တရုတ်နဲ့ ရုရှားတို့ ဂျပန်ပင်လယ်ပြင်မှာ ပူးတွဲစစ်ရေးလေ့ကျင့်မှုစတင်
EPN
နိုင်ငံတကာ၊ ဇူလိုင် ၂၁
တရုတ်နဲ့ ရုရှားတို့ဟာ ဂျပန်ပင်လယ်ပြင်မှာ ပူးတွဲရေတပ်နဲ့ လေကြောင်းစစ်ရေးလေ့ကျင့်မှုကို စတင်ခဲ့ကြောင်း တရုတ်နိုင်ငံပိုင်မီဒီယာ CCTV ဇူလိုင်လ ၂၀ ရက်နေ့က ဖော်ပြခဲ့ပါတယ်။
နှစ်ဘက်စလုံးက ရေကြောင်း၊လေကြောင်း စောင့်ကြပ်ခြင်း၊ ဟန့်တားခြင်း၊ တွန်းလှန်ခြင်းနဲ့ ကာကွယ်ရေးဆိုင်ရာ စစ်ရေးလေ့ကျင့်မှုတွေကို အဓိကထားလုပ်ဆောင်သွားမယ်လို့ CCTV က ဖော်ပြခဲ့ပါတယ်။
“ပူးတွဲစစ်ရေးလေ့ကျင့်မှုအတွင်း တရုတ်နဲ့ ရုရှားတပ်တွေရဲ့ စွမ်းရည်တွေကိုလည်း စမ်းသပ်သွားမယ်” လို့ CCTV က ထပ်လောင်းပြောကြားခဲ့ပါတယ်။
အဆိုပါစစ်ရေးလေ့ကျင့်မှုကို ဇူလိုင်လ ၂၀ ရက်နေ့ကနေ ၂၃ ရက်နေ့အထိ ပြုလုပ်သွားမှာဖြစ်ပြီး စစ်ရေးလေ့ကျင့်မှုအတွင်း စစ်သင်္ဘော ၁၀ စင်းနဲ့ လေယာဉ် အစင်း ၃၀ ကျော် ပါဝင်ကြောင်း တရုတ် ဆင်ဟွာ သတင်းဌာနက ဖော်ပြခဲ့ပါတယ်။
စစ်ရေးလေ့ကျင့်မှုရဲ့ အဓိကပန်းတိုင်ဟာ ရုရှားဖက်ဒရေးရှင်းနဲ့ တရုတ်ပြည်သူ့သမ္မတနိုင်ငံတို့ကြား ရေတပ်ပူးပေါင်းဆောင်ရွက်မှုကို ခိုင်မာစေရန်နှင့် အာရှ-ပစိဖိတ်ဒေသတွင်း တည်ငြိမ်ရေးနှင့် ငြိမ်းချမ်းရေးကို ထိန်းသိမ်းရန်ဖြစ်တယ်လို့ ဆိုပါတယ်။
ref; reuters