မိုးညှင်းတွင် နှစ်ပတ်အတွင်း ရွှေဆွဲကြိုး အနီးကပ်လုယက်ခံရမှု (၃)ကြိမ်ဖြစ်ပွား
EPN
မိုးညှင်း၊ မေ ၁၃
မိုးညှင်းမြို့ပေါ်ရပ်ကွက်များတွင် အမျိုးသမီးများအား အကြောင်းအမျိုးမျိုးနှင့် ချဉ်းကပ်ကာ ရွှေဆွဲကြိုး လုယက်မှု ဧပြီ ၃၀ မှ မေလ ၁၂ ရက်နေ့အထိ ရက်သတ္တပတ် (၂) ပတ်အတွင်း ၃ကြိမ်တိတိ ဖြစ်ပွားခဲ့ကြောင်း သိရသည်။
မိုးညှင်းမြို့ရှိ စိမ်းရတနာမွန်တောင်ရပ်ကွက်နှင့် စိမ်းရတနာမွန်မြောက်၊ နားခါရပ်ကွက်တို့တွင် အမျိုးသမီးများအား အကြောင်းအမျိုးမျိုးဖြင့် ချဉ်းကပ်၍ ရွှေဆွဲကြိုး လုယက်မှုများ မကြာခဏ ဖြစ်ပွားလျှက်ရှိခဲ့ရာ ဧပြီ(၃၀)ရက်နေ့တွင် (၁)ကြိမ်၊ မေလ(၁၁)ရက်တွင် (၁) ကြိမ်နှင့် မေလ(၁၂)ရက်နေ့တွင် (၁)ကြိမ် ရက်သတ္တပတ် (၂)ပတ်အတွင်း (၃)ကြိမ်တိတိဖြစ်ပွားခဲ့ကြောင်း နားခါရပ်ကွက်အုပ်ချုပ်ရေးမှူး ထံမှ သိရသည်။
မိုးညှင်းမြို့ သာစည်ရပ်ကွက်မှ ဒေါ်မြတ်မြတ်ခိုင်-(လယ်ပြ)ဆရာမသည် မိုးညှင်းမြို့၊ အထက(၁)ကျောင်းမှ ပို့ချလျှက်ရှိသော Grate(3)သင်တန်းတက်အပြီး ၎င်းနေထိုင်ရာ သာစည်ရပ်ကွက်နေအိမ်သို့ လမ်းလျှောက် ပြန်လာစဉ် စိမ်းရတနာမွန်မြောက်ရပ်ကွက်(၁)လမ်းအရောက်တွင် ဆိုင်ကယ်စီးလာသော လူငယ်(၂)ဦးမှ နောက်မှ ကျော်တက်လာပြီး ဒေါ်မြတ်မြတ်ခိုင်ရှေ့အရောက်တွင် ဆိုင်ကယ်ရပ်တန့်ပြီး ဒီအနီးအနားမှာ စက်ရေတွင်းတူးတဲ့ လူမရှိဘူးလားဟု မေးမြန်းလျှက် ဒေါ်မြတ်မြတ်ခိုင်အနီးသို တိုးကပ်လာပြီး ဒေါ်မြတ်မြတ်ခိုင် လည်ပင်းတွင် ဝတ်ဆင်ထားသော ရွှေဆွဲကြိုးအား လုယူရန်ကြိုးစားစဉ် ကာယကံရှင်မှ လည်ပင်းမှ ရွှေဆွဲကြိုးအား အချိန်မှီ လက်ဖြင့်အုပ်၍ ဖြုတ်ယူမရအောင် ကာကွယ်လျှက် ပတ်ဝန်းကျင်သို့် အော်ဟစ် အကူအညီတောင်းခံခဲ့ရာ အဆိုပါလုယက်သူ(၂)ဦးမှ ၎င်း၏လက်မောင်းအား လက်သီးဖြင့်(၃)ချက်ထိုးကာ သတ်ပြစ်မည်ဟု ပြောဆိုကြိမ်းမောင်းပြီး ဆိုင်ကယ်ပေါ်သို့ တက်၍ မောင်းနှင်းထွက်ပြေးခဲ့ သော ဖြစ်စဉ် ဖြစ်ပွားခဲ့ကြောင်းသိရသည်။
အလားတူ မိုးညှင်းမြို့တွင် အဆိုပါလုယက်မှုနှင့်ဆင်တူစွာ စိမ်းရတနာမွန်တောင်ရပ်ကွက်နေ နေအိမ်အတွင်း အိမ်ဆိုင်ဖွင့်လှစ်ရောင်းချသူ ဒေါ်သောင်းခင်ထံ ဧပြီ(၃၀)ရက်နေ့က လူငယ်နှစ်ဦးမှ ဈေးဝယ်ချင်ယောင် ဆောင်၍ နေအိမ်ဆိုင်ခန်းထဲသို့ဝင်၍ ဒေါ်သောင်းခင်ဆွဲထားသော (၂)ကျပ်သားနှင့် ပုလဲဆွဲသီး အား လုယက်ခံရသောဖြစ်စဉ်နှင့် မေလ (၁၁)ရက်နေ့တွင် စိမ်းရတနာမွန်မြောက်ရပ်ကွက်နေ ဒေါ်ယဉ်သိန်း ဆိုသူ ဆိုင်ကယ်စီးနေစဉ် လူငယ်(၂)ဦးမှ ဆိုင်ကယ်အားတွန်းလှဲ၍ လည်ပင်းတွင် ဆွဲထားသော ဆွဲကြိုးအား ဖြုတ်ယူလုယက်သဖြင့် ရွှေဆွဲကြိုးမှာ ပြတ်တောက်၍ မြေပြင်သို့ကျခဲ့ရာ လုယက်သူနှင့် (၂)ကြိမ်တိုင် အောင်လုံးထွေးသတ် ပုတ်နေစဉ် ကျန်တစ်ဦးမှ ဒေါ်ယဉ်သိန်း၏လဲကျနေသော ဆိုင်ကယ်အား ဆွဲထူကာ မောင်းနှင်ထွက်ပြေးရန်ပြုလုပ်နေစဉ် ဒေါ်ယဉ်သိန်းမှ အဆိုပါလူငယ်၏ ဂုတ်အားဆွဲချပြီး ပတ်ဝန်းကျင်သို့ အော်ဟစ်အကူအညီတောင်းခဲ့သဖြင့် ထွက်ပြေးလွတ်မြောက်သွားကြောင်း ယင်းဖြစ်စဉ်နှင့် ပတ်သက်၍ နားခါအုပ်ချုပ်ရေးမှူးထံ အသိပေးအကြောင်းခဲ့ကြောင်းသိရသည်။
အဆိုပါ အနီးကပ်လုယက်မှုဖြစ်စဉ်များနှင့်ပတ်သက်၍ နေ့ခင်းကြောင်တောင် အတင့်ရဲစွာ လုယက်ခံရပေမဲ့ ကာယကံရှင်များဘက်မှ နားခါရပ်ကွက်ရုံးသို့ အသိပေးခြင်းသာပြုလုပ်ခဲ့ကြောင်းနှင့် ရဲစခန်းသို့ အမှုဖွင့်ရန် အတွက်ကိုမူ ငြင်းဆိုခဲ့ကြကြောင်း နားခါရပ်ကွက်အုပ်ချုပ်ရေးမှူးထံမှ သိရသည်။
မိုးမြင့်