အမေရိကန်နှင့် တောင်ကိုရီးယားတို့သည် လာမည့် သီတင်းပတ်အတွင်း အကြီးမားဆုံး စစ်ရေးလေ့ကျင့်မှုကို စတင်တော့မည်

EPN

နိုင်ငံတကာ၊ သြဂုတ် ၁၆

အမေရိကန်နှင့် တောင်ကိုရီးယားတို့သည် လာမည့် သီတင်းပတ်အတွင်း Ulchi Freedom Shield အမည်ပေးထားသည့် အကြီးမားဆုံး စစ်ရေးလေ့ကျင့်မှုကို စတင်တော့မည်ဖြစ်ကြောင်း တောင်ကိုရီးယား စစ်တပ်က ယနေ့ ထုတ်ဖော်ပြောဆိုခဲ့သည်။

တောင်ကိုရီးယားတွင် သြဂုတ် ၂၂ ရက်မှ စက်တင်ဘာ ၁ ရက်အထိ ပြုလုပ်မည့် အဆိုပါ နွေရာသီ စစ်ရေးလေ့ကျင့်မှုတွင် လေယာဉ်၊ စစ်သင်္ဘောများ၊ တင့်ကားများနှင့် သောင်းနှင့်ချီသော တပ်ဖွဲ့ဝင်များ ပါဝင်သည့် လေ့ကျင့်မှုများ ပါဝင်မည်ဖြစ်သည်။

အစိုးရဝန်ထမ်းများဦးဆောင်သည့် လေးရက်ကြာ တောင်ကိုရီးယားအရပ်ဘက်ကာကွယ်ရေးလေ့ကျင့်ရေးအစီအစဉ်နှင့်အတူ စတင်မည့် အဆိုပါ စစ်ရေးလေ့ကျင့်မှုတွင် ပူးတွဲတိုက်ခိုက်မှုများ၊ ရှေ့တန်းစစ်လက်နက်များနှင့် လောင်စာဆီများ ဖြည့်သွင်းခြင်းနှင့် အစုလိုက်အပြုံလိုက် အပျက်အစီးလက်နက်များ ဖယ်ရှားခြင်းတို့ ပါဝင်မည်ဖြစ်ကြောင်း သိရသည်။

အဆိုပါစစ်ရေးလေ့ကျင့်မှုကို ကျူးကျော်တိုက်ခိုက်ရေးလေ့ကျင့်မှုအဖြစ် ဖော်ပြထားသည့်အတွက် မြောက်ကိုရီးယားထံမှ ဒေါသတုံ့ပြန်မှုမှာ သေချာပေါက်နီးပါးဖြစ်သည်။

မြောက်ကိုရီးယားသည် အမေရိကန်နှင့် တောင်ကိုရီးယားတို့အပေါ် လက်နက်စမ်းသပ်မှုများနှင့် နျူကလီးယား ပဋိပက္ခကို ခြိမ်းခြောက်မှုများ အရှိန်မြှင့်လုပ်ဆောင်နေသည်ဟု တောင်ကိုရီးယားစစ်တပ်က ယမန်နေ့တွင် ပြောကြားခဲ့သည်။

မြောက်ကိုရီးယားနှင့် သံခင်းတမန်ခင်းဖန်တီးနိုင်ရန်အတွက် မကြာသေးမီနှစ်များအတွင် ဖျက်သိမ်းထားသည့် စစ်ရေးလေ့ကျင့်မှုများကို အရှိန်မြင့်ကာ အကြီးစားလေ့ကျင့်မှုများ ပြန်လည်လုပ်ဆောင်မှုများကြောင့် မြောက်ကိုရီးယား၏ နျူကလီးယား သို့မဟုတ် အကြီးစား ဒုံးကျည်စမ်းသပ်မှု သို့မဟုတ် နယ်စပ်တိုက်ပွဲများဖြစ်နိုင်သည့် ရန်စမှုတစ်ခု ဖြစ်လာမည်ကို စိုးရိမ်မှုများ ရှိနေသည်။

ပြီးခဲ့သည့် သြဂုတ် ၈ ရက်မှ ၁၄ ရက်အထိ ဟာဝိုင်အီကမ်းလွန်တွင် အမေရိကန်၊ တောင်ကိုရီးယားနှင့် ဂျပန်ရေတပ်တို့သည် ဒုံးကျည်သတိပေးချက်နှင့် ပဲ့ထိန်းဒုံးကျည်ရှာဖွေရေးနှင့် ခြေရာခံရေးလေ့ကျင့်မှုတွင် ပါဝင်ခဲ့ကြောင်း အမေရိကန်ကာကွယ်ရေးဌာနက ပြောကြားခဲ့ပြီး အဆိုပါလေ့ကျင့်မှုသည် မြောက်ကိုရီးယား၏ စိန်ခေါ်မှုများကို ရင်ဆိုင်ရာမှာ သုံးနိုင်ငံ ပူးပေါင်းဆောင်ရွက်မှု တိုးမြှင့်ရန် ရည်ရွယ်ထားသည်ဟုဆိုသည်။

အမေရိကန်နှင့် တောင်ကိုရီးယားတို့ ပုံမှန်ပြုလုပ်နေကြ စစ်ရေးလေ့ကျင့်မှုအတွင်း မြေပြင်၊ ဝေဟင်နှင့် ပင်လယ်ရေကြောင်းဆိုင်ရာ ပိုင်ဆိုင်မှုအမြောက်အမြားပါဝင်သည့် တိုက်ရိုက်ပစ်ခတ်လေ့ကျင့်မှုများတွင် အမေရိကန်တပ်ဖွဲ့ဝင် ၁၀,၀၀၀ နှင့် ကိုရီးယားတပ်ဖွဲ့ဝင် ၂၀၀,၀၀၀ ခန့် ပါဝင်လေ့ရှိသည်။

မဟာမိတ်များသည် ယူကရိန်းစစ်ပွဲအတွင်း ပြသခဲ့သည့် ဒရုန်းတိုက်ခိုက်မှုများနှင့် အခြားသော စစ်ပွဲဆိုင်ရာ တိုးတက်မှုများအတွက် လေ့ကျင့်ပေးမည်ဖြစ်ပြီး ဆိပ်ကမ်းများ၊ လေဆိပ်များနှင့် ဆီမီးကွန်ဒတ်တာ စက်ရုံများကဲ့သို့ အဓိက စက်မှုလုပ်ငန်းခွင်များကို တိုက်ခိုက်ခြင်းအတွက် စစ်ရေး-အရပ်ဘက် ပူးတွဲတုံ့ပြန်မှုများကိုလည်း လေ့ကျင့်မည်ဖြစ်သည်။

မြောက်ကိုရီးယားသည် စစ်ရေးလေ့ကျင့်မှုကို တင်းမာမှုများ အရှိန်မြှင့်ရန် အကြောင်းပြချက်အဖြစ် အသုံးပြုနိုင်ကြောင်း ကျွမ်းကျင်သူအချို့က ပြောသည်။

မြောက်ကိုရီးယားသည် ၎င်း၏ နိုင်ငံအတွင်း ကိုဗစ်ကပ်ရောဂါ ဖြစ်ပွားမှုအပေါ် လက်တုံ့ပြန်ခြင်းနှင့်ပတ်သက်၍ သတိပေးထားပြီး တောင်ပိုင်းတက်ကြွလှုပ်ရှားသူများက ပစ်လွှတ်သော မီးပုံးပျံများဖြင့် နယ်စပ်ဖြတ်ကျော်ပျံသန်းလာသော အခြားအရာဝတ္ထုများကြောင့်ဟု အခိုင်အမာဆိုထားသည်။

ပြီးခဲ့သည့်လက Associated Press ရုပ်မြင်သံကြားနှင့် အင်တာဗျူးတွင် ပြုံယမ်း၏ နိုင်ငံခြားရေး ဝန်ကြီးဌာနမှ တွေးခေါ်ပညာရှင် ချိုဂျင်က အမေရိကန်နှင့် တောင်ကိုရီးယားတို့သည် ၎င်းတို့၏ ရန်လိုသော စစ်ရေးဖိအားပေးမှုကို မစွန့်လွှတ်ပါက လုံခြုံရေး စိန်ခေါ်မှုများနှင့် ရင်ဆိုင်ရလိမ့်မည်ဟု ပြောကြားခဲ့သည်။

တောင်ကိုရီးယား ပူးတွဲစစ်ဦးစီးချုပ်များ ပြောရေးဆိုခွင့်ရှိသူ က တောင်ကိုးရီးယားနှင့် အမေရိကန်စစ်တပ်များသည် မြောက်ကိုရီးယား၏ စစ်ရေးလှုပ်ရှားမှုများနှင့် အဆောက်အအုံများကို အနီးကပ်စောင့်ကြည့်နေကြောင်း ပြောကြားခဲ့သည်။

Source – AP