မြစ်ကြီးနားတွင် အလုပ်မှပြန်လာသည့် အမျိုးသားတစ်ဦး ဆိုင်ကယ်အရှိန်မထိန်းနိုင်ပဲ ဓာတ်တိုင်ဝင်တိုက်ပြီး သေဆုံး
EPN
မြစ်ကြီးနား၊ ဇန်နဝါရီ ၁၉ (၂၀၂၄)
မြစ်ကြီးနားမြို့၊ ဂေါက်ကွင်းရှေ့ လမ်းမကြီးတွင် အလုပ်မှပြန်လာသည့် အမျိုးသားတစ်ဦး ဆိုင်ကယ်အရှိန်မထိန်းနိုင်ပဲ ဓာတ်တိုင်ဝင်တိုက်ပြီး သေဆုံးခဲ့ရသည့် ဖြစ်စဉ်တစ်ခု ယမန်နေ့ည ၉ နာရီခွဲအချိန်က ဖြစ်ပွားခဲ့ကြောင်း မျိုးဆက်သစ် လူမှုကယ်ဆယ်ရေး အသင်းထံမှ သိရသည်။
ဖြစ်စဉ်မှာ အလုပ်မှပြန်လာသည့် ဦးထွန်းထွန်းမှာ ကျွန်းပင်သာရပ်ကွက်ရှိ မိမိနေအိမ်သို့ပြန်ချိန် ဆိုင်ကယ်အရှိန်များသည့်အတွက် မထိန်းနိုင်ပဲ လမ်းဘေးပလပ်ဖောင်းအား ဝင်တိုက်ခဲ့ရာ ဦးခေါင်းနှင့် ဓာတ်တိုင်အား ရိုက်မိသဖြင့် အခင်းဖြစ်ပွားရာ နေရာတွင် သေဆုံးခဲ့ရကြောင်း မျိုးဆက်သစ်လူမှုကယ်ဆယ်ရေးအသင်းမှ တာဝန်ရှိသူတစ်ဦးကပြောသည်။
” သူကအလုပ်ကပြန်လာတဲ့ချိန်ဖြစ်တာ။ အရက်မူးပြီး ဝင်တိုက်တာမဟုတ်ဘူး။ဆိုင်ကယ်အရှိန် မထိန်းနိုင်လို့ လမ်းဘေးပလပ်ဖောင်းကို ဝင်တိုက်ပြီး၊ သူ့ခေါင်းကမီးတိုင်နဲ့ ရိုက်မိသွားလို့ အဲ့နေရာမှာပဲ သေ သွားတယ်။ ဆိုင်ကယ်လည်း ပျက်စီးကုန်တယ် ” ဟု ၎င်းကဆိုသည်။
အဆိုပါ သေဆုံးသူ ဦးထွန်းထွန်း အသက် (၄၂)နှစ်မှာ ကျွန်းပင်သာရပ်ကွက်တွင် နေထိုင်သူဖြစ်ပြီး၊ အခင်းဖြစ်ပွားချိန်တွင် မိသားစုများလည်း ရောက်ရှိလာကြောင်း၊ ရုပ်လောင်းအား ပြည်သူ့ဆေးရုံ ရင်ခွဲရုံတွင် ပို့ဆောင်ပေးထားကြောင်း သိရသည်။
ပြီးခဲ့သည့် ဇန်နဝါရီ ၁၇ ရက်နေ့တွင်လည်း စီတာပူရပ်ကွက် ဂျပန်လမ်းနားတွင် ဆိုင်ကယ်ချင်း တိုက်မိကြပြီး အမျိုးသမီးတစ်ဦး အခင်းဖြစ်ပွားရာ နေရာတွင် သေဆုံးခဲ့ရကြောင်း သိရသည်။
သံလွင်