ဖေဖော်ဝါရီနှင့် မတ်လ ဒုတိယပတ်အတွင်း စစ်တွေမြို့အား AA အဖွဲ့မှ လက်နက်ကြီးများဖြင့် ၁၃ ကြိမ်ပစ်ခတ်တိုက်ခိုက်ခဲ့၍ ကလေးငယ်တစ်ဦးအပါအဝင် ၁၈ ဦးသေဆုံး
EPN
စစ်တွေ၊ မတ် ၁၈ (၂၀၂၄)
ရခိုင်ပြည်နယ်၊ စစ်တွေမြို့အား AA အဖွဲ့မှ ဖေဖော်ဝါရီနှင့် မတ်လ ဒုတိယပတ်အတွင်း လက်နက်ကြီးများဖြင့် ၁၃ ကြိမ်ပစ်ခတ်တိုက်ခိုက်ခဲ့သည်ဟု နစက ၏ သတင်းထုတ်ပြန်ရေးအဖွဲ့ထံမှ သိရသည်။
AA အဖွဲ့ဝင်များသည် ပြီးခဲ့သည့် မတ် ၁၆ ရက်၊ နံနက် ၁ နာရီခန့်က စစ်တွေမြို့ပေါ်သို့ လက်နက်ကြီးများဖြင့် ပစ်ခတ်တိုက်ခိုက်ခဲ့ရာ လက်နက်ကြီးကျည်များသည် စက်ရုံစု (၂)၊ ကုန်းဘောင်ရပ်ကွက်အတွင်းရှိ လူနေအိမ်တစ်ခုအနီးတွင် ကျရောက်ပေါက်ကွဲခဲ့ကြောင်း သိရသည်။
ယင်းကဲ့သို့ ပေါက်ကွဲမှုကြောင့် အမျိုးသား ၁ ဦးနှင့် အမျိုးသမီး ၁ ဦးတို့တွင် ထိခိုက်ဒဏ်ရာများ (စိုးရိမ်ရ)ရရှိခဲ့သဖြင့် စစ်တွေမြို့ပြည်သူ့ဆေးရုံကြီး (ခု တင် ၅၀၀)သို့ ပို့ဆောင်ပေးခဲ့ကြောင်း သိရသည်။
AA အဖွဲ့ဝင်များသည် ပြီးခဲ့သည့် ဖေဖော်ဝါရီ ၂၈ ရက်က စစ်တွေတပ်နယ်အတွင်းရှိ ကျေးရွာများ၊ ဖေဖော်ဝါရီ ၂၉ ရက်တွင် စစ်တွေမြို့၊ မြို့မဈေးအနီးရှိ (ဒေသအခေါ်) ကိုရီးယားဆိပ်ကမ်းဈေး၊ မတ် ၉ ရက်၊ ညပိုင်းတွင် စစ်တွေမြို့၊ ကသဲရပ်ကွက်၊ မတ် ၁၁ ရက်၊ မွန်းတည့်ပိုင်းတွင် စစ်တွေမြို့နယ်၊ ပါဒလိပ်ကျေးရွာရှိ အ.ထ.က (၇) ကျောင်းအနီး၊ မတ် ၁၃ ရက်၊ နံနက်ပိုင်းတွင် စစ်တွေမြို့နယ်၊ ရွှေပြည်သာကျေးရွာရှိ စာသင် ကျောင်းတို့အပါအဝင် ရပ်ကွက်/ ကျေးရွာများအတွင်းသို့ လက်နက်ကြီး၊ Drop Bomb များဖြင့် ၁၃ ကြိမ်ပစ်ခတ်တိုက်ခိုက်ခဲ့ကြကြောင်း သိရသည်။
ယင်းကဲ့သို့ ပစ်ခတ်တိုက်ခိုက်မှုကြောင့် အသက် (၁၂) နှစ်အရွယ်ရှိ ကလေးငယ်တစ်ဦး အပါအဝင် ဒေသခံ (၁၈)ဦးသေဆုံးခဲ့ပြီး၊ တက္ကသိုလ်ဝင်တန်းစာမေးပွဲ ဖြေဆိုနေသည့် ကျောင်းသား/ သူ နှစ်ဦးအပါအဝင် (၄၇)ဦး ထိခိုက်ဒဏ်ရာများ ရရှိခဲ့ကာ စာသင်ကျောင်းများ၊ လူနေအိမ်များနှင့် ဌာနဆိုင်ရာအဆောက်အဦးများ ပျက်စီးဆုံးရှုံးခဲ့ကြောင်း သိရသည်။
လုံခြုံရေးအဖွဲ့ဝင်များက စစ်တွေမြို့ရှိ ရပ်ကွက်/ ကျေးရွာများအတွင်းသို့ လက်နက်ကြီးများ၊ Drop Bomb များဖြင့်ပစ်ခတ်တိုက်ခိုက်ခဲ့သည့် AA အဖွဲ့ဝင်များကို ရှင်းလင်းရေးလုပ်ငန်းများ ပြုလုပ်လျက်ရှိကြောင်း သိရသည်။
ကျော်စိုးသူ