တောင်တွင်းကြီးမြို့၌ NLD တိုင်းကိုယ်စားလှယ် ဦးအောင်ကိုကိုအား အကြမ်းဖက်မှု ပုဒ်မဖြင့် ထပ်တိုးတရားစွဲ
EPN
တောင်တွင်းကြီး၊ ဖေဖော်ဝါရီ ၂၇ (၂၀၂၄)
မကွေးတိုင်း၊ တောင်တွင်းကြီးမြို့နယ် အမျိုးသား ဒီမိုကရေစီအဖွဲ့ချုပ် (NLD) ပါတီ၏ တိုင်းလွှတ်တော်ကိုယ်စားလှယ် ဦးအောင်ကိုကိုအား အကြမ်းဖက်မှု တိုက်ဖျက်ရေးဥပဒေဖြင့် ထပ်တိုးတရားစွဲလိုက်ကြောင်း ဒေသခံများထံမှ သိရသည်။
ဦးအောင်ကိုကိုအား ၂၀၂၃ ခုနှစ်၊ မေလ ၉ ရက်နေ့က ရန်ကုန်မြို့၊ ထောက်ကြန့် စစ်သင်္ချိုင်းအနီး စစ်ဆေးရေးစခန်းတွင် ဖမ်းဆီးခံခဲ့ရပြီး၊ ဆူပူလှုံ့ဆော်မှု ရာဇသတ်ကြီး ဥပဒေပုဒ်မ ၅၀၅ – ကဖြင့် မေလ ၃၀ ရက်က ထောင်သုံးနှစ် ချမှတ်ခဲ့ကြောင်း သိရသည်။
ယင်းကဲ့သို့ ထောင်သုံးနှစ် ချခံရပြီး ကိုးလအကြာ ၂၀၂၄ ခုနှစ်၊ ဖေဖော်ဝါရီ ၂ ရက်က အကြမ်းဖက်မှု တိုက်ဖျက်ရေး ဥပဒေ ဖြစ်သည့် ပုဒ်မ ၅၀ (က)၊ ၅၀ (ည)၊ ၅၀ (ဈ)တို့ဖြင့် ထပ်တိုးတရားစွဲခံထားရကြောင်း မိသားစုဝင် တစ်ဦးကပြောသည်။
“ မနေ့ကမှ သိရတာပါ။ ဆရာ့ကို ထပ်တိုး တရားစွဲထားတယ်။ ဘာကြောင့် ဒီလို ထပ်တိုးပုဒ်မတွေနဲ့ တရားစွဲတာလည်းတော့ မသိရသေးဘူး။ အခုက အင်းစိန် အကျဉ်းထောင်မှာပဲ။ ရှေ့နေငှားခွင့် ရတယ် ” ဟု ၎င်းကပြောသည်။
ဦးအောင်ကိုကိုသည် အသက် ၄၃ နှစ်အရွယ်ရှိပြီးဖြစ်ပြီး ၂၀၂၀ ပြည့်နှစ်၊ အထွေထွေ ရွေးကောက်ပွဲတွင် NLD ပါတီ၏ မကွေးတိုင်း၊ တောင်တွင်းကြီးမြို့နယ်၊ မဲဆန္ဒနယ်အမှတ် (၁)က ဝင် ရောက်ယှဉ်ပြိုင်ခဲ့သူဖြစ်ပြီး၊ မကွေးတိုင်း လူငယ်လုပ်ငန်းအဖွဲ့နှင့် တောင်တွင်းကြီးမြို့နယ် NLD လူငယ်လုပ်ငန်းအဖွဲ့ တွဲဖက် တာဝန်ခံတစ်ဦးဖြစ်ကြောင်း သိရသည်။
အလင်း