၁၇ ႀကိမ္ေျမာက္ မိုင္းအႏၱရာယ္ အသိပညာေပး ညွိႏိႈင္း အစည္းအေဝးက်င္းပ

၁၇ ကြိမ်မြောက် မိုင်းအန္တရာယ် အသိပညာပေး ညှိနှိုင်း အစည်းအဝေးကျင်းပ

EPN
မြစ်ကြီးနား၊ စက်တင်ဘာ ၂၀

ကချင်ပြည်နယ် မိုင်းအန္တရာယ် အသိပညာပေးလုပ်ငန်းအဖွဲ့၏ (၁၇) ကြိမ်မြောက် ပုံမှန်ညှိနှိုင်းအစည်းအဝေးကို  ယနေ့၊ စက်တင်ဘာလ ၂၀ ရက်နေ့  မြစ်ကြီးနားမြို့ City Park Royal ခန်းတွင် ကျင်းပပြုလုပ်ခဲ့သည်။

မိုင်းနှင့် စစ်ကျန်လက်နက်ပစ္စည်းများ၏ အန္တရာယ်ကျရောက်မှုများလျော့ချနိုင်ရန်အတွက် ကချင်ပြည်နယ်တွင် ၂၀၁၄ ခုနှစ်မှ စတင်ကာ  မိုင်းအန္တရာယ် အသိပညာပေး လုပ်ငန်းတွေကို သုံးလတစ်ကြိမ် လုပ်ဆောင်နေ ကြောင်း Unicef အဖွဲ့အစည်းမှ ကိုကျော်ဝင်းဦးက အဆိုပါ အခမ်းအနားတွင် ပြောကြားခဲ့သည်။

“မိုင်းနဲ့စစ်ကျန်လက်နက်ပစ္စည်းတွေရဲ့အန္တရာယ်ကြောင့် ထိခိုက်ဒဏ်ရာရရှိမှု သေဆုံးမှုတွေကို လျော့ချဖို့ သုံးလတစ်ကြိမ် ပုံမှန်ညှိနှိုင်းအစည်းဝေးလုပ်တယ် ပြည်နယ်အဆင့် မလုပ်ခင်မှာ အမျိုးသားအဆင့်အနေနဲ့ မိုင်းအန္တရာယ် အသိပညာပေးအဖွဲ့ပေါ့နော် National Mine Risk Working group ကို ၂၀၁၂ မှာ စတင်ဖွဲ့တယ် ကချင်ပြည်နယ်မှာတော့ ၂၀၁၄ ခုနှစ်မှာ ပြည်နယ်အဆင့် Mine Risk Working group ကိုစဖွဲ့ပြီးတော့ ခုထိကို  မိုင်းအန္တရာယ် အသိပညာပေးလုပ်ငန်းတွေ လုပ်ဆောင်နေတယ်” ဟု ကိုကျော်ဝင်းက ပြောသည်။

မိုင်းဒဏ်ထိခိုက်ခံစားရသည့် ပြည်သူတွေအတွက် အစိုးရအဖွဲ့စည်းများ ၊ NGO ၊ INGO များမှ ငွေကြေး ထောက်ပံ့စရိတ်များအပြင် ဘဝပြန်လည် ထူထောင်ရေးအတွက် လိုအပ်သည်များကို ပံ့ပိုးကူညီလျက်ရှိကြောင်း ၎င်းမှ ဆက်ပြောသည်။

“မိုင်းဒဏ်ထိခိုက်ခံရတဲ့ ပြည်သူတွေကို အစိုးရအဖွဲ့အစည်းအနေနဲ့က ဘေးစီမံဦးစီးဌာန၊ လူမှုဝန်ထမ်းဦးစီးဌာန နဲ့ ပြန်လည်ထူထောင်ရေး ဦးစီးဌာနတို့ ပူးပေါင်းပြီး ထောက်ပံ့နေတာရှိတယ် ကျန်တဲ့ INGO NGO တွေကတော့    ကျန်းမာရေးနဲ့ ပတ်သတ်တဲ့ ဆေးဝါးကုန်ကျစရိတ်တွေ ဆေးရုံတက်နေစဉ် စားသောက်စရိတ်တွေ သူတို့ အတွက်ပြန်လည် ထူထောင်ဖို့လိုအပ်တာမျိုး ဥပမာ ခြေတု လက်တုတို့ လိုအပ်တဲ့ လူနာတွေဆိုရင်   ICRC ၊ MRCs တို့ကနေပြီး ထောက်ပံ့ပေးတယ် အသက်ရှင်ကျန်ရစ်တဲ့သူတွေကို ရေရှည်မှာ သူတို့ရဲ့ စားဝတ် နေရေး အတွက်ဖြေရှင်းလို့ရအောင် အသေးစား ထောက်ပံ့ပေးမှုတွေလည်း လုပ်နေပါတယ်” ဟုပြောသည်။

မြန်မာတစ်နိုင်ငံလုံး အတိုင်းအတာအားဖြင့် မိုင်း နှင့် စစ်ကျန်လက်နက်ပစ္စည်းများ၏ အန္တရာယ် ရင်ဆိုင်နေရသည့် တိုင်းနှင့် ပြည်နယ် (၉) ခုရှိပြီး  ၂၀၁၉ ခုနှစ်၏ ပထမ ၈ လတာကာလအတွင်း ရှမ်းပြည်နယ် မှ (၄၄%)၊ ရခိုင်ပြည်နယ်မှ(၂၃%)၊ ကချင်ပြည်နယ်မှ(၂၁%) နှင့် ကျန် ပြည်နယ်နှင့်တိုင်း (၆) ခုမှ (၁၂%) သော ပြည်သူများသည် မိုင်း နှင့် စစ်ကျန်လက်နက်ပစ္စည်းများ၏ အန္တရာယ်များကို ရင်ဆိုင်နေရကြောင်း သိရသည်။

ကချင်ပြည်နယ်အနေဖြင့်  ၂၀၁၉ ခုနှစ်၏ ပထမ ၈ လတာ အတွင်းတွင် မိုင်းဖြစ်စဉ် စုစုပေါင်း အကြိမ် (၂၀) ဖြစ်ပွားကာ ထိခိုက်ဒဏ်ရာရရှိသူ (၂၄) ဦးနှင့် အသက်ဆုံးရှုံးသူ (၆) ဦး ရှိပြီး ဗန်းမော်ခရိုင် မန်စီမြို့နယ် သည် ဖြစ်စဉ် အများဆုံးဖြစ်ပွားခဲ့ကြောင်း သိရသည်။

သွယ်သွယ်