ကချင်အမျိုးသား ကွန်ဂရက်ပါတီ (KNC) ဥက္ကဌ အမှုဆက်လက်ရင်ဆိုင်ရန် နေပြည်တော်အကျဉ်းထောင်မှ မြစ်ကြီးနားအကျဉ်းထောင်သို့ လွှဲပြောင်းပို့ဆောင်
EPN
မြစ်ကြီးနား၊ မေလ ၁၀
(၂၀၂၁)ခုနှစ် သြဂုတ်လ (၂၅)ရက်နေ့က နေပြည်တော်မှာ ဖမ်းဆီးထိန်းသိမ်းခံခဲ့ရသည့် ကချင်အမျိုးသား ကွန်ဂရက်ပါတီ (KNC) ဥက္ကဌ ဒေါက်တာ အမ်ကောန်လကို မြစ်ကြီးနားမြို့နယ်တရားရုံးမှာ အမှုဆက်လက်ရင်ဆိုင်ရန် ယမန်နေ့(မေလ ၉ ရက်နေ့) မနက် (၉)နာရီခွဲခန့်က နေပြည်တော်အကျဉ်းထောင်မှ မြစ်ကြီးနားအကျဉ်းထောင်သို့ လွှဲပြောင်းပို့ဆောင်ခဲ့ပြီဖြစ်ကြောင်းသိရသည်။
ကချင်အမျိုးသား ကွန်ဂရက်ပါတီ (KNC) ဥက္ကဌ ဒေါက်တာ အမ်ကောန်လကို မတ်လ (၂၃)ရက်နေ့က မန္တလေးတိုင်းဒေသကြီး၊ရမည်းသင်းအကျဉ်းထောင်တွင် ဇမ္ဗူသီရိမြို့နယ်တရားရုံးရဲ့ ရာဇသက်ကြီး၊ပြစ်မှုပုဒ်မ -၅၀၅(က)ဖြင့် ထောင်ဒဏ်(၂)နှစ် ကျခံရန် အမိန့်ချမှတ်ခံထားရပြီး မြစ်ကြီးနားမြို့နယ်တရားရုံးမှာ အမှုဆက်လက်ရင်ဆိုင်ရန် ယမန်နေ့က မြန်မာ့အမျိုးသားလေကြောင်းလိုင်းဖြင့် မြစ်ကြီးနားအကျဉ်းထောင်သို့ ရောက်ရှိလာပြီဖြစ်ကြောင်းသိရသည်။
ဒေါက်တာ အမ်ကောန်လ ကို မြစ်ကြီးနားမြို့ ၊မြို့မရဲစခန်းတွင်လည်း မြောက်ပိုင်းတိုင်းစစ်ဌာနချုပ်မှ ဒုဗိုလ်မှူးကြီး သန်းထိုက်မှ တရားလိုပြုကာ ပုဒ်မ ၅၀၅/က ဖြင့် ၂၀၂၁ ခုနှစ် သြဂုတ်လ (၂၆)ရက် က ထပ်မံ၍အမှုဖွင့်တရားစွဲဆိုထားကြောင်း သိရသည်။
လက်ရှိတွင် ကချင်အမျိုးသား ကွန်ဂရက်ပါတီ (KNC) ဥက္ကဌ ဒေါက်တာ အမ်ကောန်လကို ယနေ့ (မေလ ၁၀ရက်နေ့) နေ့လယ် (၁)နာရီခန့်က မြစ်ကြီးနားအကျဉ်းထောင်သို့ပို့ဆောင်လိုက်ပြီ ဖြစ်ကြောင်းသိရသည်။
ဗညားနွဲ့