲအနီး မြေပြင်ပေါ်တွင် အနီရောင်အကွက်ကြားစောင် ခြုံလျှက် ဦးခေါင်းခွံကွဲကြေ၊ ဦးနှောက်ထွက်ကာ တုံးသောလက်နက်ဖြင့် ရိုက်နှက်ခဲ့သဖြင့် သေဆုံးလျှက်ရှိသည်ကို စစ်ဆေးတွေ့ရှိရသဖြင့် အလောင်းကို လုံးတုံတိုက်နယ်ဆေးရုံသို့ ပို့ဆောင်ပေးခဲ့ကြောင်း၊ အဆိုပါ သေဆုံးမှုနှင့် ပတ်သက်ပြီး လုံးတုံနယ်မြေရဲစခန်းမှ သေမှုသေခင်းအမှတ် ၁၂/ ၂၀၁၉၊ ရာဇသတ်ကြီး ဥပဒေပုဒ်မ (၃၀၂)ဖြင့် အမှုဖွင့်ဆောင်ရွက်လျှက်ရှိကြောင်း ရဲမှတ်တမ်းအရ သိရသည်။

၎င်းအခင်းဖြစ်နေရာသည် ကေအိုင်အေထိန်းချုပ်ရာနယ်မြေ၊ ကေအိုင်အေ တပ်ရင်း (၂၆)သွားလာတတ်သည့် နေရာလည်းဖြစ်သည့်အတွက် ယင်းနယ်မြေတပ်မ(၃၃)လက်အောက်ခံ၊ ခမရ(၁၃)နှင့် ချိတ်ဆက်ဆောင်ရွက်၍ သွားရောက်စစ်ဆေးခြင်း၊ မှတ်တမ်းဓာတ်ပုံရိုက်ကူးခြင်း၊ သက်သေအဖြစ်သိမ်းဆည်းစစ်ဆေးခြင်း ၊ မြေပုံကြမ်းရေးဆွဲခြင်း၊ သက်သေခံပစ္ဓည်း သိမ်းဆည်းခြင်း၊ ဓာတုဗေဒဝန်ရုံးသို့ ပို့အပ်စစ်ဆေးခြင်းများ ပြုလုပ်ခဲ့ပြီး၊ ပြစ်မှုကျူးလွန်သူကို အမြန်ဆုံးဖမ်းဆီးနိုင်ရေး ကြိုးပမ်းလျှက်ရှိကြောင်း လုံတုံနယ်မြေ ရဲစခန်းမှ သိရသည်။

မိုးမြင့်