တနိုင်းမြို့တွင် လမ်းဖြတ်ကူးလာသည့်အမျိုးသမီးနှစ်ဦးကို ကားတစ်စီးမှဝင်တိုက်
EPN
မြစ်ကြီးနား၊ ဖေဖော်ဝါရီ ၂၂ (၂၀၂၄)
ကချင်ပြည်နယ်၊ တနိုင်းမြို့တွင် ဖေဖော်ဝါရီ ၂၁ ရက်နေ့၊ ညနေပိုင်းက လမ်းဖြတ်ကူးလာသည့် အမျိုးသမီးနှစ်ဦးကို ကားတစ်စီးမှ ဝင်တိုက်ပြီး စိုးရိမ်ရသည့် အခြေအနေရှိနေကြောင်း ဒေသခံများထံမှ သိရသည်။
ဖြစ်စဉ်မှာ ဖေဖော်ဝါရီ ၂၁ ရက်နေ့၊ ညနေပိုင်းအချိန် တနိုင်း-မိုင်ခွန်သွား လမ်းဘေးရှိ ရွှေဝါဖြိုး (အပေါင်ဆိုင်)နှင့် အောင်မြင့်မိုရ် ကားဝပ်ရှော့အနီးတွင် ထင်းစီးများပိုးလာသည့် အမျိုးသမီးနှစ်ဦးမှာ လမ်းဖြတ်ကူးနေချိန် အနောက်ဘက်မှ ကားတစ်စီးက ဝင်တိုက်ခဲ့ခြင်းဖြစ်ကြောင်း ပြည်သူတစ်ဦးထံမှ သိရသည်။
“အမျိုးသမီးနှစ်ယောက်က ထင်းတွေထမ်းပြီး လမ်းဖြတ်ကူးနေတဲ့အချိန် အနောက်ကနေ ကားတစ်စီးက အရှိန်ပြင်းပြင်းနဲ့ ဝင်တိုက်လိုက်တာ။ တိုက်ခံရတဲ့ နှစ်ယောက်က အခြေအနေ စိုးရိမ်ရတယ်။ အခု ဆေးရုံမှာ ဆေးကုသနေတယ် ” ဟု ၎င်းကဆိုသည်။
အဆိုပါ ကားတိုက်ခံရသူ အသက် (၅၀)ဝန်းကျင်ရှိ ဒေါ်ဆီးရီးနှင့် ဒေါ်ယဥ်ဟန်းမှာ စိုးရိမ်ရ အခြေအနေ ရှိသည့်အတွက် ဆေးကုသမှု ခံယူနေပြီး၊ ကားဖြင့်ဝင်တိုက်သူ အသက် (၂၄)နှစ်ရှိ စိုးမိုးကျော် (ခ) ဖြူဖွေးအား ကားနှင့်အတူ ဖမ်းဆီးထားရှိကာ တနိုင်းမြို့မရဲစခန်းတွင် ပ-၂/၂၀၂၄ (ပုဒ္မ- ၃၃၇/၃၃၈) အရ အမှုဖွင့် အရေးယူထားရှိ ကြောင်း သိရသည်။
သံလွင်