——————————————————————————————————-
ပြဿနာကို ပိုမိုကြီးထွားစေတဲ့ ဆိုရှယ်ကွန်ယက်
EPN
အယ်ဒီတာ့အာဘော်၊ စက်တင်ဘာ ၈
မြစ်ကြီးနားမြို့တွင် ယခုရက်ပိုင်းအတွင်း ပူပူနွေးနွေးဖြစ်ပြီး လူတိုင်းစိတ်ဝင်စားနေသည့် ကိစ္စ ( Issue) တစ်ခုမှာ ပြီးခဲ့သည့် ကချင်ပြည်နယ်အတွင်း စစ်ပွဲဖြစ်ပွားမှု ၈ နှစ်ပြည့်နေ့၌ စစ်ရှောင်များ၏ ဘဝများကို လမ်းဘေး သရုပ်ဖေါ်ပြသခဲ့မှုကို ဦးဆောင်ခဲ့သည့် ကချင်လူငယ်နှစ်ဦးကို ငြိမ်း၊ စု၊ စီပုဒ်မဖြင့် တရားစွဲ ဆိုခဲ့သည့်အမှုနှင့် ပတ်သက်ဆက်နွယ်ခဲ့သည့်အကြောင်းဖြစ်သည်။
အဆိုပါ တရားစွဲဆိုခံရသည့် ကိုပေါလုနှင့် မဆိုင်းနှုးပန်ကို မြို့နယ်တရားရုံးမှ ငွေဒဏ် သုံးသောင်းစီ ဆောင်ရန်(သို့မဟုတ်) ထောင်ဒဏ် ၁၅ရက် ချမှတ်ခဲ့ရာ ငွေဒဏ်မဆောင်ခဲ့သည့်အတွက် ထောင်ဒဏ် ၁၅ ရက်ကျခံခဲ့သည်။ ဤဆုံးဖြတ်ချက်သည် မတရားဆုံးဖြတ်ခြင်းဟုဆိုကာ ယင်းအမိန့်ချသည့် တရားခွင်တွင် ကိုပေါလုက ချိန်ခွင့်ပျက်တစ်ခု တရားသူကြီးကို ပေးခဲ့သည်။
ထိုသို့ လုပ်ဆောင်ချက်သည် ပြည်သူ့ဝန်ထမ်းတရားစီရင်ရေး ဆောင်ရွက်နေစဉ် တမင်နှောက်ယှက် မထင်မဲ့မြင်ပြုလုပ်ခဲ့သည်ဟုဆိုကာ မြို့နယ်တရားရုံးမှ ကိုပေါလုကို နောက်ထပ် ထောင်ဒဏ် ၃ လကျခံရန် စက်တင်ဘာလ ၆ ရက်နေ့က ချမှတ်ခဲ့သည်။
အဆိုပါ တရားရုံး၏ အမိန့်ကို ကျေနပ်မှုမရှိသည့်အတွက် စစ်ရှောင်လူငယ်များနှင့် ကချင်လူငယ်အချို့က မြစ်ကြီးနားမြို့တွင် စက်တင်ဘာလ ၅ရက်နေ့မှ စတင်၍ ဆန္ဒပြမှု လှုပ်ရှားခဲ့သည်။ ဤ နေရာမှာ မည်သို့ပင် ဆန္ဒထုတ်ဖေါ်နေပါစေ မိမိခံစားနေရသော ခံစားချက်ကို ဥပဒေနှင့်အညီ ထုတ်ဖေါ်နေခြင်းဖြစ်သည်။
ထို့ကိစ္စရပ်များနှင့် ပတ်သက်၍ လူမှုကွန်ရက် စာမျက်နှာများတွင် ရေးသားမှုများသည် အပြုသဘော မျိုးမဟုတ်ဘဲ အပျက်သဘောဆောင်ကာ ပြဿနာကို ပိုမိုကြီးထွားလာစေသော အရေးအသားများကိုလည်း မြောက်များစွာ ရေးသားနေသည်ကို တွေ့ရသည်။ ယင်းရေးသားမှု မှားယွင်းမှုကြောင့်လည်း ပြဿနာ၏ အဖြေကို ရှာဖွေကြရာမှာ အနှောက်အယှက်ဖြစ်စေသည်။
ထို့အပြင် လူမှုကွန်ယက် ဖေ့ဘွတ်ပေါ်များတွင် ရေးသားနေသည့် အချို့ စာသားများသည် ပြဿနာကို ပိုကြီးထွားစေနိုင်ရုံသာမက လူမျိုးရေးခွဲခြားပြီး ရေးသားလူံ့ဆော် နေကြသည်ကိုလည်း စိတ်မကောင်းစရာဖွယ် တွေ့မြင်ရပါသည်။
ယခု ကိစ္စနှင့် ပတ်သက်ပြီး အဖဲ့ွအစည်းတစ်ခုခု၊ လူမျိုးတစ်ခုခု၊ တစ်ဦးတစ်ယောက်ကို သာစေလိုခြင်း၊ နာစေလိုခြင်း ကို ဆိုလိုခြင်းမဟုတ်ဘဲ ပြဿနာအကြောင်းအရာတစ်ခုက ပိုမိုမကြီးထွားအောင် သတိချပ် စေလိုခြင်းသာဖြစ်သည်။ သို့တည်းမဟုတ်ပါက အွန်လိုင်းပေါ် ခိုင်လုံမှုမရှိဘဲ ရေးသား လှုံ့ဆော်လိုက်ခြင်းကြောင့် တကယ်နှဖူးတွေ့၊ ဒူးတွေ့ရင်ဆိုင်ကြုံတွေ့နေရသူများကို အကျိုးသက်ရောက်မှု (impact) ဆိုးလာမည်ကို သတိထားစေချင်သည်။
ထို့အပြင် မည်သည့် ကိစ္စနှင့် ပတ်သက်၍မဆို လူမှုကွန်ရက်စာမျက်နှာပေါ် ရေးသားဝေဖန်မည်ဆိုပါက ရေးသားသူ အကောင့်ပိုင်ရှင်အနေဖြင့် ပြည်တွင်းသာမက ကမ္ဘာကပါ သိမြင်စေသည့် လူမှုကွန်ရက် စာမျက်နှာပေါ်တွင် မရေးသားမှီ သေချာ ဆင်ခြင်သုံးသပ်သင့်သည်။ သို့မဟုတ်လျှင် စာဖတ်သူများ ထင်ယောင် ထင်များဖြစ်စေသည့်အပြင် မိမိရေးသားမှုကြောင့် အဖွဲ့အစည်းကိုဖြစ်စေ၊ လူပုဂ္ဂိုလ်ကို ဖြစ်စေ အပုပ်ချလိုက်ခြင်း ဖြစ်သလို ပြဿနာမီး ပိုမိုကြီးထွားလာနိုင်ကြောင်း သတိချပ်စေလိုရင်း ရေးသားတင်ပြလိုက်ရပါသည်။
အယ်ဒီတာ
ထာဝရငြိမ်းချမ်းရေးသတင်းကွန်ရက်
Eternally Peace News Network (EPN)