မိုင်းခွဲစဥ် တုန်ခါမှုဒဏ်ကြောင့် လမ်းများပြိုကျပျက်စီး၍ နေအိမ်များတွင် မြေလွှာအက်ကွဲမှုများဖြစ်ပေါ်နေ
EPN
ဖားကန့်၊ ဧပြီ ၂၃
အဆိုပါနေရာတွင် လွန်ခဲ့သည့်နှစ်ရက်ခန့်က လမ်းမြေသားများ ပြိုကျသွားခဲ့ပြီး ယနေ့ ဧပြီလ ( ၂၃ )ရက်နံနက်ပိုင်းတွင် ထပ်မံ၍ မြေလွှာများပြိုကျခဲ့ရာ လမ်းများသာမက၊နေအိမ်များအတွင်းထိ အက်ကွဲမှုများဖြစ်ပေါ်ခဲ့ကြောင်း သိရသည်။
“လွန်ခဲ့တဲ့နှစ်ရက်လောက်က တစ်ကြိမ် မြေပြိုကျခဲ့တယ်၊ ဒီနေ့မနက် ထပ်ပြီးပြိုကျတဲ့အခါမှာ လမ်းမြေတွေသာမက အိမ်တွေထဲအထိ မြေလွှာအက်ကွဲကြောင်းတွေ ဖြစ်လာခဲ့တာပေါ့၊ ထပ်ပြိုကျခဲ့ရင် အိမ်တွေပါသွားတော့မှာပါ”ဟု ယင်းကျေးရွာတွင် နေထိုင်သူ ကိုမြင့်ကျော်က ပြောသည်။
အဆိုပါ မိုင်းခွဲတုန်ခါမှုကြောင့် လမ်းများပြိုကျခဲ့မှုအား ယနေ့နံနက်ပိုင်းအချိန်မှ စတင်၍ မြေဖို့ခြင်းလုပ်ငန်းများအား စတင်လုပ်ဆောင်နေပြီ ဖြစ်ကြောင်း ဆိုင်းရာရွာသစ် ကျေးရွာအုပ်ချုပ်ရေးမှူးရုံးမှ သိရသည်။
“ဒီနေ့မနက်ပိုင်းမှာ လမ်းမြေပြိုကျခဲ့တာပေါ့၊လမ်းအကျယ်(၁၀)ပေ၊ အရှည်ပေ (၁၀၀) လောက် ပြိုကျခဲ့တာပါ၊ အခု စက်ယန္တရားတွေနဲ့ ပြန်လည် မြေဖို့ပြီး၊ လမ်းပြုပြင်နေပါပြီ”ဟု ကျေးရွာတာဝန်ရှိသူတစ်ဦးမှ ဖြေကြားသည်။
ဆိုင်းရာရွာသစ်ကျေးရွာတွင် ယခုအခါ ကျောက်စိမ်းတူးဖော်ရေးကုမ္ပဏီများ၏ မိုင်းခွဲစဥ် တုန်ခါမှုဒဏ်ကြောင့် မြေလွှာများ အက်ကွဲနေရာ နေအိမ်ငါးလုံးထက်မနည်း မြေလွှာအက်ကွဲကြောင်းများ ဖြစ်ပေါ်၍ ထပ်မံပြိုကျနိုင်သည့် အန္တရာယ် ရင်ဆိုင်နေရကြောင်း သိရသည်။
အဆိုပါဆိုင်းရာရွာသစ်ကျေးရွာတွင် အိမ်ထောင်စု(၃၅၀)ခန့်ရှိပြီး၊ နေအိမ်ပေါင်း(၃၇၀)ကျော်ရှိနေတယ်လို့ သိရပြီး၊ ကျေးရွာအနီးတွင် လက်ရှိတူးဖော် နေသည့် ကျောက်စိမ်းတူးဖော်ရေးကုမ္ပဏီမှာ ရတနာလင်းကျောက်မျက်ကုမ္ပဏီဖြစ်ကြောင်း ယင်းဒေသခံများထံမှ သိရသည်။
သတင်း▪︎နောင်ရိုး
ဓါတ်ပုံ▪︎ကိုတင်လှိုင်