EPN
ဗန်းမော်၊ မေလ ၁၆
ကချင်ပြည်နယ် ၊ ဗန်းမော်ခရိုင် ၊ ဗန်းမော်မြို့နယ် ၊ စင်းခန်းကျေးရွာအုပ်စု ၊ မြလယ်ကျေးရွာရှိ ဦး အောင်သန်းပိုင်ဆိုင်သော ဥယျာဉ်ခြံမြေအားသိမ်းဆည်းခံရမှုနှင့်ပတ်သက်ပြီး အစိုးရရုံးဌာနဆိုင်ရာများ အနေဖြင့် အမှန်တရားအတိုင်းအမှုမှန်ပေါ်ပေါက်စေရေးအတွက် ကြံ့ကြာမှုမရှိစေရေး နိုင်ငံတော် သမ္မတရုံးထံ အသနားခံတင်ပြတိုင်ကြားသွားမည်ဖြစ်ကြောင်း သိမ်းဆည်းခံရသူတောင်သူ ဦးအောင်သန်းထံမှသိရသည်။
အဆိုပါ သိမ်းဆည်းခံရသူဦးအောင်သန်းနှင့်ပတ်သက်ပြီး ယခင် စင်းခန်းအုပ်ချုပ်ရေးမှူးတာဝန်ထမ်း ဆောင်ခဲ့သူ ဦးမြင့်တင်က ” ဦးအောင်သန်းရဲ့ပိုင်ဆိုင်မှုအထောက်အထားများကို တွေ့ရှိချက်အရ သူပိုင်ဆိုင် တယ်ဆိုတာမှန်ပါတယ် ။ ဒါ့အပြင်ကျွန်တော် အုပ်ချုပ်ရေးမှူးမဖြစ်ခင်ကတည်းက ဦးအောင်သန်းတစ်ဦး တည်းပိုင်စိုက်ပျိုးလုပ်ကိုင်ခဲ့တယ်ဆိုတာက်ုိ မျက်မြင်လက်တွေ့လည်း ဖြစ်တဲ့အတွက် မှန်ကန်ကြောင်း ထောက်ခံပါတယ် “ဟု ပြောကြားခဲ့သည်။
ယင်းခြံမြေကို ၁၉၈၈ခုနှစ်ကတည်းက ပြေစာအရစတင်လုပ်ကိုင်စိုက်ပျိုးခဲ့ပြီး၁ဝဧကခန့်ရှိသောယင်း နေရာတွင် ၂၀၀၁မှစတင်ကာ ကြံစိုက်ပျိုးလုပ်ကိုင်စားသောက်နေရာမှာ အရှုံးပေါ်သဖြင့် ကြံစိုက်ပျိုးခြင်းကို ရပ်တန့်ပြီး ဥယျဉ်ခြံမြေအဖြစ်ပြုပြင်ကာ ဒညင်း ၊ သရက် စသည်များကိုစိုက်ပျိုးပြီး ဥယျဉ်ခြံအဖြစ်အသွင် ပြောင်းကာလုပ်ကိုင်ခဲ့သည်။၂၀၀၄-၀၅ ခုနှစ်မှာ မယက အဖွဲ့မှဆင်းလာခဲ့ပြီး ရော်ဘာစီမံကိန်းဟုဆိုကာ ရော်ဘာစိုက်ပျိုးရမည်။ မစိုက်နိုင်ပါက ခြံမြေအားစွန့်လွှတ်ရမည်ဟု ဆိုပြီးသိမ်းယူခဲ့ပါသည်။
ယခုကဲ့သို့သိမ်းလိုက်သည့်အချိန်မှစတင်ကာ မူလပိုင်ရှင်မှ စွန့်လွှတ်ခဲ့ရသော်လည်း ယနေ့အချိန်ထိ မည်သည့်ရော်ဘာပင်တစ်ပင်မျှစိုက်ပျိုးထားခြင်းမရှိပါဘဲ ယခုအခါသီးစိန်ငှက်ပျောလုပ်ငန်းကုပ္မဏီသို့ ဒေါ်ခင်အုန်းမြင့်မှ ဆက်လက် ငှါးရမ်းထားသည်ဟုဆိုပါသည်။ ယင်းကဲ့သို့ သိီးစိန်ငှက်ပျောလုပ်ငန်းကို တစ်ဧကလျှင်ငွေကျပ်တစ်သိန်းနှုန်းဖြင့် ၂၀၁၄-၁၅ ခုနှစ်ကတည်းကစိုက်ပျိုးခဲ့သည်ဟု ခြံမြေစွန့်လွှတ်ခဲ့ရသူဦး အောင်သန်း၏ပြောပြချက်အရသိရသည်။
” လွှတ်တော်ဥက္ကဌ ထံလိပ်မူပြီး ဦးအောင်သန်းကတိုင်တဲ့အတွက် ဒီကိစ္စကို လွှတ်တော်မှာစစ်ဆေး ခဲ့ပါတယ် ။ အဲဒီရော်ဘာစိုက်ရန်အတွက် တစ်ဧကကို ၃သိန်းလောက်ကုန်မယ်ဆိုတော့ တောင်သူတွေကမ စိုက်နိုင်တော့ ဦးစိုင်းမြတ်ဆိုသူကဧက၁၀၀ စိုက်မယ်ဆိုပြီး လုပ်ပါတယ် ၊ ဒါပေမယ့် ဦးစိုင်းမြတ်က ဧက၁၀၀ မစိုက်ဘဲ ဧက ၂၅လောက်ပဲစိုက်ခဲ့ပါတယ်။ သို့သော်ဦးစိုင်းမြတ်က သေဆုံးသွားသည့်အခါ ဒေါ်ခင်အုန်းမြင့် ထံလွှဲသွားတယ် စစ်ဆေးတွေ့ရှိချက်အရ ဘာစာချုုပ်စာတန်းမှမရှိဘဲလွှဲသွားတာကိုတွေ့ရတယ် ၊ ဦးအောင်သန်းကတော့ တစ်ချိန်တုန်းကသူလုပ်ခဲ့တဲ့ ကြံခင်းလုပ်ကိုင်ခဲ့တဲ့ အထောက်အထားပြေစာတွေပြနိုင်တယ် ။ ဒါ့ အပြင် ရော်ဘာမစိုက်ခင် ကြံခင်းရပ်နားစဉ် ဒညင်းတို့သရက်တို့စိုက်ထားတဲ့အထောက်အထားကိုလည်းတွေ ရှိရတယ် ။ ဦးအောင်သန်းရော်ဘာမစိုက်နိုင်လို့ အသိမ်းခံလိုက်ရချိန်မှာ စိုင်းမြတ်ကစိုက်တယ် ၊ စိုင်းမြတ်က နေဒေါ်ခင်အုန်းမြင့်ကိုရောင်းတယ် ၊ဒေါ်ခင်အုန်းမြင့်ကနေတဆင့် သိီးစိန် ကုပ္မဏီကို ငှါးစားထားတယ် ၊ ဦးအောင်သန်းမှာက အဲဒီခေတ်အနေအထားအရ လျှော်ကြေးလည်းရမထားခဲ့ပါဘူး လွှတ်တော်ခုံအဖွဲ့အနေနဲ့ စစ်ဆေးတွေ့ရှိချက်၊အကြံပြုချက်နဲ့ ဦးအောင်သန်းမှာ ခိုင်လုံသောအထောက်အထားများရှိကြောင်း ၂၀၁၆-၁၇ ကပြန်တင်ပေးလိုက်တယ် ။ အခု စိုက်ပျိုးမွေးမြူဆည်မြောင်းဝန်ကြီး ဦးကျော်ကျော်ဝင်းက ဒီအမှုတွဲကို ပြန်တင်ပေးပါဆိုလို့ မြို့နယ်အထွေထွေအုပ်ချုပ်ရေးဦးစီးဌာနက စစ်ဆေးချက် ၊ မြေစာရင်းကစစ်ဆေးချက် တွေကိုပြန်တင်ပေးပြီး အဖြေထွက်လာပါလိမ့်မယ် လွှတ်တော်တိုင်တယ်ဆိုပေမယ့် လွှတ်တော်ကနေတော့ ဆုံးဖြတ်ပေးဖို့မရှိပါဘူး ဟုဗန်းမော်မဲဆန္ဒနယ်အမှတ်(၁) ကပြည်နယ်လွှတ်တော်ကိုယ်စားလှယ်ဦးဇော်သင်း ကပြောသည်။
“တောင်သူများအနေဖြင့်နစ်နာခဲ့သည်မှာ မှန်သော်လည်း ဘယ်အဆင့်ကိုတိုင်ရမယ်၊ ဘယ်ကနေစ တိုင်ရမယ် ဆိုတာမသိကြရှာဘူး သူတို့ရဲ့ပိုင်ဆိုင်မှုကိုတောင်ခုထိမလုပ်နိုင်ကြဘူး ၊ မြေလွတ်မြေလပ်မြေရိုင်း ကိုဘယ်လိုလျှောက်ရမယ်စသဖြင့် အသေးစိပ်လုပ်ရမယ့် ၊ အဆင့်ဆင့်လုပ်ရမယ့် လုပ်ထုံးလုုပ်နည်းတွေကို ကျေးလက်အုပ်ချုပ်ရေးမှူးတွေကို သင်ပေးထားပြီး ကျေးလက်နေတောင်သူများကိုထပ်ဆင့်ရှင်းလင်းပြော ကြားနိုင်ရန်ထိ ညွှန်ကြားထားပြီးဖြစ်ပါတယ် ၊ ခုဦးအောင်သန်းနဲ့ပတ်သက်ပြီး ကျွန်တော်တို့ မြေပြင်ကွင်း ဆင်းစစ်ဆေးမှုတွေပြန်လုပ်တယ် သက်သေအထောက်အထားနဲ့ဓါတ်ပုံနဲ့ တွဲပြီးအစိုးရအဖွဲ့ကိုပြန်တင်ပေးဖို့ လုပ်နေပါတယ်ဟု ဗန်းမော်မြို့နယ်အုပ်ချုပ်ရေးမှူးဦးစိုးမြင့်လှိုင်ကပြောသည်။
သို့ရာတွင် ဦးအောင်သန်း၏ ဥယာဉ်ခြံမြေသိမ်းဆည်းခံရမှုနှင့်ပတ်သက်ပြီး ၂၀၁၄ခုနှစ် ဒီဇင်ဘာလ ၁ ရက်နေ့တွင် မြို့နယ်အုပ်ချုပ်ရေးမှူးထံ လိပ်မူကာတိုင်ကြားခြင်း ၊ ၂၀၁၆ခုနှစ်ဇွန်လ၂၉ရက်နေ့တွင် ပြည်နယ် အုပ်ချုပ်ရေးမှူးရုံးသို့လည်းကောင်း ၊ ၂၀၁၅ ခုနှစ် သြဂုတ်လ ၃ရက်နေ့တွင်လည်းကောင်း ၊ ၂၀၁၆ ခုနှစ်မေ လ၂၆ရက်နေ့တွင် လွှတ်တော်ဥက္ကဌထံသို့လည်းကောင်း ၊ ၂၀၁၆ဇူလိုင်လ ၅ရက်နေ့ရက်စွဲဖြင့် လွှတ်တော်မှ သက်ဆိုင်ရာကော်မတီ နှင့် လွှတ်တော် ကိုယ်စားလှယ်တို့မှ ကွင်းဆင်းစစ်ဆေးရန်ညွှန်ကြားစာကိုလည်းကောင်း ၊ အထောက်အထားစာရွက်စာတမ်းများကို တွေ့ရှိရသော်လည်း ၂၀၁၄ မှစတင်ကာတိုင်ကြားခဲ့ သည့်အမှုသည် ယခု၂၀၁၉ခုနှစ်ရောက်သည့်တိုင် အမှန်တရားပေါ်ပေါက်နိုင်ခြင်းမရှိခဲ့မှုအပေါ် စိတ်ပျက်မိပါ ကြောင်း တပ်မတော်မှသိမ်းယူခဲ့သည့် လယ်ယာမြေများကိုပင် ယခုအခါပြန်လည်အပ်နှံနိုင်ခဲ့သော်လည်း ဦးအောင်သန်း၏ ဥယာဉ်ခြံ မြေပြသနာကို ယခုကဲ့သို့ကြာမြင့်နေရခြင်းအပေါ် အမြန်ဆုံး အမှန်တရားပေါ် ပေါက်နိုင်ရေးအတွက် ယခုမေလကုန်ပိုင်းတွင် နိုင်ငံတော်သမ္မတထံတွင် ထပ်မံအသနားခံတင်ပြတောင်းခံ သွားမည်ဖြစ်ကြောင်း ကာယကံရှင်ဦးအောင်သန်းကပြောကြားခဲ့သည်။
ခရီးဖေါ် (ဗန်းမော်)