ညမထွက်ရအမိန့်နှင့် ပတ်သက်ပြီး စွဲဆိုထားသည့် အမှုတစ်မှုကို အမှုတွဲချေဖျက်ဖို့ လျှောက်ထား
EPN
မြစ်ကြီးနား၊ မေ ၁၅
အဆိုပါ လျှောက်ထားချက်နှင့် ပတ်သက်၍ အမှုကို လိုက်ပါ ဆောင်ရွက်နေသည့် တရားလွှတ်တော်ရှေ့နေ ဦးနေလင်းနိုင်၊ဦးသက်ထွန်းဦး၊ ဦးကျော်စိုးမိုးတို့ကို ယနေ့မေ ၁၅ ရက်က ဆက်သွယ်မေးမြန်းခဲ့သည်။
” ရာကျင့်- ၁၄၄ အရ ထုတ်ပြန်တဲ့ ကိစ္စမှာ သူရဲ့ ဥပဒေအရ ကာလသတ်မှတ် ချက်နဲ့ ပတ်သက်ပြီးတော့ ရာကျင့်-၁၄၄ (၆)မှာ လူ့အသက်၊ ကျန်းမာရေး၊ သို့မဟုတ် လုံခြုံမှုကို အန္တရာယ်ဖြစ်စေ ၊ ရုန်းရင်းဆန်ခတ်မှု ၊ သို့မဟုတ် သတ်ပုတ်နှောင့်ယှက်မှု ဖြစ်ပွားရန်ရှိသည့် အမှုများတွင်ဖြစ်စေ နိုင်ငံတော်သမ္မတသည် နိုင်ငံတော်ပြန်တမ်းတွင် အမိန့်ကြော်ငြာစာဖြင့် အခြား နည်းညွှန်ကြားခြင်း မရှိပါက ဤပုဒ်မအရ ချမှတ်သော မည်သည့်အမိန့်မျှ ချမှတ်သည့် နေ့ရက်မှ “နှစ်လ”ထက် ပို၍မတည်စေရ လို့ပါရှိတယ် ။ ဒီတော့မြစ်ကြီးနားမြို့နယ်မှာထုတ်ပြန်ထားတဲ့အမိန့်ဖြစ်တဲ့ အမိန့်အမှတ်-၃/၂ဝ၂ဝ ရဲ့ အပိုဒ်-၄ မှာဆိုရင် နောက်ထပ်မထုတ်မပြန်မချင်းလို့ပါနေတဲ့အတွက် ရက်အကန့် အသတ်မရှိတဲ့သဘော ဖြစ်နေတာပေါ့။ ဒီတော့ ဒီထုတ်ပြန်တဲ့အမိန့်ဟာ ဥပဒေနဲ့ ညီ/မညီဆိုတဲ့ ဥပဒေပြဿနာတစ် ရပ်ရှိနေတာပေါ့။ စွဲဆိုတဲ့ပုဒ်မက ၁၈၈ (ရာဇသတ်ကြီး)ဖြစ်တဲ့အတွက် ပြည်သူ့ဝန်ထမ်းက ဥပဒေ နဲ့အညီ ထုတ်ပြန်တဲ့အမိန့် တစ်ရပ်ရှိဖို့လိုတယ်။ ” ဟု ယင်းအမှုကို လိုက်ပါ ဆောင်ရွက် သူရှေ့နေများက ဆိုသည်။
ထို့အပြင် ဆက်လက်၍ ”ဒါကြောင့်မို့ ကျွန်တော်တို့အနေနဲ့ ရာကျင့် -၅၆၁-က အရ [ မြစ်ကြီးနားမြို့နယ်အုပ်ချုပ်ရေးမှူးက တရားလိုလုပ်စွဲဆိုထားတဲ့ ရာဇဝတ်မှုအမှတ်-၄၇၆/ ၂ဝ၂ဝ အမှုတွဲကို ]ချေဖျက်ဖို့ရာ ကချင်ပြည်နယ် တရားလွှတ်တော်ကို ရာဇဝတ်အထွေထွေမှုအမှတ်-၁/၂၀၂၀ အနေနဲ့ (၁၅-၅-၂၀၂၀)ရက်နေ့မှာ တက်ရောက်ထားပါတယ်” ဟု ၎င်းတို့က ဆက်လက်ပြောကြားသည်။
ချမ်းမြူး