ပူတာအို ရေခဲတောင်မှ ပြုတ်ကျသေဆုံးခဲ့သည့်မစိမ့်ထက် အမှုတွင် အဖွဲ့ခေါင်းဆောင်နှစ်ဦးကို ထောင်ဒဏ်နှင့် ငွေဒဏ်များချမှတ်
EPN
မြစ်ကြီးနား ၊ မေ ၃
ဖန်ဂရမ်ရာဇီရေခဲတောင်ပေါ်မှ ပြုတ်ကျသေဆုံးခဲ့သော တောင်တက်သမား မစိမ့်ထက်အမှုတွင် တောင်တက်အဖွဲ့ခေါင်းဆောင်နှစ်ဦးဖြစ်သော ကိုဇော်ဇင်ခိုင်နှင့် ကိုအောင်ခိုင်မြင့်တို့ နှစ်ဦးကို ထောင်ဒဏ်အပါအဝင် ငွေဒဏ်ကိုပါ အသီးသီးချမှတ်ခဲ့ကြောင်း မိသားစုဝင်တစ်ဦးထံမှသိရသည်။
အဆိုပါ အပြီးသတ်အမိန့်ချမှတ်မှုကို ဧပြီလ ၂၇ ရက်က ပူတာအိုမြို့နယ် တရားရုံးကအမိန့်ချမှတ်ခဲ့ခြင်းဖြစ်သည်။
အမှုတွင် ပေါ့လျော့မှုကြောင့် လူသေဆုံးစေမှု ပုဒ်မ ၃၀၄(က)အမှုအတွက် တစ်ဦးလျှင် ထောင်ဒဏ် တစ်နှစ်ခွဲနှင့် ငွေဒဏ်သုံးသိန်း ကျပ်စီ ချမှတ်ခဲ့ပြီး၊မြန်မာ့ခရီးသွားလုပ်ငန်းဆိုင်ရာ ပုဒ်မ ၃၃အမှုအတွက် တစ်ဦးလျှင်ထောင်ဒဏ် ၁ လနှင့်ငွေဒဏ်တစ်သိန်းကျပ်စီ အသီးသီးချမှတ်ခဲ့ခြင်းဖြစ်သည်။
အဆိုပါ လူသေဆုံးမှုအတွက် တောင်တက်အဖွဲ့တစ်ခုဖြစ်သည့် The Summiter အဖွဲ့ခေါင်းဆောင် ကိုဇော်ဇင်ခိုင်နှင့် ကိုအောင်ခိုင်မြင့်တို့ နှစ်ဦးကို ရာဇသတ်ကြီးပုဒ်မ ၃၀၄(က) (ပေါ့လျော့မှုကြောင့် လူသေဆုံးစေမှု)နှင့် ပုဒ်မ ၃၃ (မြန်မာ့ခရီးသွားလုပ်ငန်းဆိုင်ရာ )တို့ဖြင့် ပူတာအိုမြို့နယ်တရားရုံးတွင် အမှုဖွင့် တရားစွဲဆိုခဲ့ခြင်းဖြစ်သည်။
မစိမ့်ထက်အနေဖြင့် ဖန်ဂရမ်ရာဇီရေခဲတောင်ပေါ်မှ ပြုတ်ကျသေဆုံးသည့်နေ့သည် ၂၀၁၉ ခုနှစ် ဧပြီ ၁၂ ရက်တွင် ဖြစ်ပွားခဲ့ခြင်းကြောင့် ယခု ၂၀၂၂ ခုနှစ် ဧပြီ ၂၉ ရက်နေ့တွင် သုံးနှစ်ကျော်ခဲ့ပြီ ဖြစ်သည်။