လဟယ်မြို့တွင် တောမီးလောင်မှုကြောင့် နေအိမ် ၃၀ ကျော် မီးလောင်ဆုံးရှုံး
EPN
မြစ်ကြီးနား၊ မတ် ၁၅ (၂၀၂၄)
စစ်ကိုင်းတိုင်းဒေသ၊ လဟယ်မြို့နယ်၊ ဟွေဟိုက်ကျေးရွာတွင် မတ်လ ၁၄ ရက်၊ နေ့လည် ၁ နာရီခွဲ အချိန်က တောမီးလောင်မှုကြောင့် လူနေအိမ် ၃၀ ကျော် မီးလောင်ပျက်စီး ဆုံးရှုံးခဲ့ရကြောင်း ဒေသခံများထံမှ သိရသည်။
ဟွေဟိုက်ကျေးရွာအနီးတွင် တောင်ယာမီးရှိူ့ခဲ့ခြင်းကြောင့် မီးစများ လူနေအိမ်သို့ ကူးစက်ကျလာသည့်အတွက် လူနေအိမ် ၃၃ လုံး၊ KG အဆောင် ၂ လုံး၊ စပါးကျီ ၄ လုံးနှင့် လူနှစ်ဦး ထိခိုက်ဒဏ်ရာရရှိခဲ့ ကြောင်း ဒေသခံတစ်ဦးထံမှ သိရသည်။
” မနေ့က တစ်နာရီလောက်မှာ လောင်သွားတာပါ။ စလောင်တာကတော့ တောင်ယာမီးရှိူ့တာကနေ စလောင်တာလို့ သိရတယ်။ မီးစတွေကျပြီး လောင်သွားတာပါ ” ဟု ၎င်းကပြောသည်။
အဆိုပါ လူနေအိမ် (၃၃)လုံး မီးလောင်မှုကြောင့် မီးဘေးသင့် ဒေသခံပြည်သူများ လူဦးရေ ၂၀၀၀ ကျော်အတွက် အိုးခွက်ပန်းကန်များ၊ အဝတ်အထည်များနှင့် စား သောက်စရာများ အရေးပေါ် အကူအညီ လိုအပ်နေကြောင်း သိရပြီး မီးဘေးသင့်ပြည်သူများအား ကူညီလှူဒါန်းပေးလိုပါက (၀၉ ၄၅၃၆၉၇၆၂၃၊ ၀၉ ၇၆၄၈၁၇၃၄၁) သို့ ဆက်သွယ်နိုင် ကြောင်း သိရသည်။
သံလွင်