မောင်တောမြို့နယ်၊ ကြိမ်ချောင်းစစ်ဆေးရေးဂိတ်တွင် တရားမဝင် ဝင်ရောက်လာသည့် ဘင်္ဂလားဒေ့ရှ်နိုင်ငံသား (၆) ဦး ဖမ်းဆီးရမိ
EPN
မောင်တော၊ ဇွန် ၂၉
ရခိုင်ပြည်နယ်၊ မောင်တောမြို့နယ်၊ ကြိမ်ချောင်းစစ်ဆေးရေးဂိတ်တွင် တရားမဝင် ဝင်ရောက်လာသည့် ဘင်္ဂလားဒေ့ရှ်နိုင်ငံသား ၆ ဦးအား ယမန်နေ့က ဖမ်းဆီးရမိခဲ့ကြောင်း သိရသည်။
မောင်တောမြို့နယ်၊ ကြိမ်ချောင်းစစ်ဆေးရေးဂိတ်၌ ဇွန် ၂၈ ရက်နေ့ ညနေပိုင်းချိန်တွင် တောင်ပြိုလက်ဝဲမြို့ဘက်မှ မောင်တောမြို့ဘက်သို့ မောင်း နှင်လာသည့် မောင်တောမြို့ နယ်၊ ခရေမြိုင်ကျေးရွာနေ မျိုးကျော်သူ မောင်းနှင်လာသည့် VOXY အမျိုးအစား (အဖြူရောင်) ယာဉ် အားစစ်ဆေးခဲ့ရာ ၎င်းယာဉ်ပေါ်မှ ဘင်္ဂလားဒေ့ရှ်နိုင်ငံသား ၆ ဦးအား ဖမ်းဆီးမိခဲ့ခြင်းဖြစ်ကြောင်း သိရသည်။
ဖမ်းဆီးရမိသူများ၏ ထွက်ဆိုချက်အရ ၎င်းတို့သည် မောင်တောမြို့မှတစ်ဆင့် မလေးရှားနိုင်ငံတွင် သွား ရောက်အလုပ်လုပ်ရန်အတွက် ဘင်္ဂလားဒေ့ရှ်နိုင်ငံမှ နယ်စပ်ခြံစည်းရိုးအား ဖြတ်ကျော်ဝင်ရောက်လာခဲ့ပြီး မောင်တောမြို့နယ်၊ သင်္ဘောလှ(အပြင်)ရွာအနီး၌ စောင့်ဆိုင်းနေခဲ့ကြောင်း၊ ထို့နောက် ယာဉ်မောင်းမျိုးကျော်သူ ရောက်ရှိလာပြီး ယာဉ်ဖြင့်ခေါ်ဆောင်လာစဉ် ဖမ်းဆီးခံရခြင်းဖြစ်ကြောင်း သိရသည်။