KBZ ဘဏ်အကောင့်တွေကနေ သိန်း ၁၄၀၀ နီးပါး လိမ်လည်ထုတ်ယူသူ ၁၁ ဦးကိုဖမ်းမိ
EPN
မြစ်ကြီးနား၊ ဖေဖော်ဝါရီ ၂၁
အမျိုးသမီးနှစ်ဦးရဲ့ KBZ ဘဏ်အကောင့်တွေကနေ ငွေကျပ်သိန်း ၁၄၀၀ နီးပါးကို လိမ်လည်ထုတ်ယူသွားတဲ့ နိုင်ဂျီးရီးယားနိုင်ငံသား ၅ ယောက်နဲ့ မြန်မာနိုင်ငံသား ၆ ယောက်ကို ဖမ်းမိခဲ့တယ် ပြန်ကြားရေးဝန်ကြီးဌာနက သတင်းထုတ်ပြန်ထားပါတယ်။
လက်ရှိ ဖေ့စ်ဘုတ်နဲ့ လူမှုကွန်ရက်များမှာ KBZ PAY LEVEL မြှင့်ပေးသည့်ဌာနမှ ဝန်ထမ်းပုံစံ အယောင်ဆောင် ဆက်သွယ်ခြင်းစသည့် နည်းလမ်းများဖြင့် လိမ်လည်ခံရမည့်သူများကို ရှာဖွေကြတဲ့အတွက် မိဘပြည်သူတွေအနေနဲ့လည်း အခုလိုလိမ်လည်ခံရတဲ့ ဖြစ်စဉ်မျိုး ထပ်မံမဖြစ်ပွားစေရေး အထူးသတိပြုကြဖို့ကိုလည်း ထုတ်ပြန်ထားပါတယ်။
ဖေဖော်ဝါရီ ၆ ရက်က ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်မှာနေထိုင်တဲ့ အမျိုးသမီး တစ်ယောက်ရဲ့ KBZ ဘဏ်အကောင့်က ငွေကျပ်သိန်း ၁၀၂၀ နဲ့ ဖေဖော်ဝါရီ ၉ ရက်က ကမာရွတ်မြို့နယ်မှာ နေထိုင်တဲ့ အမျိုးသမီးတစ်ယောက်ရဲ့ ဘဏ်အကောင့်က ငွေကျပ်သိန်း ၃၇၀ တို့ကို လိမ်လည်ထုတ်ယူသွားတဲ့ အတွက် သက်ဆိုင်ရာရဲစခန်းမှာ အမှုဖွင့်တိုင်ကြားခဲ့တာ ဖြစ်ပါတယ်။
အဲဒီဖြစ်စဉ်မှာ ငွေကြေးလိမ်လည်လွှဲပြောင်းရယူရာမှာ အသုံးပြုတဲ့ ဘဏ်အကောင့်တွေကို ဖွင့်လှစ်ရောင်းချခဲ့တဲ့ အမျိုးသား ၄ ယောက်နဲ့ အမျိုးသမီး ၂ ယောက်ကိုဖေဖော်ဝါရီ ၁၂ ရက်မှာ စုံစမ်းဖော်ထုတ်ဖမ်းဆီး နိုင်ခဲ့တာဖြစ်ပါတယ်။
ဆက်သွယ်ရေး ကွန်ရက်အသုံးပြုပြီး ငွေကြေး လိမ်လည်လွှဲပြောင်းထုတ်ယူသူတွေဖြစ်တဲ့ နိုင်ဂျီးရီးယားနိုင်ငံသားနဲ့ သူရဲ့ ဇနီးဖြစ်သူတို့ကို ဖေဖော်ဝါရီ ၁၆ ရက်က ရန်ကုန်တိုင်းဒေသကြီး၊ သန်လျင်မြို့နယ်၊ Star City အိမ်ရာမှာ သက်သေခံပစ္စည်း၊ ငွေတွေနဲ့အတူ ဖမ်းဆီးရမိခဲ့ တယ်လို့ ဆိုပါတယ်။
အဲ့ဒီနောက် ငွေကြေးလိမ်လည်လွှဲပြောင်းထုတ်ယူရာမှာ ပူးပေါင်းပါဝင်တဲ့ နိုင်ဂျီးရီးယားနိုင်ငံသား ၃ ယောက်ကို Star City အိမ်ရာမှာပဲ ထပ်မံဖမ်းဆီးရမိခဲ့ပြီး ဆက်စပ်ကျူးလွန်သူတွေကို ဖော်ထုတ်ဖမ်းဆီးနိုင်ရေး စစ်ဆေးမှုတွေ ဆက်လက်ဆောင်ရွက်နေ တယ်တယ်လို့ သိရပါတယ်။
လက်ရှိမှာတော့ ငွေကျပ်သိန်း ၁၄၀၀ ဝန်းကျင်ကို လိမ်လည်လွှဲပြောင်းရယူခဲ့တဲ့ နိုင်ဂျီးရီးယားနိုင်ငံသား ၅ ယောက် နဲ့ မြန်မာနိုင်ငံသား ၆ ယောက်တို့ကို ဥပဒေနဲ့ အညီ ထိရောက်စွာအရေးယူနိုင်ရေး ဆောင်ရွက်နေပြီး ငွေကြေး လိမ်လည်ရာမှာ ပူးပေါင်းပါဝင်တဲ့ နိုင်ငံပြင်ပ ရောက်ရှိနေသူတွေကိုလည်း နိုင်ငံတကာရဲတပ်ဖွဲ့တွေနဲ့ ပူးပေါင်းကာ ဖော်ထုတ်ဖမ်းဆီးနိုင်ရေးဆောင်ရွက်နေပါတယ်။
ကေကေ