မြစ်ကြီးနားတွင် အသက် ၈၀ နီးပါးရှိ အဖိုးအိုတစ်ယောက် ဆွဲကြိုးချသေဆုံး
EPN
မြစ်ကြီးနား၊ မေ ၁၉
ကချင်ပြည်နယ်၊ မြစ်ကြီးနားမြို့၊ နန်းကွေ့ရပ်ကွက်တွင် အသက် ၈၀ နီးပါးရှိ အဖိုးအိုတစ်ယောက် ဆွဲကြိုးချသေဆုံးခဲ့သည့် ဖြစ်စဉ်တစ်ခု ယမန်နေ့ ညနေပိုင်း ၆ နာရီခွဲခန့်က ဖြစ်ပွားခဲ့ကြောင်း ဧရာဝတီကရုဏာ အခမဲ့လူမှုကူညီရေးအသင်းထံမှ သိရသည်။
ဖြစ်စဉ်မှာ ယမန်နေ့ ညနေစာကို ၎င်း၏ မိသားစုများနဲ့အတူစားခဲ့ပြီး ညနေ ၆ ခွဲအချိန် သူ၏အိပ်ခန်းသို့ ဝင်ရောက်ကြည့်ရှူ့ခဲ့ရာမှ မိမိကိုယ်ကိုယ် ကြိုးဆွဲချသေဆုံးခဲ့ခြင်းဖြစ်ကြောင်း ဧရာဝတီကရုဏာ အခမဲ့ လူမှုကူညီရေးအသင်းမှ တာဝန်ရှိသူတစ်ဦးက ပြောသည်။
” ည ၇ နာရီကျော်လောက်မှာ ဖုန်းခေါ်လာတော့ နန်းကွေ့နယ်မြေ (၈) မှာနေတဲ့ အဖိုးကြီးတစ်ယောက် ကိုယ့်ကိုယ်ကိုယ် ဆွဲကြိုးချသေနေတယ်ဆိုပြီးခေါ်လို့သွားခဲ့တာပေါ့။ ဖြစ်စဉ်အတိကျတော့မသိရဘူး။ သူကသူ့မောင်နှမတွေနဲ့အတူနေတယ်လို့ ပြောကြတယ်။ သူတို့ရွာက မီးရှို့ခံရပြီး အဲ့အဖိုးအိမ်လည်းပါသွားလို့ သူ့မောင်နှစ်မတွေက ခေါ်ထားတာ။ ညနေစာလည်း အတူစားကြသေးတယ် ပြောတယ်။ သူတို့မောင်နှမတွေနဲ့ ညပိုင်း သူ့အခန်းထဲ ဝင်ကြည့်တော့မှ သူအဲ့လိုလုပ်တာသိကြတာ။ မြစ်ကြီးနားကတော့မဟုတ်ဘူး။ တခြားကျေးရွာကနေ ခဏလာနေရင်းကနေ အခုလိုဖြစ်သွားတာဆိုပြီး ပြောကြတယ် ” ဟု ၎င်းကဆိုသည်။
အဆိုပါသေဆုံးသူမှာ နန်းကွေ့နယ်မြေ (၈)တွင် မောင်နှစ်မများကခေါ်၍ အခြားကျေးရွာမှ လာရောက်နေထိုင် ခြင်းဖြစ်ကြောင်း သိရပြီး အသက်အရွယ်၊ နာမည်အား အပြည့်အစုံ မသိရသေးကြောင်း သိရသည်။
သံလွင်