ဟူးေကာင္း ပယင္းလုပ္ကြက္မ်ား အျမန္ဆံုးခ်ေပးေစလုိ

EPN

အယ်ဒီတာအာဘော်၊ စက်တင်ဘာ ၁၅

ကချင်ပြည်နယ် အစိုးရအဖွဲ့အနေဖြင့် များမကြာမီ ကာလအတွင်း တနိုင်းဒေသရှိ ပယင်းလုပ်ကွက်များကို တရားဝင်ချပေးနိုင်ရန် လတ်တလော ဥပဒေဘောင်အတွင်း လုပ်ကိုင်နိုင်ရန် ကျောက်မျက်ရတနာ အသေးစားနှင့် လက်လုပ်လက်စား ဥပဒေကြမ်းကို အတည်ပြုနိုင်ရေးအတွက် လူထုကို ချပြရှင်းလင်းနေသည့် အချိန်ဖြစ်သည်။

ယခု ကျောက်မျက်ရတနာ အသေးစားနှင့် လက်လုပ်လက်စား ဥပဒေကို အတည်ပြုပြီးမှသာ ပယင်းလုပ်ကွက်များကို တရားဝင်ချပေးနိုင်မည်။ အစိုးရမှ လုပ်ကွက်များ တရားဝင်ချပေးခြင်းဖြင့် ဒေသခံများ လက်ရှိ ကြုံတွေ့နေရသော စားဝတ်နေရေး အခက်အခဲ ဘဝမှ ဒေသခံများ လုပ် ကိုင်ခွင့်နှင့် အကျိုးခံစားခွင့်များရရှိမည်ဖြစ်သည်။

သို့သော် အချိူ့က ပယင်းမှော်လုပ်ကွက်များကို တရားဝင်ချပေးပါက ဌာနေဒေသခံများအတွက် နှစ်နာဆုံးရှုံးမှုများရှိပြီး အမှန်တကယ် အကျိုးဖြစ်ထွန်း ခံစားရမည့်သူမှာ ဒေသခံမဟုတ်သည့် ရပ်ဝေးနေသူများသာ ချမ်းသာအဆင်ပြေသွားမည့်အပြင် ပြည်နယ်အတွင်းရှိ သဘာဝပတ် ဝန်းကျင်ပျက်ဆီးသွားမည်ဖြစ်သည့်အတွက် ကန့် ကွက်သူများလည်း ရှိနေပေသည်။

သို့သော် လတ်တလောမှာ ဒေသခံတိုင်းရင်းသားများသည် ယခင်မှော်တရားမဝင်လုပ်ကိုင် တုန်းကလို စားဝတ်နေရေးအဆင်မပြေလည် သည့်အပြင် တနိုင်းမြို့မ၊ မနက်ခင်းဈေးတန်းသည်လည်း ဝယ်သူမရှိဘဲ ခြောက်သွေ့လို့ နေပေတော့သည်။ အမှန်တကယ်ဒေသခံများသည် ယင်း ပယင်းမှော်လုပ်ကွက်များကို တရားဝင်ချ ပေးစေလိုသည်။

ယခုလို တရားဝင်လုပ်ကွက်များ ချပေးတော့ မည့်သတင်းကြောင့် ပယင်းစီးပွားရေးလုပ်ငန်းကို လုပ်ကိုင်ကြရန် စိုင်းပြင်းနေသည့် လုပ်ငန်းရှင်များလည်း ရှိနေသည်။

ထို့ကြောင့် ယခု ပယင်းလုပ်ကွက်များကို ချပေးတော့မည်ဆိုလျှင် ပြည်နယ်အစိုးရအနေဖြင့် ချပေးမည့် နေရာ၊ လျှောက်ထားသည့် လူများကို သေချာစနစ်တကျ စိစစ်ရမည်။ အဘယ်ကြောင့်ဆိုသော် ဤသို့ လုပ်ကိုင်ခွင့်များကို ချပေးသည့်နေရာ မှာ ပယင်းထွက်ရှိနိုင်မှုရှိမရှိ၊ လျှောက်ထားသူသည် ဒေသခံများ ဟုတ်မဟုတ်ဆိုတာကို စိစစ်ရမည်ဖြစ်သည်။

သို့မဟုတ်သော် ဒေသခံများ၏ အကျိုးခံစားခွင့်ရရှိအောင် ဖန်တီးပေးခြင်းဆိုရာမှာ ထိရောက်မှု မရှိသည့် အပြင် ဒေသနှင့် နှစ်ပေါင်းများစွာ နေထိုင်လာခဲ့သော ဌာနေတိုင်းရင်းသားများအတွက် အကျိုးမဖြစ် ထွန်းဘဲ နှစ်နာမှုများသာရှိမည်။

ယခု အသေးစားလုပ်ကိုင်ခွင့်နှင့် တနိုင်တပိုင် လုပ်ကိုင်ခွင့် ဖန်တီးပေးခြင်းသည် မူရင်း ဒေသခံများ အတွက် အလုပ်အကိုင်ခွင့်လန်းဖန်တီးပေးခြင်းနှင့် မိမိဒေသ၌ ထွက်ရှိသော သယံဇာတများကို တရား ဝင်လုပ်ကိုင်ကြခြင်းဖြင့် အသက်မွေးဝမ်းကျောင်းပြုစေနိုင်ရန်အတွက်သော်လည်းကောင်း၊ ပြည်နယ် အစိုးရ၏ အခွန်ငွေတိုးလာရန်အတွက်သော်လည်းကောင်း ဖန်တီးပေးခြင်းဖြစ်သည်။

ထို့ကြောင့် ယခုရွှေနှင့် ပယင်းလုပ်ကွက်များ ချပေးမည့်အစီအစဉ်သည် ဒေသခံများအတွက် ရည်ရွယ် ခြင်းလော၊ အောက်ပြည်အောက်ရွာဒေသမှ ခဏသာ လာရောက်လုပ်ကိုင်ကြသူများအတွက်လော ဆိုတာကို သေချာစိစစ်ရန်နှင့် မူူရင်းဌာနေတိုင်းရင်းသားများအတွက် ဟူးကောင်း ပယင်းလုပ်ကွက်များ အမြန်ဆုံးချပေးရန်လိုအပ်ပါကြောင်း ဖေါ်ပြလိုက်ပါသည်။

အယ်ဒီတာ

ထာဝရငြိမ်းချမ်းရေးသတင်းကွန်ရက်

Eternally Peace News Network (EPN)