ဖားကန့်မြို့နယ် ကျောက်ထု KIA စစ်ဆေးရေးဂိတ်တွင် ယနေ့မနက်ပိုင်း အဆင်းအတက်ကားများ ပြန်လည်သွားလာခွင့်ပေး
EPN
မြစ်ကြီးနား၊ ဩဂုတ် ၂၅
ကချင်ပြည်နယ်၊ ဖားကန့်မြို့နယ်၊ နန့်ယားဂိတ်နှင့် ကျောက်ထုဂိတ်ကြား ပိတ်မိနေသည့် အဆင်းအတက် ကားများကို ယနေ့ (ဩဂုတ်လ ၂၅ ရက်နေ့)၊ မနက် ၇ နာရီခန့်က ပြန်လည်သွားလာခွင့်ပေးခဲ့ပြီဖြစ်ကြောင်း မြစ်ကြီးနား – ဖားကန့် လမ်းပြေးဆွဲနေသည့် ကားသမားများထံမှ သိရသည်။
ဩဂုတ်လ ၂၂ ရက်နေ့မှ စတင်ကာ နန့်ယားကျေးရွာအနီး တပ်မတော်နှင့် KIA/PDF ပူးပေါင်းအဖွဲ့တို့အကြား တိုက်ပွဲများ ဖြစ်ပွားခဲ့ပြီး၊ တိုက်ပွဲအခြေအနေများကြောင့် နန့်ယားဂိတ်နှင့် ကျောက်ထု ဂိတ်ကို ပိတ်ထားခဲ့ရာမှ ယနေ့ မနက်ပိုင်းတွင် KIA စစ်ဆေးရေးဂိတ်ဖြစ်သည့် ကျောက်ထုဂိတ်ကို ပြန်လည်ဖြတ်သန်းသွားလာခွင့်ပေးလိုက်ပြီဖြစ်ကြောင်း အဆိုပါ လမ်းပိုင်းပြေးဆွဲနေသူ ကားသမားတစ်ဦးက ပြောသည်။
” ကျနော်တို့ ဒီနေ့ မနက်ပိုင်းအထိ ၄ ရက်ကြာ ဂိတ်နှစ်ဂိတ်ကြားပိတ်မိနေခဲ့တာဖြစ်တယ်။ ကားအစီးရေ ၂၀၀ ကျော်လောက်ပိတ်မိနေတာ။ နှစ်ခုလုံးက အဆင်းအတက် ကားတွေကိုပိတ်ထားတော့ ကြားမှာပိတ်မိနေခဲ့တာ။ နန့်ယားကျေးရွာ ဆရာတော်နဲ့ ဒေသခံတွေက ထမင်း ကျွေးကြတယ်။ အခုတော့ အဆင်းအတက်ကားတွေကို ကျောက်ထုဂိတ်က ဖွင့်ပေးလိုက်ပြီ။ နန့်ယားမှာတော့ အတက်ကားတွေ ပိတ်ထားသေးတယ်ကြားတယ် ” ဟု ၎င်းကပြောသည်။
အလားတူ နန့်ယားဂိတ်တွင်းလည်း အဆင်းကားများကို ပြန်လည်သွားလာခွင့်ပေးထားပြီး၊ အတက်ကားများကိုတော့ ယာယီ ပိတ်ထားသေးကြောင်း ဒေသခံတစ်ဦးက ပြောသည်။
” ဟိုဘက်ဂိတ်က ကားတွေတော့ သွားလာကုန်ကြပြီ။ နန့်ယားမှာကတော့ ဖားကန့်အဝင် (အတက်) ကားတွေတော့ မသွားခိုင်းသေးဘူး။ ဒါပေမယ့် စစ်ဆေးတာတွေတော့ စလုပ်နေပြီဗျ။ အဆင်းကားတွေတော့ လွှတ်ပေးတယ် ” ဟု ၎င်းကပြောသည်။
အဆိုပါ ပိတ်မိနေသည့် ကားသမားများ ခရီးသည်များအတွက် ဩဂုတ်လ ၂၂ ရက်နေ့ ညပိုင်းမှ စတင်ကာ ညစာ၊ မနက်စာနှင့် နေ့လည်စာများကို နန့်ယားကျေးရွာဆရာတော်နှင့် ဒေသခံများက ကျွေးမွေးပေးခဲ့ကြောင်း သိရသည်။
” ၂၂ ရက်နေ့ထဲကစပြီး ဆရာတော်နဲ့ ကျေးရွာက ရပ်မိရပ်ဖတွေ၊ အလှူရှင်တွေပေါင်းပြီး ဟင်းနဲ့ ထမင်းထုပ်တွေ ဝေခဲ့ရတယ်။ ဒီနေ့မနက်ပိုင်းအထိ ထမင်းထုတ် ၁၀၀ ကျော် ပို့ပေးခဲ့တယ်။ ကားက ပိတ်မိတာ ၂၀၀ ကျော်လောက်ရှိတယ်ကြားတယ် ” ဟု နန့်ယားကျေးရွာနေဒေသခံတစ်ဦးက ပြောသည်။
အဆိုပါ ဂိတ်ပိတ်ရက်များအတွင်း ဖားကန့်မြို့နယ် ဒေသခံများအနေဖြင့် အရေးကြီးကိစ္စများ၊ ကျန်းမာရေးကိစ္စများ ပေါ်ပေါက်လာပါက ဆိုင်းတောင် – ဝှေခါ – အင်းတော်လမ်းပိုင်းကို အဓိက ထားကာ အသုံးပြုခဲ့ရကြောင်း သိရသည်။
ဗညားနွဲ့