ကိုရိုနာဗိုင်းရပ်စ်မှာ တရုတ်နိုင်ငံမှ မကောင်းသောလက်ဆောင်တစ်ခုဟု အမေရိကန်သမ္မတ ဒေါ်နယ်ထရမ့် ဆို

အမေရိကန်သမ္မတ ကိုရိုနာဗိုင်းရပ်စ် ဖြစ်ပွားမှုအတွက် တရုတ်နိုင်ငံကို အပြစ်ဖို့ချရမည်ဟူသော စွပ်စွဲချက်ကို ထပ်လောင်းပြောကြားခဲ့သည်။

ကိုရိုနာဗိုင်းရပ်စ်မှာ တရုတ်နိုင်ငံမှ အလွန်မကောင်းသော လက်ဆောင်တစ်ခုဖြစ်ပြီး ကမ္ဘာတစ်ဝန်း ပျံ့နှံ့ သွားခဲ့သည်ဟု ဒေါ်နယ်ထရမ့်က မေလ ၂၈ ရက်တွင် တွစ်တာ၌ ရေးသားခဲ့သည်။ အမေရိကန်နိုင်ငံတွင် ကိုဗစ်-၁၉ ကြောင့် သေဆုံးသူ တစ်သိန်းကျော်သွားပြီဟုလည်း သူက ဝန်ခံခဲ့သည်။

“အသက်သေဆုံးခဲ့သူများ၏ မိသားစုဝင်များ၊ မိတ်ဆွေများထံ လွန်စွာပဲ စိတ်မကောင်းဖြစ်ရတယ်လို့ ကျွန်တော် ပြောကြားလိုပါတယ်။” ဟု ၄င်းက တွစ်တာ၌ ရေးသားခဲ့သည်။

အမေရိကန်နိုင်ငံတွင် ယမန်နေ့က ကိုရိုနာဗိုင်းရပ်စ်ကြောင့် အတည်ပြုသေဆုံးသူ ၁၀၀၀၀၀ ကျော်သွားခဲ့ ပြီဖြစ်သည်။ သေဆုံးသူ တစ်သိန်းကျော်မှုနှင့်ပတ်သက်၍ မှတ်ချက်စကားမပြောကြားမှုကြောင့် မီဒီယာအချို့က ဒေါ်နယ်ထရမ့်ကို ဝေဖန်ခဲ့သည်။

ကိုဗစ်-၁၉ ကြောင့် သေဆုံးသူဉီးရေမှာ တစ်သိန်းအောက်သာရှိပါက မိမိတို့အားလုံး စွမ်းဆောင်ရည် ကောင်းတစ်ခု လုပ်ဆောင်နိုင်မည်ဖြစ်ကြောင်း ဒေါ်နယ်ထရမ့်က မတ်လနှောင်းပိုင်းတွင် ပြောကြားခဲ့သည်။

အမေရိကန်နိုင်ငံရှိ ပြည်နယ် ၅၀ စလုံးတွင် ယခုအခါ စီးပွားရေးလုပ်ငန်းများ တစ်ချို့တစ်ဝက် ပြန်ဖွင့် သော်လည်း ကိုရိုနာဗိုင်းရပ်စ်ကြောင့် နေ့စဉ်သေဆုံးသူအရေအတွက်မှာ ၅၀၀ ဝန်းကျင် ရှိနေဆဲဖြစ်သည်။

–ကိုးကား–
အင်န်အိတ်ချ်ကေ
Ref; Trump calls coronavirus ‘very bad gift from China’