မုံရွာမှာ ညမထွက်ရ အမိန့်ကို အခွင့်ကောင်းယူပြီး ဆိုင်ကယ်တွေ လိုက်ခိုးနေတဲ့ လူ ၄ ဦးကို ရဲကဖမ်းဆီး
EPN
မုံရွာ၊ ဇူလိုင် ၁၄
စစ်ကိုင်းတိုင်း၊ မုံရွာမြို့၊ မုံရွာနယ်မြေရဲစခန်းက မနေ့ ဇူလိုင် ၁၃ ရက်ညပိုင်းက လူနေရပ်ကွက်တွေထဲမှာ အုပ်စုဖွဲ့ပြီး ဆိုင်ကယ်တွေ လိုက်ခိုးနေတဲ့ လူ ၄ ယောက်ကို လှည့်ကင်းအဖွဲ့က ဖမ်းဆီးရမိတယ်လို့ ရဲစခန်းနဲ့ နီးစပ်သူတွေဆီက သိရပါတယ်။
“ဆိုင်ကယ်သူခိုး ဖမ်းမိတာ ၄ ယောက်ပါ၊ စစ်ဆေးနေတုန်းဆိုတော့ သူတို့ အမှုဘယ်လောက် ကျူးလွန်တယ်ဆိုတာ မသိရသေးဘူး” လို့ မုံရွာနယ်မြေရဲစခန်းက တာဝန်ကျ ရဲတယောက်က ပြောပါတယ်။
ဒါ့အပြင် ဆိုင်ကယ်တွေ လိုက်လံခိုးယူနေတဲ့ ဖမ်းဆီးရမိသူ ၄ ယောက်ကတော့ ကျော်စိုးလွင်၊ ကျော်ဇင်လင်း၊ ထွန်းထွန်း နဲ့ ရီဟန် တို့ဖြစ်တယ်လို့ ရဲစခန်းဆီက သိရပါတယ်။
ဒီလ ၁၂ ရက်ညက မုံရွာမြို့ ၊ ရန်ကင်းရပ်ကွက်ထဲက အိမ်တခုမှာ သော့ခတ်သိမ်းဆည်းထားတဲ့ အဖိုးတန် ဆိုင်ကယ် ၅ စီး ခိုခံရတာဖြစ်ခဲ့ပါသေးတယ်။
ဒါ့အပြင် ရတနာပုံရပ်ကွက် ဓမ္မပါလကျောင်းတိုက်နားက အိမ်တွေမှာလည်း ပြီးခဲ့တဲ့လက ဆိုင်ကယ် ခိုးယူခံရတာတွေဖြစ်ခဲ့ပါတယ်။
မုံရွာမြို့မှာ ပြီးခဲ့တဲ့ မေလကစလို့ ဒီလ ၁၂ ရက်အထိ ဆိုင်ကယ်ပျောက်တဲ့သူ ၂၀ ကျော်ရှိပြီး ပျောက်ဆုံးဆိုင်ကယ် အစီးရေးဟာ ၃၀ထက်မနည်း ရှိတယ်လို့ လူမှုကွန်ရက်ပေါ်မှာ ကာယကံရှင်တွေရဲ့ ရေးသားချက်အရ သိရပါတယ်။
သွန်းသွန်း