တစ်ခါတစ်ရံ မေတ္တာလက်နက်များထက် တုတ်၊ ဓားလက်နက်များက ပိုထက်ဟု မျိုးသာကီဆရာတော် အရှင်ပုည မိန့်ကြား

Spread the love

EPN
မင်းဘူး၊ ဇန်နဝါရီ ၁၈ (၂၀၂၄)

MNDAA အဖွဲ့၏ ဘာ သာရေးစော်ကားမှုအပေါ် ကန့်ကွက်ရှုတ်ချပွဲ အခမ်းအနားကို ဇန်နဝါရီ ၁၇ ရက်နေ့လည် ၃ နာရီက မင်းဘူးမြို့၌ ကျင်းပပြုလုပ်ခဲ့ကြောင်း သိရသည်။

အဆိုပါ အခမ်းအနားတွင် မျိုးသာကီဆရာတော် အရှင်ပုညက ” တစ်ခါတစ်ရံတွင် မေတ္တာလက်နက်များထက် တုတ်၊ ဓားလက်နက်များက ပိုထက် ” ဟု မိန့်ကြားတော်မူခဲ့သည်။

ဗုဒ္ဓဘာသာသည် မေတ္တာထားရသည့်ဘာသာဖြစ်ပြီး မိမိတို့ ယခုကဲ့သို့ပြောဆိုနေရခြင်းသည် ပြောချင်လွန်း၍ မဟုတ်ဘဲ ကိုယ့်အမျိုး၊ ကိုယ့်ဘာသာ၊ ကိုယ့်သာသနာကို ကိုယ့်ရေကိုသောက် ကိုယ့်မြေမှ အဆီအနှစ်များကို ထုတ်ဖော်စားသုံးနေသည့် လူတစ်စု၏ စော်ကားမှုကြောင့် ပြောဆိုနေရခြင်း ဖြစ်သည်ဟု မိန့်ကြားခဲ့သည်။

” တစ်ခါတစ်ရံမှာ မေတ္တာလက်နက်ထက် တုတ်၊ ဓားလက်နက်တွေက ပိုထက်ပါတယ်။ ဒါ့ကြောင့် နိုင်ငံတော် သံဃနာယာက ဆရာတော်ကြီးတွေ၊ ရပ်ကျေးသံဃနာယက ဆရာတော်ကြီးတွေ အနေနဲ့ ဒီလိုမျိုးအဖြစ်အပျက်တွေကို ထိုင်ကြည့်မနေဘဲ ထိရောက်စွာ အရေးယူပေးဖို့လတောင်းဆိုလျှောက်ထားပါတယ်။ နစက အစိုးရကိုလည်း တောင်းဆိုပါတယ် ” ဟု မိန့်ကြားခဲ့သည်။

ယင်းအပြင် ရန်သူအား မေတ္တာပေး၍ မေတ္တာပြန်မရပါက တရားသည်တုတ်ဘဲဖြစ်ပြီး ကိုယ့်အမျိုး၊ ကိုယ့်ဘာသာ၊ ကိုယ့်သာသနာအား ထိခိုက်နေခြင်းကို မပြောရဲ၊ မဆိုရဲ၊ မလုပ်ရဲ၊ မကိုင်ရဲပါက ကျီးလောက်ပင် အဆင့်မရှိဖြစ်နေမည်ဟု မိန့်ကြားသည်။

” ကျီးတွေဟာ သူတို့ထဲကတစ်ကောင်ကို လေးခွနဲ့ ပစ်ချလိုက်လို့ အဲဒီကျီးဟာ သေလို့သာ ကျပါလိမ့်မယ်။ အဲဒီကျီးရဲ့နားမှာ သူ့အမျိုးကျီးတွေက ဝိုင်းအာတယ်။ ကိုယ့်အမျိုးကိုထိရင်၊ ကိုယ့်ဘာသာကိုထိရင်၊ ကိုယ့်သာသနာကိုထိရင် ကျီးလိုဝိုင်းအာရမယ်။ အာနိုင်တဲ့ သတ္တိရှိအောင် ကြိုးစားကြပါ ” ဟုလည်း ထပ်မံမိန့်ကြားခဲ့သည်။

လက်ရှိအချိန်၌ လူမှုကွန်ယက်စာမျက်နှာများတွင် ပျံ့နှံ့နေသည့် လက်နက်ကိုင်အဖွဲ့ဝင်များက ဘုရားစေတီပုထိုးတော်များနှင့် ဘုရားဆင်းတုတော်များအား ဖျက်ဆီးနေမှုများကို မြန်မာနိုင်ငံအနှံ့တွင် ရဟန်းသဃာတော်များနှင့် လူပုဂ္ဂိုလ်များစုပေါင်း၍ ကန့်ကွက်ရှုတ်ချပွဲများ ပြုလုပ်လျက်ရှိပြီး၊ အဖွဲ့အစည်း အများအပြားမှလည်း ကန့်ကွက်ရှုတ်ချကြောင်းထုတ်ပြန်ချက်များ ထုတ်ပြန်လျက်ရှိသည်။

ကျော်စိုးသူ

Spread the love