၃၁ ကြိမ်မြောက် ဆီးဂိမ်းပြိုင်ပွဲ၌ မြန်မာအသင်းအတွက် ပထမဆုံးရွှေတံဆိပ်ဆုစတင်ရရှိ
EPN
မြစ်ကြီးနား၊ မေ ၁၂
ဗီယက်နမ်နိုင်ငံမှအိမ်ရှင်အဖြစ် လက်ခံကျင်းပလျက်ရှိသည့် ၃၁ ကြိမ်မြောက် အရှေ့တောင်အာရှအားကစားပြိုင်ပွဲ(ဆီးဂိမ်း)တွင် မြန်မာနိုင်ငံမှပထမဆုံးရွှေတံဆိပ်ဆုအား စတင်ရရှိခဲ့ပြီဖြစ်ကြောင်း သိရသည်။
အဆိုပါ ပထမဆုံးရွှေတံဆိပ်ဆုအား KURASH အားကစားနည်းမှစတင်ရရှိခဲ့ခြင်းဖြစ်ကာ မြန်မာအားကစားသမားမအေးအေးအောင်မှ အမျိုးသမီး +87Kg တန်းမှရရှိခဲ့ခြင်းဖြစ်သည်။
ယင်း KURASH အားကစားနည်းမှ မြန်မာနိုင်ငံအတွက် ကြေးတံဆိပ်ဆုကိုလည်း အမျိုးသမီးအားကစားသမားမခင်ခင်စု မှ +48 Kg တန်းတွင် မေ ၁၀ ရက် နေ့ကရရှိထားခဲ့သည်။
လက်ရှိကျင်းပနေသည့် (၃၁) ကြိမ်မြောက် ဆီးဂိမ်းပြိုင်ပွဲတွင် မြန်မာနိုင်ငံက အားကစားနည်း ၂၀ ဝင်ရောက်ယှဉ်ပြိုင်လျက်ရှပြီး ရွှေတံဆိပ်တခု၊ ကြေးတံဆိပ် ၁ ခု စုစုပေါင်း ဆုတံဆိပ် ၂ ခု နိုင်ငံအလိုက် ဆုတံဆိပ်ရရှိမှု အဆင့် ၇ တွင်ရပ်တည်နေကြောင်း သိရသည်။