တစ်ရက်အတွင်း လာရှိုးမြို့တွင် အမည်မသိ အမျိုးသား (၃)ဦး ရုပ်အလောင်းများတွေ့ရှိ
EPN
လားရှိုး၊ ဖေဖော်ဝါရီ ၂၇ (၂၀၂၄)
ရှမ်းပြည်နယ်၊ လားရှိုးမြို့၊ ရပ်ကွက် (၅)တွင် ဖေဖော်ဝါရီ ၂၆ ရက်က အမည်မသိ အမျိုးသား (၃)ဦး၏ ရုပ်အလောင်းများ တွေ့ရှိခဲ့ရကြောင်း လားရှိုးလူငယ်များ လူမှုကူညီရေး အသင်းထံမှ သိရသည်။
ယနေ့ နေ့လည် ၃ နာရီခွဲကျော်ခန့်က လားရှိုးမြို့၊ ရပ်ကွက်(၅)၊ ရေကန်တောင်၊ ရှင်းလင်းဆောင်ထဲတွင် အမျိုးသားတစ်ဦး သေဆုံးနေသဖြင့် တာဝန်ရှိသူများ၏ စစ်ဆေးမှုပြီးချိန်တွင် လားရှိုးမြို့ ပြည်သူ့ဆေးရုံကြီးရင်ခွဲရုံသို့ လားရှိုးလူငယ်များလူမှုကူညီရေးအသင်းမှ PR-004 ဖြင့်ပို့ဆောင်ပေးခဲ့ကြောင်း သိရသည်။
၎င်းအပြင် နေ့လည် ၁ နာရီ ၁၀ မိနစ်ကျော်တွင်လည်း ရပ်ကွက်(၅)၊ ရေကန်တောင်၊ ရေကန်အမှတ် (၁၅)၊ နတ်စင်အနောက်ဖက် တောအုပ်အတွင်းရှိ တဲပျက်ထဲတွင် ပုတ်ပွသေဆုံးနေသည့် အမျိုးသားတစ်ဦး၏ ရုပ်အလောင်းတွေ့ရှိရသဖြင့် လားရှိုးမြို့ ပြည်သူ့ဆေးရုံကြီးရင်ခွဲရုံသို့ PR-003 ဖြင့် လားရှိုးလူငယ်များ လူမှုကူညီရေးအသင်းက ပို့ဆောင်ပေးခဲ့ကြသည်။
အလားတူ နံနက် ၁၀ နာရီခွဲကျော်ခန့်ကလည်း ရပ်ကွက် (၅)၊ ရေကန်တောင်၊ ရေကန်အမှတ် (၁)၊ နတ်စင်အနောက်ရှိ တောအုပ်ထဲတွင် အမျိုးသားတစ်ဦးသေဆုံးနေသဖြင့် လားရှိုးလူငယ်များ လူမှုကူညီရေးအသင်းမှ လားရှိုးမြို့ပြည်သူ့ဆေးရုံကြီးသို့ PR-002 ဖြင့် ပို့ဆောင်ပေးခဲ့ကြောင်း သိရသည်။
သေဆုံးသူ (၃)ဦး၏ အမည်၊ အသက်၊ နေရပ်လိပ်စာတို့အား သိရှိရခြင်းမရှိသေးသဖြင့် သိရှိသူများ အနေဖြင့် ၎င်းတို့၏ မိသားစုဝင်များထံ ဆက်သွယ်အကြောင်းကြားပေးရန် လားရှိုးလူငယ်များ လူမှုကူညီရေးအသင်းက မေတ္တာရပ်ခံထားသည်။
ကျော်စိုးသူ