ဇရပ်ဖြူရွာအနီး အိမ်စီးကားတစ်စီး မိုင်းထိမိပြီး လေးဦး သေဆုံး၊ နှစ်ဦး အပြင်းအထန် ဒဏ်ရာရ
EPN
လွိုင်ကော်၊ ဖေဖော်ဝါရီ ၆
ကယားပြည်နယ်၊ လွိုင်ကော်ခရိုင်၊ လွိုင်ကော်မြို့၊ ဇရပ်ဖြူရွာအနီး ယနေ့ နေ့လယ်ပိုင်းက အိမ်စီးကားတစ်စီးမိုင်းထိမိပြီး ၄ ဦးသေဆုံးကာ၊ ၂ ဦး အပြင်းအထန် ဒဏ်ရာရရှိခဲ့ကြောင်း သိရသည်။
အဆိုပါ အိမ်စီး Air Wax အဖြူ မော်တော်ကားသည် ယနေ့ နေ့လယ် ၂ နာရီအချိန်ခန့်က ဇရပ်ဖြူရွာအကျော်လမ်းတွင် မိုင်းနင်းမိသဖြင့် ယင်းနေရာသို့ ရွှေလွိုင်ကော် (ကယား) ပရဟိတအသင်းမှ သွားရောက်ကူညီခဲ့ကြောင်း သိရသည်။
“အိမ်စီးကားမိုင်းပေါက်ကွဲတာ အမျိုးသား ၆ ယောက်မှာ ၄ ယောက်သေတယ်၊ ၂ ယောက်လည်း သိပ်အခြေနေမကောင်းဘူး။ စိုးရိမ်တာက အဲ့ဒီနားမှာ လက်ကျန်မိုင်းတွေရှိနေမှာလည်း စိုးရိမ်ရတယ်” လို့သွားရောက် ကူညီသည့် ပရဟိတအသင်းမှ တာဝန်ရှိသူတစ်ဦးက ဆိုသည်။
သေဆုံးသူများမှာ ကိုအောင်စိုးမိုး၊ ကိုထွန်းမင်းလတ်နှင့် ကိုစိန်မင်းတို့ ဖြစ်ကြောင်း သိရပြီး သေဆုံးသည့် ကျန်အမျိုးသားအား မည်သူမည်ဝါဖြစ်ကြောင်း မသိရှိရသေးပေ။
ဒဏ်ရာရရှိသည့် အမျိုးသားများနှင့် ပြန့်ကျဲပြီး တစ်ပိုင်းတစ်စဖြစ်နေသည့် ရုပ်အလောင်းများကို လွိုင်ကော်ဆေးရုံသို့ပို့ဆောင်ပေးထားကြောင်း သိရသည်။
Photo Credit